[愛情走糖故]兩個人心底中不為人知嘅秘密,成為兩個人間嘅牽引: 03.極端的風雲人物

兩個人同時一齊落車，夏巧莘行喺前面，並且故意急步行
跟喺夏巧莘之後落車嘅凌御生似乎都留意到呢點，於是即刻就跟上佢嘅步伐，行到夏巧莘隔離
「等埋我啦！」凌御生追上前，直接就將手攬過夏巧莘嘅肩膀，放喺佢肩膀上
「你唔好行到咁埋得唔得呀…」夏巧莘輕皺眉頭，「喺學校唔好同我咁close…」
「有咩所謂啫？」凌御生毫不在意咁問
「有所謂…」夏巧莘感受到喺四周圍嘅人都將目光投向佢地
兩個都係喺學校出晒名嘅人，但一個係校花，一個係不良學生，呢個係奇境嚟
凌御生外表都唔差，但係佢壞學生嘅形象已經深入民心，完全冇回頭嘅餘地
「你唔好咁樣搭住我博頭行好唔好…」夏巧莘郁咗兩郁，想甩開凌御生隻手
四周圍嘅人一邊行一邊望，就算已經經過咗佢地，都忍唔住回頭望兩眼


四周圍嘅人訝異嘅目光令夏巧莘渾身唔自在，但係凌御生就完全唔在意
「你介意啲咩啫？」凌御生微微彎下腰望夏巧莘
「介意同你行埋一齊…」夏巧莘稍稍瞄咗凌御生一眼
「即係你介意同我一齊行，但就唔介意同我Kiss？」「呀！」
喺凌御生講到後面嘅時候，夏巧莘即刻就嗌咗出嚟，仲要伸手掩住凌御生個口
喺佢地附近嘅路人、同校同學都瞬間望向佢地兩個
夏巧莘個心嚇到噗噗、噗噗咁快速跳動，好似下一秒就要跳出嚟咁，嗰種「刺激」程度可以媲美
凌御生瞇起眼偷笑，好似講緊「我係特登嘅」一樣
「你唔好亂講嘢！」夏巧莘注意到大家嘅目光，下一秒就縮咗手，仲要瞪咗凌御生一眼，然後細細聲又講道，「你唔好再亂講嘢…」
夏巧莘轉身就走，凌御生又再追番上去，又再伸手搭住佢肩膀


「但唔係事實咩？咁琴晚真係…」凌御生又再次口賤提起
夏巧莘立馬一個凌厲嘅眼神瞪住佢，凌御生即刻笑了笑
「咁真係有嘛！係咪先～而且我都未講交易嘅內容係咩～」凌御生唔知死咁繼續講，「你可係有把柄喺我手上喔～」
凌御生故意喺「把柄」兩個字上落重音
「你…！」夏巧莘咬着唇，心中恨不得一拳打落凌御生臉上，但為咗保持儀態而冇咁做，「咁你想點呀！」
「唔…」凌御生舉起另一隻手摸摸下巴扮諗緊點算，「未諗到喎～不過如果你唔咁抗拒我就好啦～」
「你唔好搞住我咪得囉！」夏巧莘經過咗企喺校門嘅訓導主任直走入校園
但凌御生卻比訓導捷住咗
「凌御生！攝好件衫呀！」訓導主任指住凌御生件衫
「係係係！」凌御生喺訓導主任旁邊轉咗兩個圈就直跑上樓梯


「凌御生！」訓導主任想叫都叫佢唔住
或者呢個就係夏巧莘唔想同凌御生一齊行嘅原因
…
放咗學之後，夏巧莘番到屋企做功課
屋企嘅大門傳嚟鎖匙聲，厚重嘅木門被推開
「家姐，我番嚟啦…」
一個著住同夏巧莘同一間學校校服嘅俊俏男仔行入屋內然後閂上大門
「番嚟啦？」坐喺餐桌前嘅夏巧莘稍稍抬頭
「嗯。」嗰個男仔將除咗落嚟嘅皮鞋放入鞋櫃
「做咩呀夏學謙，咁嘅表情嘅？」夏巧莘留意到坐喺自己對面嘅細佬突然臉色一沉
「你同嗰個凌御生好熟㗎？」夏學謙直問道
「吓…？唔係呀…」夏巧莘因為夏學謙咁樣一問，就抬起頭，把玩着手上嘅原子筆
「我啲friend話見到你兩個今日一齊番學，佢仲要攬住你博頭咁。」夏學謙問道
夏學謙咁樣一問，夏巧莘瞬間就心虛，然後不自然咁耷低頭，翹頭髮
夏巧莘嘅一舉一動，夏學謙都留意到，直覺話比佢知家姐有啲唔妥


「琴晚我冇嚟接你，係咪發生咗咩事…」夏學謙跟住自己嘅直覺行
咁樣一問，夏巧莘顯得更唔自在
「家姐你唔好再做陪酒啦！」眼見夏巧莘一副有口難言嘅表情，夏學謙皺起眉頭，更清楚知道一定係發生咗啲咩事

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link