《再見了，還會再見嗎？》: 第45章 – 天才表演（上）
「Lily，我想問下我哋聽日個順序係點㗎？」我㩒一㩒Enter將句嘢send出去。
同時我都喺facebook揾一揾阿盈，
「份book report我今日放學做好咗喇，你想唔想睇一睇？」
阿盈好快就覆返我，
「好啊，咁我喺屋企印埋，然後聽日拎去交？話晒都叫做參與下嘛 XD」
「咁麻煩晒你喇」
「XD」
跟住我再㩒返落個group睇一睇，
Lily都係未覆。
我行咗出廳諗住斟杯水飲，點知俾爸爸叫停咗。
唔知有咩事呢，我都好耐冇同爸爸媽媽傾過偈。
到底有幾耐呢？
我諗……應該都有幾個月掛。
真係記得唔係好清楚喇，總之就係好耐。
我嘅”冇傾過偈”係指冇傾閒偈啫，唔係完全冇交流嘅。
每日都有講下早晨啊，朝早叫佢哋用廁所用快啲啊，咁囉。
平日我一返到屋企就係即刻入房，係食飯先行一行出廳。
食飯又係各有各食，我有我自己睇電視，佢哋有佢哋傾偈，好少會關心下我近況。
唯一同我叫做有多啲交流嘅親戚，都依然係得嫲嫲。
爸爸：「車仔你呢排温書辛唔辛苦啊？中三應該準備揀科會好忙㗎喎」
估唔到會關心我近況。
我：「還好啦，冇咗媽媽逼我做嘢就點都輕鬆咗嘅」
爸爸：「又唔好咁講，有冇諗過嚟緊讀咩科呀？」
我又真係冇諗過呢個問題喎……
我：「應該科學嗰啲掛，好似成績好啲同埋有興趣啲」
爸爸：「都幾好啊，有冇諗過讀A Maths嗰啲？話晒你數學都咁叻」
A Maths？？？
而家好似冇咗呢科？？？
我：「A Maths啫係啲好難嘅數學？」
爸爸：「類似微積分嗰啲囉，聽講都幾難。我都唔係識好多啊，你都知我冇讀過呢啲㗎喇」
微積分，應該就係之前喺圖書館睇到好難嗰啲書？？
我：「我遲啲返去問下老師再決定啦，我入返去做嘢先」
望一望電腦，原來Lily已經覆咗。
Lily：「聽日放學就落去教員室揾陳sir先，然後佢會車我哋去社區會堂嗰到。跟住就等職員指示我哋幾時表演，最後就同啲公公婆婆傾下偈同關心下佢哋咁就完」
我：「睇落都幾輕鬆，聽日放學見啦」
〜翌日〜
「合唱團個女仔孭埋書包企喺外面喎，佢等你放學呀？」阿天拍一拍我問。
Lily又話喺陳sir到等嘅，點解又會喺班房外面等我……
「唔係，不過我有啲嘢約咗佢啫」
「嘩，你同時俾咁多女追，頂唔頂得順呀，俾我分擔下嘛」阿天細細聲講。
「你哋頭先傾咩丫？我都想一齊傾喎」
雯雯望咗過嚟，仲露出咗個可怕嘅笑容。
「哈哈，你搞掂雯雯先講啦，我走先喇〜」
出到課室外面，
「車仔早晨！」
都放學仲講咩早晨啊…… 都係咪鬼陪佢癲。
「你尋晚又話下面等嘅，做咩走嚟我班房門口」我問Lily。
「我見有藉口嚟順便睇下Brian咋嘛，你唔係以為我嚟等你放學嘛？」Lily一邊講一邊笑。
乜你而家唔係就係等咗我放學喇咩……
「行啦，冇人想知啊」
經過Parco班房嗰陣發現佢已經連人帶袋唔見咗，睇嚟已經落咗去下面等。
落到下面就已經即刻見到陳sir同Parco。
「齊人，你哋三個跟住上我架車啦〜」
Parco一見到陳sir上咗車，就即刻坐咗喺陳sir左邊，而我同Lily就唯有坐後座。
沿途一直都冇人出聲，大家都只係望出窗睇下風景。
可能係因為同訓導主任同車，所以唔敢亂講嘢掛。
過咗一陣，陳sir首先出聲
大家聽到陳sir講嘢嘅第一個反應，就係轉返個望緊風景嘅頭向司機位。
「一陣去嗰個社區中心係喺錦田嗰到，所以走嗰陣我會送埋你哋去錦上路方便你哋走」
Parco同Lily聽完就只係尷尬地微笑，再點一點頭。
咁唯有我出聲啦……
如果唔係嘅話，就會變咗做陳sir講完嘢冇人應咁，超級尷尬。
我：「唔該陳sir〜」
陳sir：「哈哈，幾驚你哋冇人應我。其實你哋可以傾下偈㗎喎，我冇咩所謂」
我：「其實我哋都唔係好熟㗎咋，冇乜太多嘢可以傾……」
陳sir：「噢，咁你哋一陣個自由時間plan咗同啲老人家做咩？」
我用手肘撞一撞Lily。
然後佢又撞返我。
Lily：「我哋會有個小型才藝表演呀，希望啲老人家會鍾意啦」
陳sir：「我都好想快啲睇下你哋會做成點」
Lily：「其實我都係表演跳舞啫，平時都有玩開。不過今日就唔同啦，有鋼琴大師肯幫我做伴奏喎〜 點都落力啲跳啦」
Lily特登拖長個尾音，聽到我都打晒冷震。
我：「咩鋼琴大師，又想笑我。你因住我爆你啲秘密呀」
Lily：「講好唔準爆出去㗎！！」
Lily講完，轉咗個頭過嚟睥住我。
陳sir：「你哋仲話唔熟，連秘密都知喎〜 喂喂喂，到喇，你哋落車先啦」
成程車Parco都冇出過聲，可能佢真係唔係幾鍾意我同Lily啦。
「你哋入去等我，我去泊埋架車過嚟」陳sir對我哋講。
行到入面，就有個應該係嗰到職員嘅人行咗過嚟。
好似唔知喺邉到見過佢。
應該係學校請過佢嚟講座掛。
「你哋係咪XX中學嘅學生啊，我係黃姑娘呀，好多謝你哋放學之後都仲肯抽時間嚟同公公婆婆玩啊」
其實我哋都係被逼嚟㗎咋，都唔係自願嘅。
Lily：「唔使客氣，我哋嚟做義工都開心嘅」
真係好虛偽……
黃姑娘：「你哋有冇咩要我幫手準備㗎？」
Lily：「我哋想要個琴啊，唔該你丫」
黃姑娘：「哦，咁我入去攞出嚟先啦，你哋喺到等我一陣」
喺黃姑娘行開咗嘅時候，陳sir就返咗嚟。