讀足六年，比人蝦足六年: 10.阿琪

10.阿琪

因為今日係旅行日，因為我同佢住得近，所以我就約左佢係佢屋企樓下等，然後一齊去。

我地今年嘅旅行日都係係石澳。

我一邊等佢，一邊望望周圍嘅風景，不知不覺就過左15分鐘，因為我就黎冇耐性，所以就拎左部手機出黎睇ig。

又過左10分鐘左右，佢終於落左黎...





「等左好耐啦？行得啦我地！」搞錯啊？遲左成差唔多半粒鐘都仲可以笑笑口咁行出黎，屈機！

「你次次都搞咁耐，我下次真係唔等你！等你自己去！」唉...我次次都係咁講㗎...但係冇一次真係唔等佢嘅。

「唉呀唔好嬲啦琪琪！」次次都係咁㗎你，不過咁friend又真係嬲你唔落...

「不過呢...」

「請嘢飲嘛，行啦！」佢打斷左我講野，今次又會咁順攤都有嘅？





婷婷好闊佬咁請左我去飲Starbucks，其實我本身都冇嬲過佢，而家仲請我飲Starbucks，又真係冇咩理由嬲你嘅...

「再有下次就唔係一杯Starbucks咁簡單㗎啦！」我邊講邊扮嬲。

「得啦得啦！冇下次㗎啦，最多你早d叫我咪得囉。」佢邊擺出「講呢d.jpg」嘅表情，一邊對我講。

我地飲完，就搭巴士去大澳，過左大約一粒鐘，我地都終於到左大澳燒烤場。

因為班會果邊已經搞掂曬食材、碳之類嘅嘢都唔洗我地負責，即係我地係咩都唔洗我地做，有冇覺得好嘆呢？





我地攞左少少野食去燒，然後就坐係石凳度等食。

「喂！阿琪，阿婷！」又係呢個劉進恆，呢條友正一狗公，成日都煩住我同婷婷，有時仲借d意摸我，好彩婷婷每次都會阻止佢...

「又咩料啊狗公？」婷婷率先開口，嚇到條狗公口窒窒。

「哦...冇....諗住問下你地食咩姐....」有冇咁好心啊你？

「唔洗啦，我地燒緊啦。」為左令佢走開我就是但搵個藉口叫佢走，更何況我地真係有嘢食。

「咁我過去沙灘坐住先，你燒完就過黎一齊食啦琪琪！嘿嘿...」婷婷講完就走左過去沙灘坐，擺明係想偷懶姐！

我燒完幾隻雞翼同一d粟米之後就過左去搵婷婷。

點知....





我就見到佢同臨子廷係度傾緊計....唔知佢地有冇提起過我呢？

「點...點解你係度嘅？」我扮驚訝咁，因為我唔知應該講d咩好....其實佢地班都會黎呢度，佢又一向冇咩friend，自己係呢度又有咩出奇呢？我都尚算了解佢啦...

其實我同佢之前發生過d唔係咁愉快嘅事....

應該點講呢...我當時真係冇諗過佢會同我表白....

我當下真係有d嬲佢，大家明明係好朋友！點解最後都係要搞到咁嘅地步啊？

但係我更嬲嘅係我自己，我應該一早就察覺到...佢嘅心意...

「我同朋友過黎坐下咋...我地而家走...」我覺得見到好尷尬，所以打算拉埋婷婷走...應該話我係度逃避緊？





點知婷婷就話想睇風景，叫我留低...

我坐係度同婷婷傾計，就留意到臨子廷，佢好似唔係過得咁好咁...應該話係我唔係佢身邊之後...？

到底我...係咪做錯左呢...？我嘅反應係咪大左少少呢？如果當時我選擇同佢講清楚而唔係就咁冷落佢，佢會唔會過得好d呢...

「喂！諗咩諗咁耐啊？」我想比次機會自己去補償...

「婷婷！你可唔可以幫我做一樣嘢？」係啦！有婷婷係度就ok啦。

「吓...點解你唔自...」

「不要問！」我打斷左佢。

「好啦...」婷婷啱啱講完就去同臨子廷講嘢。





之後婷婷就帶左臨子廷去同佢班friend理論，好似仲得左tim...

咁樣好似幫翻佢一次...就當係贖罪啦...

雖然唔知佢會唔會原諒我，我都冇諗過佢會原諒我，起碼而家我個心好過d先....

希望你會放低呢件事啦...