人要惡過車！: 第四十六章

星期日訓到中午先醒，行出房見到阿媽同堯邊煲劇邊傾計。

我行去廚房飲水，後面突然有人攬住我。

「唔係睇緊劇咩你？」

「入嚟攞嘢飲嘛。」堯打開雪櫃拎咗枝茶出嚟。

「你記得今晚約咗人食飯㗎呵？」堯接住講。





「吓，約咗邊個呀？」

「我尋晚先同你講完，咁快無咗件事？」

「真心唔記得喎。」

「屌你真係金魚嚟㗎喎。」堯反我白眼。「約咗尋日個女仔呀。」

「好似係喎，佢未講佢叫咩名。」





「乜你好想知人哋叫咩名咩？」堯準備好隨時拔出刀架嘅菜刀。

「唔係，你可以放返低把刀先。」

「好啦，咁你做自己嘢先啦。」

之後我返房睇吓換咩車好，之後收到耀哥電話。

「喂僖仔有架平靚正嘅車喎，幾時嚟睇吓？」





「咁呀，今晚九點啦。」

「好，一陣見。」

睇吓片，瞓吓覺，咁就五點幾。

「換衫啦。」堯開門入房。

「哦。」

我換好衫之後，堯喺我面前換，我即刻咪埋眼。

「你喺度做乜呀？哈哈」堯笑。

「你快啲換啦。」





「我未驚你驚啲乜啫，嘻。」

「快啲啦。」

「換好啦。」

堯今日着牛仔褲加件普通T shirt。

正當我哋着好鞋，準備出門口，阿爸叫住我。

「仔你今晚幾點返？」

「唔知喎，十一點掛。」





「就返到嗰陣打個電話嚟啦，我借一借你架車用。」

「哦。」

之後落停車場攞車。

「其實約咗喺邊度食飯？」

「朗豪坊。」

「ok」

出到旺角，泊好車，六點半左右。

我哋去咗一間食韓國嘢嘅餐廳，無幾耐之後個女仔都嚟到。





「Hi」堯話。

個女仔點點頭。

我心諗：喂，係咪同一個人嚟㗎？上個禮拜寸過馬撚，今個禮拜成個人變曬？

個女仔坐低之後一直都唔係好敢講嘢。

「話說其實你叫咩名？」

「吓？」佢好似有啲驚訝。

「咁你話我贏咗之後同我講嘛。」





「我叫Ophelia。」

「哦～幾好聽呀。」

「多謝。」Ophelia微笑。

「笑下咪幾好，唔洗驚同人相處㗎喎。」堯話。

「嗯。」

之後成餐飯都有傾有講，有講有笑。

原來Ophelia由細到大都得自己一個，唔識同人相處，所以扮到好有敵意，等其他人唔敢埋佢身。

而上次喊係因為佢一直以嚟都係贏曬佢所挑釁嘅人，一時接受唔到輸嘅事實。

好彩嘅係堯開解咗佢，唔係嘅話應該好大件事。

「好啦，我返屋企先啦，下次見啦。」Ophelia話。

「Bye bye」我同堯話。

「原來八點幾㗎啦。」我話。

「係呀，做咩呀？」

「我約咗耀哥九點喺佢車房等。」

「哦～咁行啦。」