人要惡過車！: 第四十二章

我同堯行咗去西貢碼頭個海邊，咩都無講，望住個海。

過咗一陣，堯開口講嘢。

「講，你係咪諗住頭先嗰個女仔？」

我知佢唔係認真嗰種口吻，純粹係為咗個場面無咁尷尬

我笑咗笑，擰擰頭。





「咁諗緊咩呀？」堯溫柔咁問。

「頭先個女仔行埋嚟嗰吓，我心寒咗寒，唔通我真係唔夠佢快？」

「乜咁㗎你，長他人志氣滅自己威風。」

「但係頭先佢真係好快㗎。」

「你係我心目中最快就得啦。」堯攬住我講。





我一邊微笑，一邊掃同摸佢個頭。

「好啦，返屋企整蛋糕啦。」

「行啦。」我同堯行返去攞車。

今次唔出返九龍，行西沙公路去馬鞍山。不過西沙公路又係啲爛到仆街嘅路嚟，都係揸返慢啲好。

出返烏溪沙，上馬鞍山繞路，咁未到夜晚，所以未有人喺度飛，我揸返70啦都係。





繼續行大老山公路，之後上返沙瀝公路，落返沙田圍，直行去沙市，轉返落城隧。

其實我都唔知點解自己咁行，不過是但啦。

城隧直落就象鼻山路，再落屯門公路。

唔洗一陣就返到屯門市中心，泊好車，去超級市場買嘢。

我推住架手推車，堯就喺前面行。

「整蛋糕要咩材料㗎？」

「我未整過，唔知喎嘻嘻。」

「吓？哈哈。」我喺度笑。





「煮飯就識啫，甜品未整過喎嘻嘻。」

「咁依家點呀？」

「咁等你生日先整啦，今晚想食咩呀？」

哩個女人真係話轉就轉㗎喎，好彩我load得切啫。

「未諗到喎。」

「我比五秒你，你同我決定好。」堯無啦啦認真起嚟。

「5」





「吓」

「4」

「er⋯er⋯」

「3~」

「諗唔到呀。」

「2~」

「頂。」

「1，講啦。」





「er⋯磨菇長通粉啦。」

「好啦嘻嘻。」

我好慶幸自己避過一劫。

最後我哋買咗包長通粉，一包磨菇，一枝香檳。

點解買香檳，我都唔知喎。

返到屋企，堯換咗套屋企瞓覺衫，之後去咗煮飯。我就好似個廢人咁瞓喺張床到，好快就瞓着咗。

唔知瞓咗幾耐，堯就叫我起身。





「起身食飯啦。」

「嗯⋯⋯」

出到廳，枱面上放住兩碟長通粉，同兩杯香檳。

講真碟長通粉係好好食。

「好唔好食呀？」

我一路食，一路點頭。

「咁就好啦嘻嘻。」

之後食完嘢就一路睇下戲，一路飲香檳。

「你塊面紅曬喎。」我督一督堯塊面。

「係咩？」

「係呀，好得意呀哈哈。」我喺度傻笑。

「哼，唔理你呀，我去沖涼呀。」

淨返我一個，我自己行返入房，又唔知瞓咗幾多個鐘。