《再見了，還會再見嗎？》: 第51章 – 熱鬧過後

身邊嘅人望到對面大廈彈出一個個數字，都紛紛跟住嗌出嚟。

「……3！2！1！Happy New Year！！！」

嘭！！！嘭嘭！！！

一個個煙花由地面向天上射出。

其實我都好似講過幾次，我的確唔鍾意一啲嘈吵多人嘅環境。





因此要我留喺呢個環境，就硬係感覺有啲周身唔舒服。

我行咗去平台花園靠後嘅一個地方，坐喺長櫈上挨住椅背休息。

用一個旁觀者嘅角度望住呢班，因為新一年到來而感到高興嘅人。

呢到同幾個鐘頭前相比，真係截然不同。

啱啱天黑嚟嘅時候，呢到仲係得小貓三四嘢，可以安靜地望住個海，欣賞四圍嘅景色。





相反，而家成個平台花園靠海嘅一邊企滿咗慶祝新年嘅人。

同坐喺呢一邊嘅我相比，猶如置身兩個世界。

我望返我啲朋友嗰邊，佢哋好似仲未發現我消失咗。

「原來大家冇咗我都可以玩得咁開心，我都係再休息下，然後一陣自己走啦」

過咗一陣，佢哋真係好似冇發現我唔見咗，仲好開心咁就離開咗平台花園。





正當我伸一伸懶腰，準備要離開嘅時候，後面突然有人拍我。

「車仔，點解你仲喺到㗎？」阿盈問我。

「你又點解喺到嘅？」我問返阿盈。

「5分鐘前佢哋走嘅時候我已經望到你喺到㗎喇，但係又覺得你一定有啲原因先會想自己一個靜下，所以咪冇叫所有人一齊行過嚟叫醒你囉〜」

原來仲有人會關心我……

「我見佢哋入晒閘就已經即刻話有嘢漏低上嚟揾你喇，仲叫佢哋唔使等我」

作為一個由細到大都冇咩人關心嘅人，缺乏安全感就點都會㗎喇。

可能你哋會唔明我講咩，但係喺覺得孤獨嘅時候，遇到有人關心自己，真係會覺得格外窩心。





「行啦車仔，我知你唔係返屋企㗎」企喺到嘅阿盈向我伸出右手。

我左手向阿盈借力企返起身。

企起身後，阿盈隻右手依然捉住我左手。

唔通呢啲就係之前唔知係邊個同我講嘅借啲意拖住唔放手？？？

我望一望阿盈。

然後阿盈突然又放開咗。

明明阿盈應該係想拖，點解又放返開嘅？





「Sorry啊…… 啱啱拖住咁耐係我唔好……」

「冇嘢……呢啲小事嚟啫……」

「一係我陪你你返去補數啦〜」

話時話，阿盈點會知我唔係返屋企嘅，唔通佢跟蹤我？

「你點知道我唔係返去㗎？」我好奇地問。

「唔話你知，總之我就知啦〜」

吓，我真係諗極都唔明點解阿盈會知喎。

明明我放假去嫲嫲屋企嘅呢件事，應該冇學校同學知㗎喎。





唔通阿盈偷偷地跟蹤我？

都係唔好亂諗喇，愈諗愈恐怖。

「唔好發吽哣啦，我送埋你返去我都要走喇〜」阿盈望住我講。

我同阿盈一直沿住海旁行。

即使已經12點半，但旁邊睇完煙花未散去嘅人依然好多。

「同唔同女朋友仔影張相啊？過嚟啦，最多我免費送一張俾你哋」一個應該係做開幫遊客影相嘅攝影師同我哋講。

「佢同我只係朋友嚟㗎咋……」我尷尬地回應返個攝影師。





「不如影啦，我想有張相留念」阿盈突然開聲講。

「咁我哋影一張啦，麻煩晒〜」

攝影師拎住相機行到後少少嘅位置，再用鏡頭向住我哋嘅方向。

「你哋企埋少少啦，唔好企得咁開先得㗎」攝影師一邊撥手一邊講。

阿盈突然一下繞住我手臂，然後輕輕挨向我嗰邊。

「咁先係㗎嘛〜 準備呀，三，二，一，笑〜」

影完之後，我哋向返攝影師嗰邊行。

「等我一陣啊，張相印緊出嚟」攝影師對我哋兩個講。

「張相影得好靚呀〜〜」攝影師將張相遞俾阿盈。

邊會有人自己讚自己影得靚㗎……

阿盈將張相收到銀包，然後再繞返住我手臂。