眨下眼就夜晚九點幾,我接咗阿堯。

「點呀,玩得開唔開心呀。」

「嗯。」

咕~

「睇死你飯都唔食去練車啦,我買咗嘢比你食呀。」





堯喺佢個袋度攞咗幾個迷你腸仔包,之後餵我。

我早咗兩三個字到西貢,停埋一二邊等嗰個女仔。

十一點整,MX5嚟到,停喺我前面。

「好準時喎。」個少女話。

「大家咁話,想點鬥?」





「咁心急做咩啫?」

屌,點撚樣呀?

「唉,唔玩你啦,一陣間去到西貢公路迴旋處我會打死火燈,之後就會出盡全力,你無比我放星星嘅話當你贏啦。」

「就咁話啦。」

跟住架MX5轉返出西貢公路,因為凌晨嘅關係,條路無咁多車,雖則架MX5未出盡全力,但都已經幾快下,但要跟都無咩問題嘅。





就喺過咗匡湖居附近條白色橋之後,嚟到迴旋處,而前車嘅死火燈亦閃起嚟。

轉上新西貢公路,MX5突然加速,我本能反應踩地板油,架車可能進入咗工作溫度,反應比日頭嗰陣快咗,加上改完之後轉數升得快咗同可以再上高啲,要追貼MX5都未係問題。

喺哩度我不得不佩服MX5真係好力嘅,即使上斜都唔會腳軟;相反我架得千六嘅思域,無錯係追得貼MX5,但係真係要谷盡架車,下下爆轉先得,顯然係有啲吃力嘅。

西貢公路叫追得貼啦,之後上橋去清水灣道,落橋後接住嚟嘅係幾個連續彎位,唔知前車太快,定地下有油積,MX5冼咗冼,出彎慢咗,我可以襯機再癡貼佢少少。

難得安達臣枝燈順燈,我推住佢落新清,好好彩咁順利枝燈都綠緊,新清直落彩雲,我抽咗過左線,踩到盡架車,同架MX5平排咁衝住落,電光火石之間,白虹樓巴士站枝燈轉紅,MX5即刻收油,而我無咁做,爬埋佢先重dup,咁叫勉勉強強停得切啦,我唔再跟住架MX5,帶頭嘅變咗係我。

轉燈後,路口前面有個避車處凹位,我打死火燈泊埋去,MX5就跟住嚟。

一落車,個妹妹竟然企咗喺後面喊。

大獲啦,做咩無啦啦喊?





我叫埋堯落車,行去個女仔度,個女仔即刻攬住堯喊,我就企喺側邊。

喊咗一陣之後,個女仔細細聲同堯講嘢。

「做咩呀?」我做口形。

「我同佢傾傾。」堯用返口形答我。

「小心啲。」

堯擺出ok手勢之後就上咗MX5,而我哩啲懶人就梗係上返車瞓。

過咗半個鐘,堯就返咗嚟。





「好啦,返屋企啦。」堯話。

「嗯,係喎個女仔無事嘛?」

「做咩咁關心人哋?」堯無啦啦認真。

「er⋯er⋯」

「哈哈,無事啦佢,見到你個驚樣就覺得好好笑。」堯笑返。

「妖!」

「唔好嬲啦~」

「哦。」





「再嬲我唔理你㗎。」

「好啦,唔嬲啦。」

「嘻嘻~」

「係喎我都未問個女仔叫咩名。」

「你聽日自己問佢啦,佢約咗我食飯。」

返到屋企,堯去咗沖涼,阿爸就坐喺梳化睇電視。

我喺度諗:究竟千六係咪真係唔夠做?真係要換車?





「諗乜鬼嘢呀你?」阿爸話。

「諗緊遲下洗唔洗換車。」

「架車唔好揸咩?」

「好似唔係好夠快,上斜有啲腳軟。」

「咁你想換咩車?」

「未諗喎。」

「咁呀,就嗰架囉。」阿爸指住電視嗰部車。

「唔~都幾好嘅,睇吓有咩放盤先。」

與此同時,堯沖好涼出嚟。

「好去沖涼喇你,唔係唔比你入房。」

「哦。」

之後就沖涼瞓。
已有 0 人追稿