「有你陪我一齊行返去,我真係好開心㗎。唔係因為有女仔陪我行所以開心,而係因為陪我行嗰個係你咋......」我細細聲對阿盈講。

「車仔……你凍到傻咗啊……快啲返去休息啦……」阿盈耷低頭講。

唔通係我講得唔夠直接,所以阿盈以為我講笑?

「我今次係認真講㗎」我回應阿盈。

「乜你真係鍾意我咩?」





「我諗,呢種感覺應該係叫鍾意掛……」

「你係咪諗清楚㗎?我唔想你亂咁做決定,到時盞大家唔開心」

唔理喇,我覺得我應該係鍾意㗎喇。

「係,我哋一齊啦,我唔會後悔㗎」我自信地對阿盈講。

阿盈咩都冇講,只係行前幾步抱住咗我,我亦將阿盈抱入懷中。





唔知過咗幾耐,阿盈放低咗喺我背上嘅雙手。

「行啦車仔,就快1點喇。再遲啲走,我返到去就天光喇」

「不如我送你去搭車啦,你呢到返去仲要成個鐘㗎」我對阿盈講。

「但係我想陪你行耐啲喎,話晒今日都第一日一齊,俾我陪下你啦〜」阿盈一邊搖我隻手一邊講。

見到咁樣嘅阿盈,我有得唔聽佢話咩……





係男仔都會心軟啦。

「咁好啦,今次咋〜」我將由就咁拖住嘅手轉成十指緊扣。

阿盈亦用佢嗰隻喺另一邊嘅手,將頸巾嘅另一端繞到我頸上。

由細到大都冇試過同女仔繞埋同一條頸巾,有少少緊張添……

「做咩好似咁驚我啊,你唔企近少少點繞啫」阿盈笑住咁講。

喺行緊返去嘅途中,阿盈問咗我一樣好古怪嘅嘢。

「其實你有冇鍾意過小雲?」阿盈好認真咁問我。

「做咩會咁問嘅??我只係當小雲係我好朋友咋,同埋佢好似已經有人追?」






「我都只係好奇問下咋。係呢,我諗追佢嗰個應該係Simon?」

「我都覺得係呀,最近小雲都少咗揾我,更何況佢兩個又好似行得好埋咁」我回應。

「我哋兩個夠係行得好埋啦,又唔見你一早應承我〜」阿盈扁起嘴同我講。

又會咁都可以拉埋嚟講嘅……

「咩喎,都唔同情況!!」

「但係你又講唔到邊到唔同喎〜」阿盈講笑咁講。

我用唔滿意嘅眼神皺起眉頭望住阿盈。





「唔好咁樣望住我啦,我都會驚㗎,第一日就咁樣望住我……」

「係呢,你諗住我哋段關係公唔公開俾大家知㗎?」阿盈突然問我。

Um…… 公唔公開有咩分別呢……

「其實拍拖係咪唔可以俾老師知㗎?」我問返阿盈。

「其實係㗎,不過啲老師都懶得捉㗎啦,除非你做啲過好過份嘅事啫〜」

咁好似都幾麻煩喎……

「但係我見阿天同雯雯兩個成日都喺學校拖晒手咁㗎喎」

「你好想喺學校好似而家咁拖住我行咩?」阿盈問我。





「點會唔想……都要可以先至得㗎」

「啱啱先一齊就想咁痴纏,遲啲仲得了嘅〜 不過我唔想喺學校俾你拖喎〜」

吓…… 乜唔係兩個人拍拖就係拖下手關心下對方咁㗎咩。

「點解啊?」我疑惑地問。

「因為〜 我唔想俾你拖囉〜」阿盈笑住咁一下fing甩咗我隻手。

又要一齊又唔可以拖,到底係阿盈咁古怪定所有女仔都係咁古怪㗎。

「咁唔好拖囉,我走㗎喇〜」





「喂呀,咁小氣㗎〜 」阿盈即刻跑前幾步拖返住我。

又話唔拖,女人真係變得快。

「你知㗎啦,我喺學校又要做prefect,又成日要見啲老師又剩,一陣俾啲老師問我呢樣嗰樣,咁就麻煩啦〜」

「當幫下我啦,最多一出學校我就俾你拖喇〜」阿盈嘗試氹返我。

「你話㗎!」
已有 0 人追稿