人要惡過車！: 第七十章

過咗幾日，堯姐話要幫曉彤同佢同學補習，而事實上我根本唔記得邊個叫曉彤，不過唔緊要，耀哥話架FD2執返靚仔，叫我出去攞，所以我同堯姐就搭車出荃灣。

「我行嗰邊啦，一陣間見啦。」説罷堯姐就行去荃新天地，而我就獨自一人行去耀哥車房。

行到去，架車放咗喺車房入面，而耀哥就幫上次架白色AP2換緊偈油。

睇嚟個車主幾有錢，揸S2000。

「嚟啦，你自己睇睇架車先。」





「Ok。」

架車基本上無乜大改變，係換咗條尾泵把，同埋隻尾翼兩邊多咗張白兔公仔貼紙。

「哩條尾泵把係？」

「無記錯無限嘢嚟，我都係喺劏車場搵返嚟。」

「咁舊嗰條？」





「擺住喺度先，幫你整好之後放喺度做士啤件啦。」

「咁尾翼嗰兩張貼紙咩嚟？」

「唔知喎，唔係你女朋友話癡上去㗎咩？」

「吓？乜有啲咁嘅事？」

我懷住一個疑惑嘅心情走去Whatsapp堯姐。





「B呀。」

「做咩呀？」

「嗰兩張兔仔係妳話癡㗎？」

「係呀，係咪好Cute呢～」

咁尾翼有兔仔係幾得意，幾好笑嘅。

「Ok啦，係你話癡嘅就無問題啦，我泊好車嚟搵妳啦。」

一如既往，整車嘅費用耀哥直接問阿爸收，所以我拎返架車就走得人。

去到荃新天地個停車場，竟然比我見返撞我嗰架車。佢泊咗喺月租車位，而正正係爆咗盞左頭燈。





「睇嚟九成九係佢無錯啦。」我係車度自言自語。

泊好車，我求其喺車度搵張紙，諗住寫便條放喺撞我架車度。


星期六晚十二點汀九停車場等，唔好諗住撞完車可以就咁走咗去。

比你撞嗰架FD2。


確定攞水撥夾好張字條，同埋影咗幾幅相之後，我就去咗搵堯姐。去到見到耀哥嗰女，先醒起堯姐好似叫過佢，乜原來佢就係曉彤。而坐喺隔離嘅應該係一個同曉彤同齡，及肩短髮，戴畫家帽同圓框眼鏡嘅女仔。

「唉，你嚟得啱，快啲幫吓手。」





吓，我唔係好想用腦喎。

「快啲啦～最多一陣請你食糖。」

乜你覺得我有得簡咩⋯⋯

「嘻。」

快快手搞掂令堯姐苦惱嘅數學，佢哋哩堂都完啦。

「哩度係學費，姐姐妳數吓啱唔啱。」果然係個文青女仔，講嘢都陰聲細氣過人。

「啱啦。」

「咁姐姐我哋下個禮拜見啦，ByeBye。」





「Bye」

佢哋兩個走咗，得返我同堯姐喺度。

「B呀？」

「唔？做乜呀？唔鍾意兔仔貼紙呀？」

「唔係呀？」

「咁做乜呀？神神祕祕咁。」

「我啱啱見返撞我哋嗰架車。」





「吓，咁你點呀？」

「我攝咗張紙仔，叫佢星期六凌晨喺汀九見。」

「吓，就咁喳，你覺得佢會嚟咩？」

「唔知㗎，一於睇吓點囉。」