《再見了，還會再見嗎？》: 第55章 – 綵排

「車仔，你今日放學之後會唔會落去温書丫？」小雲擰轉頭問我。

「我約咗阿盈啊……我哋下次再一齊温啦」我回應佢。

其實我有諗過同小雲講，我已經同阿盈一齊講㗎。

話晒佢都係我喺呢間中學比較熟嘅朋友。

雖然而家已經冇以前咁熟，但起碼都叫做係曾經最熟，或者係好重要嘅人啦。





不過算啦，既然阿盈又話諗住唔刻意講俾大家知，咁咪keep住地下情咁囉，反正我哋雙方又唔介意。

「咁好啦，下次再一齊温〜」

〜放學後〜

「阿盈，我行得喇〜」我行咗去阿盈個位前面等佢。

「你坐喺Choco個位先啦，我要填埋1A班張秩序表一陣交俾陳Sir啊」阿盈一邊寫一邊講。





「咩秩序表嚟㗎？」

「我做prefect守1A班嘛，所以咪要寫返佢哋今日嘅表現，再交上去俾訓導囉」阿盈回應我。

我睇一睇阿盈寫嘅嘢，

小息（一）：秩序良好，大部分同學都能保持安靜

小息（二）：某幾位同學特別嘈吵（1,2,24號），秩序尚可，有待改善





乜寫嗰啲嘢咁行貨……

「你寫得咁求其，陳sir收唔收貨㗎？」我替阿盈覺得擔心。

「得㗎喇，個個寫啲嘢都係咁上下，我都係跟住Sample背要寫乜㗎咋」

原來做領袖生咁鬼輕鬆……

「小雲，你寫完秩序表未啊？我一陣會見到陳sir，幫你交埋丫〜」阿盈擰轉頭同坐喺後面嘅小雲講。

「好呀，唔該晒〜」小雲將秩序表遞俾阿盈。

「幫我去locker拎本英文workbook得唔得啊？」阿盈問我。

「女朋友叫到，點會唔得啊〜」我喺阿盈耳邊細細聲講。





「喂呀，好痕丫〜〜〜」

「乜你都知好痕㗎咩〜」我笑返佢。

然後我除低書包行咗去locker嗰邊。

上咗鎖嘅……

「locker密碼係咩呀？」我嗌過去問阿盈。

「叫得你開，你知嘅〜」

我試咗0000呀，1234呀……
 




都係開唔到。
 
「你生日啊，咁都估唔到〜」阿盈當住全班面前話我知。
 
聽完之後好尷尬，邊有人set人哋生日做自己啲密碼㗎。
 
仲要真係開到……
 
我拎住本workbook行返去阿盈嗰邊。
 
「搞錯啊，咁大聲喺全班面前講……」
 
「乜你都識怕醜㗎咩〜」阿盈一邊講一邊笑我。
 
「幾好啊〜 俾大家都知你係我男朋友，宣示下主權都幾開心〜〜」




 
你喜歡就好……
 
跟住我哋兩個就落咗去禮堂。
 
打開門，同班嘅另外幾個同學已經早過我哋到咗。
 
再望下其他人，好多都係我唔識嘅人，但硬係熟口熟面。
 
「點解好似好多人都熟口熟面咁嘅」我問阿盈。
 
「咁緊係啦，你而家喺頒獎典禮綵排嘛，平時都係佢哋呢班人拎獎㗎啦。今次你自己都有獎攞啦」阿盈回應我。
 
「過嚟點名先啦」陳sir對企喺禮堂門口嘅我哋講。
 




點完名我就同阿盈行去一個角落頭等指示。
 
行過去嘅途中，竟然撞到Zoe。
 
都合理嘅，話晒佢都係成績好嗰班。
 
我對Zoe揮手say咗個hi。
 
但係佢好似望到我揮手都扮睇唔到。
 
唔應我都冇計啦，我又冇理由行過去問人做乜唔理我啫。
 
無謂搞到大家都尷尬。
 
「乜你都識Zoe㗎咩？又會同佢揮手嘅」阿盈問我。
 
「我中一嗰陣同過佢同班嘛」
 
「係喎，我都差啲唔記得添，仲以為佢前兩年都係我嗰班」
 
睇落Zoe好似好孤獨咁嘅，身邊又冇咩人同佢傾偈。
 
唔知佢喺呢一年發生過咩事呢？
 
「係呢，Zoe上年喺你哋嗰班係點㗎？」
 
「差唔多齊人喇，大家行返過嚟我前面聽我講解下一陣個流程先」陳sir揸住支咪對所有人講。
 
「我哋都過去先啦，一陣完咗綵排我再話你知啦」阿盈回應返我。