《再見了，還會再見嗎？》: 第52章 – 盈

「係呢，你哋介唔介意我印多張釘喺嗰邊塊板？」攝影師右手指住旁邊嘅一塊展示板。

「我冇咩所謂，你呢？」阿盈問返我。

「我都ok嘅……」

「真係太好喇，我又可以show多一張靚相俾人睇！！」

條友果然係超級古怪，又讚自己啲相靚。





「咁我哋走先喇，多謝你啊〜」阿盈對個攝影師講。

跟住我同阿盈又沿海旁繼續行，直到碼頭鐘樓停低咗。

「不如我自己返去啦，你可以早啲返屋企休息嘛……」我對阿盈講。

「你唔想我陪你行咩？」阿盈扁起嘴。

好可愛……





「唔係…… 有女仔陪我行我點會唔開心……」

仲要繞住我隻手行。

「乜你同我一齊行得呢樣……」阿盈欲言又止，講到一半又耷低咗頭。

我係咪應該主動啲對阿盈講我對佢嘅感受呢？

可能你哋作為旁觀者，會覺得我對阿盈其實冇咩感覺，但其實身體真係好諴實。





上一次阿盈喺海洋公園叫我扮佢男朋友嘅時候，我隻手都只係伸到佢另一邊手臂，然後再攬住佢。

但係今日6點幾嗰陣，當阿盈挨落我膊頭嘅時候，我係主動攬住佢條腰。

你哋唔好誤會呀，唔係我咸濕仔趁佢瞓咗偷摸佢啊。

更何況今次我都唔係第一次攬阿盈條腰。

話說你哋都知我平日會落細房温書㗎啦，阿盈佢就成日都會入嚟探我，話想睇下我温書温成點。

但實際上呢，佢就係入嚟借我膊頭瞓覺。

咁我哋係點樣開始我哋呢個sleeping partner關係㗎呢？？

又到咗講故事嘅時候喇〜





呢件事呢，就發生喺放假前嘅某個星期六。

前一晚嗰陣，阿盈就如常咁同我傾偈啦。

傾下傾下嘅過程呢，佢就話想約出嚟一齊做嗰個數學閱讀報告。

咁而家嘅我星期六冇嘢再學，咁當然就可以出去做嘢。

做咗唔夠一個鐘，

阿盈：「好攰呀，借個膊頭嚟瞓下得唔得啊？」

我：「你都開到聲啦，唔通我話唔得咩……」





阿盈好似之前咁挨咗落嚟我到，然後合埋眼。

突然，有隻手從後伸過嚟捉住我隻左手，再將我隻手向左拉到去阿盈嘅另一邊腰。

估唔到阿盈居然又咁主動……

老實講，我真係有少少想縮開。

畢竟我哋又唔係男女朋友嘅關係，咁樣攬住佢條腰又真係好似唔係幾好。

但係又諗到，既然阿盈都唔介意，咁我都唔使諗太多啦。

話晒我都係借個膊頭俾人瞓啫，人哋開心咪ok囉。

自此之後，每次阿盈一見到我喺細房温書，就會入嚟借我個膊頭瞓覺。





我都已經分唔到到底係佢做嘢太忙，忙到冇時間休息，定抑或真係有渴睡症……

話時話，其實阿盈真係對我好好，平日喺屋企或者學校有咩唔開心，我都會揾佢傾訴下。

可以話係除咗小雲之外，我喺呢班最熟嘅朋友。

咁當然啦，除咗傾唔開心嘅嘢，我哋平時都會keep住傾閒計。

講下同學啲八卦嘢，又講下老師啲壞話，呢啲嘢就當然少不免啦。

除此之外，阿盈仲會教下我啲世史。

升咗上中三一個學期，開始發現自己係完全唔適合讀文科。





頭嗰次中史同世史測驗差到不得了，差少少就已經唔合格，證明自己真係唔係呢方面嘅材料。

希望有阿盈教一教我，啲世史會進步少少啦。

哎呀，講得有啲遠添。

我哋返返去啱啱嗰個問題，到底應唔應該同阿盈講自己嘅感受呢？

我覺得，其實我對阿盈……

都係唔好再喺心入面諗，直接同阿盈講好似好啲。