人要惡過車！: 第五十八章

時間眨下眼嚟到星期五。

「啱啱先食完飯你又去邊呀？」堯問。

「同朋友食糖水，你嚟唔嚟？」

「唔啦，攰呀。」

「Ok」





出當我要出門口嘅時候，堯叫住我。

「喂。」

「做咩？」

「揸車小心啲呀。」

「係啦，我走啦。」





我一個人揸車嚟到黃金海岸，見到唔只兩架RX7，仲有上次南生圍見到嗰架AE86。

「Hi。」

「嚟咗啦。」Ben話。

「Hi。」Hugo話。

「嗰邊架86係？」





「佢行緊過嚟啦。」Hugo話。

迎面而來嘅係一個少女，上身着一件長袖灰色毛衣，下身着一條黑色半截裙，孭住一個手袋仔。

「Hi，你就係阿僖？」

「係，你識我？」

「之前聽過下，我叫Ella。」

我想講嘅係呢，個女仔幾有禮貌。

我哋喺黃金海岸傾咗陣，就揸車去食糖水。

食食下，我打電話比堯。





「喂。」

「喂，食唔食糖水呀？」

「好呀好呀。」隔住電話都知道佢係有幾興奮。

「食咩呀？」

「我要芒果西米露。」

「Ok，係咁多啦嘛？」

「嗯，唔該曬～嘻嘻。」





收線之後，佢哋三個望住我。

「估唔到你係愛妻號嚟。」Hugo話。

「你無機會嚕～」Ben對住Ella講。

Ella立即露出一個黑人問號表情。

「講笑喳。」Ben話。

「你咁衰嘅，喺度玩佢，哈哈～」

車聚就喺一片笑聲中結束，而我就帶住碗芒果西米露返屋企。