人要惡過車！: 第四十章（06/07/2020 Updated Version）

我哋嚟到Megabox間大眾書局出面，見到大排長龍。

「咁多人嘅？」堯問。

「唔知喎。」

「唔好意思呀，兩位請去嗰邊排隊呀？」書店職員行過嚟。

「唔該我想問嗰邊係排緊咩？」





「嗰邊係新書簽名會呀。」書店職員答。

「咁如果淨係入書店呢？」堯問。

「咁喺另一邊就入到去㗎啦。」

「唔該。」

我同堯行入去書店，隱約聽到出面講緊咩「法拉利公子」？「法拉利作家」？





我心諗：咩怪名嚟㗎？

「諗緊咩呀？」堯拍一拍我個頭。

「無呀。」

「咁呀，同我去睇吓啲食譜啦。」

「哦，好呀。」





我哋行咗去放食譜嗰個書櫃度，堯隨手攞咗本講整蛋糕嘅書嚟睇。

「不如整蛋糕囉？」堯問。

「依家？」

「玩呀？係都返屋企先啦。」

「哦～好呀，橫掂屋企有個焗爐喺度。」

「唔整要焗爐嗰啲啦，咁煩。」

「咁整芝士蛋糕？」

「醒咗喎。」





「不嬲咁醒嘅，噗。」我自己講完都忍唔住笑。

「無你咁好氣呀哈哈⋯去買材料啦。」堯放返好本書。

「喺度買？定返屯門先？」

「咁一陣返屯門先買啦。」

我拖著堯走，離開嗰陣見到個熟悉嘅身影坐咗喺度。

「乜你就係拉利公子呀？」

「喂，講哩啲。」





「都唔記得大作家你揸法拉利添。」

「唉唔好提啦，上次唔小心炒爛咗呀。」

「人無事先做到世界冠軍㗎嘛。」

「屌你啦。」

「咁你依家點呀，拎咗架車去整？」

「整乜鬼呀，換過架咪算。」

「換咗架咩？」

「488喳嘛。」





「屌你真心咩？」

「梗係啦。」

「哦～唔阻你啦，下次見啦。」

「喂好啦，阿嫂bye bye啦。」

堯揮一揮手，之後佢就收到Jenny電話。

「喂，堯呀，我同細佬要同屋企人食飯，我哋走先啦。」

「哦，好啦Bye。」