人要惡過車！: 第七十一章

時間一跳嚟到星期六晚，我約埋阿皓喺佢屋企樓下等，一齊去汀九，起碼叫有個照應。

「搞掂，行啦。」

我揸FD2車住堯姐，而阿皓架M3就跟喺我尾。喺十一點五十五分去到汀九。過咗五分鐘，果然有架單眼嘅車揸入嚟。之後佢停咗喺度，熄匙行落車四周圍望。

「就係你撞我？」睇佢纖瘦嘅背影，唔多似係男仔喎。

「對唔住呀，對唔住呀。」咪住先，把聲好似邊度聽過嘅？





「你冷靜啲先啦⋯⋯」

「對唔住呀，對唔住呀。」中咗Bug？做咩係咁重複？

我叫堯姐落車幫手，因為我真係搞唔掂⋯⋯

「小姐，小姐。」

「對唔⋯⋯」佢由望地，昂高頭，繼而露出個驚恐嘅表情。





「姐姐對唔住呀⋯⋯ 我唔係有心㗎⋯⋯ 」

「係妳？」堯姐好驚訝。

哦～原來係文青妹妹⋯⋯ 唔係喎，乜佢唔係同曉彤同齡㗎咩？

「Cherry妹妹妳嗰陣做咩走咗去呀？」

「我⋯⋯ 驚會比人拉⋯⋯ 」文青妹妹眼濕濕咁講。





「唔？」睇嚟堯姐唔係好明。

「你試諗吓佢幾多歲。」我細細聲喺堯姐耳邊講。

「哦～我明啦。」

「妳自己一個人嚟？」

「嗯。」

「妳唔驚啲衰人綁走妳咩？」

「咁件事始終係我錯先⋯⋯」

哩個係咩嘅思考模式⋯⋯ 如果係啲MK仔，阿女妳連渣都無得淨㗎⋯⋯





「Cherry妹妹妳做咁曳呀，咁架車邊個㗎？」

「我Daddy⋯⋯ 比佢知架車撞咗一定鬧死我⋯⋯ 」

不如妳試吓唔好喊，我好驚女仔喊。

「咁我哋同妳整返架車，不過妳要話曬成件事比我知㗎喎。」

「嗯。」

堯姐安慰文青妹妹，我就睇吓架車。

「既然係咁，我哋車返妳返去先啦。」





「嗯。」

喺開車之前，我Whatsapp阿皓。

「你一陣揸車跟住我啦，我依家打緊死火燈。」

「Ok。」

沿途堯姐同文青妹妹傾計，安慰佢。

「Cherry妹妹妳做咩咁大膽，偷偷揸架車出嚟呀？」

「因為我⋯⋯ 我覺得好刺激⋯⋯ 讀書啲壓力可以一次過舒發出嚟⋯⋯ 」

唉，又一個比讀書迫害嘅細路女⋯⋯





「唔～ 下次唔好啦～ 比人捉到好大件事㗎～ 」

「對唔住呀⋯⋯ 」

「好啦，無事啦，我原諒妳啦。」

揸返架車去文青妹妹屋企個停車場同送返文青妹妹返屋企，我哋就坐阿皓車返汀九，攞車返屋企。

「喂，唔該曬皓哥。」

「得啦，遲啲請飲嘢得啦。」

返屋企嗰陣同堯姐傾咗兩句。





「好彩Cherry妹妹唔係遇到啲壞人啫。」

「嗯。」

返到去，第二朝瞓醒打電話比耀哥。

「喂。」

「喂，耀哥。」

「僖仔？有咩事？」

「耀哥幫幫手，睇吓搵唔搵到盞DC5尾期左頭燈，同埋要翻噴條頭泵把。」

「好，我幫手搵吓。」