《再見了，還會再見嗎？》: 第56章 – 過去的時光
完咗綵排我就同阿盈去咗學校附近嘅一間糖水舖。
「做咩一時興起想食糖水嘅？」
「因為覺得同你一齊唔夠sweet，咪揾啲甜嘢滋潤下囉〜」阿盈一邊meet住我塊臉一邊講。
咁嘅理由都有嘅。
「食甜嘢邊到滋潤到㗎……」我無奈地回應。
「咁你覺得要點先滋潤到啊〜」
「我點知你，明明都冇唔sweet」
「你話冇就冇㗎喇咩，明明你都冇做過咩表示」阿盈皺起眉頭質疑我。
「唓，你夠冇啦，仲話我〜」
講開又講，我又好似真係冇為阿盈做過啲咩。
星期六同日我又要去探婆婆同嫲嫲，搞到都冇時間同阿盈出下街。
不過我諗阿盈應該唔會介意掛，因為佢都知我平日weekend忙，應該會體諒我嘅。
「係喎，你啱啱係咪想問Zoe啲嘢？」
「係啊，講唔講得㗎？如果係秘密嘅話，可以唔講都得㗎喎」我對阿盈講。
「有得咩秘密啫，更何況係我嘅秘密都可以話俾你知啦〜」
「你想知咩方面先」阿盈問我。
「盡量講多啲啦〜〜」
「你有乜理由叫自己女朋友講其他女仔嘅事俾你知㗎」阿盈扁起嘴問我。
又係喎，咁樣好似有啲唔係幾好。
「Sorry……」
「你係咪對人有不軌企圖啊？」阿盈追問我。
「我真係冇㗎，你唔好嬲啦…… 只係曾經同Zoe都叫熟過一排，所以先想知啫」
「玩下你咋嘛，你想知我咪講囉，我似咁易就呷醋嘅人咩？」阿盈喺枱底踩一踩我隻腳。
點止似會呷醋，直頭係真係會呷醋添啦……
我當然冇講出嚟俾阿盈聽啦，想俾人打死咩。
不過循例都要講句反話和應下嘅。
「唔係…… 邊似會呷醋呢……」
「假到死！！咁我由佢轉入我哋嗰班開始講起啦〜」
「咁佢一開始轉入我哋班嘅時候，就當然係一個人都唔識啦。然後其他人又識咗已經成年，咁佢融入唔至我哋都好正常嘅」
「但係我同小雲轉咗入你哋班都融入到你哋喎」我回應阿盈。
「點同呢，而家有差唔多三分一同學都係由其他班轉入嚟，咁大家當然都會friendly好多，同想識下新朋友啦。再加上你原本就識阿天，如果唔係邊會同我哋熟到」
「都啱嘅…… 咁跟住呢？」
「跟住我諗應該就係佢鍾意咗Simon啦。咁嗰排佢兩個就行得好埋嘅，最後有冇真係一齊過我就唔清楚喇，總之就係行得好埋啦」
「跟住Simon又係衰嘅，明明唔鍾意人，但又成日陪住人哋，搞到Zoe誤會之後仲同佢表白」
「人哋同佢表白完，佢仲要周圍同人講，搞到有半班都知咩事，鬼死咁尷尬」
估唔到Simon真係衰人嚟，唔知小雲同佢如果真係一齊嘅話會點呢。
「不過Simon之後都知衰嘅，係咁叫我哋幫手解決，所以咪開咗我哋嗰個group囉。但係都太遲啦，我哋鬼識搞咩，之後咪唯有屈佢對某個女仔有興趣囉」
原來背後有啲咁嘅原因。
「Simon其實有個讀緊小學嘅細佬嘅，咁屋企好自然就會叫哥哥幫手湊啦。平日佢都係同細佬食完早餐，送埋細佬返小學先再到自己返學嘅」
「所以我哋從來都約唔到佢一齊食早餐㗎，你而家明點解啦」
乜背後原來有咁多事發生咗。
「哦，咁其實佢都唔係咁衰啫……」我回應。
「如果佢真係咁衰嘅，我哋都唔會仲同佢咁friend啦。不過Zoe又真係慘嘅，之後搞到一班對Simon有興趣嘅女喺到圍埋笑佢同玩佢」
「原來喺精英班都有發生啲咁嘅事㗎？」
「點會冇，啲勾心鬥角比你想像中仲多，只係大家唔會好似啲差班咁郁手啫」
啫係講緊我嗰陣嘅事啫……
我諗阿盈都唔知我經歷過嗰啲嘢。
唔同阿盈講啦，又唔係咩開心事，而且都已經過咗咁耐。
「做咩唔出聲啊？你以前都俾人蝦過？」阿盈擔心地問。
乜我咁易就俾人睇穿㗎咩。
「哦…… 冇咩嘅，諗返以前少少事啫」
阿盈行咗過嚟攬住我。
再細細聲同我講
「冇事㗎……」
同呢一刻嘅內心相比，係前所未有嘅温暖。
「我冇嘢啊……」
「你咁嘅樣都話冇嘢，講笑咩」
「俾你攬完冇事喇，你繼續講故事啦」我望住阿盈笑一笑。
「咁我繼續講㗎喇〜」
「咁啱啱講到Zoe就俾班女仔蝦啦。喺跟住嘅幾個月，全班都係冇乜幾多人理佢，得佢個隔離位同佢做咗朋友。坐佢隔離個女仔原本就係嗰種冇乜朋友，又好難相處嘅人，所以佢兩個可以熟到都係好事嚟嘅」
「嗰陣佢嘅成績亦因為呢件事所以跌咗少少，不過都仲有頭五，我都幾佩服佢咁都仲有心情温書」
原來嗰陣就係因為咁，所以先成績差咗。
「見佢而家都好似冇事啦，今個學期都拎到級第二」我對阿盈講。
「都係嘅，但睇落佢都好似都冇乜人理咁。雖然我同佢唔係好熟啫，但都想佢有好朋友陪佢嘅，可能係出於同情心掛」
「嗰陣見到班女仔有意無意咁杯葛佢，但我又乜都冇做，諗返都有啲漸愧」
唉，不過我都明。
又會有幾多人肯為一個同自己唔熟嘅人挺身而出呢，所以都冇得怪阿盈。
「冇咩嘅，我覺得時間耐咗就自自然然會冇事㗎喇〜」我回應。
「嗯，都係嘅。估唔到你都有經歷咁多嘢」
「過咗去啦都，而家咁樣咪開開心心〜」
「見到你識笑返就知你應該冇事喇」阿盈meet一meet我塊臉。