[愛情走糖故]兩個人心底中不為人知嘅秘密,成為兩個人間嘅牽引: 10.親暱

「我地喺度食咪得囉～」夏巧莘轉身捉住夏學謙嘅前臂，「我都上到嚟啦～」
「家姐呀…」夏學謙一臉不爽，但又無可奈何
「你嗰晚打人我都未同你計…」夏巧莘壓低聲線，細聲同夏學謙講
凌御生望住夏學謙一臉得意咁笑，夏學謙心中更討厭呢個人
鍾家豪聽到之後就即刻望住凌御生
「打人？打你呀？」鍾家豪問道
凌御生笑而不語，只係指一指自己左邊臉頰骨
「我咪打得佢少。」夏學謙狠盯住一臉得意嘅凌御生，沉着氣講度
「夏學謙。」夏巧莘即刻就瞪住夏學謙，夏學謙即刻就收咗聲，夏巧莘好快又露出笑容，「坐低食飯啦～」
夏學謙同夏巧莘一齊坐企喺長櫈度


平日嘅飯盒都係夏巧莘朝早起身整嘅，夏學謙打開個飯盒，今日食蛋包飯配西蘭花同四條八爪魚腸仔
「你食咩呀？」凌御生企起身行去夏巧莘旁邊，夏學謙瞬間就瞪住佢
但夏巧莘喺度，夏學謙就唔可以當住佢面做啲咩
「今日食蛋～包～飯～」夏巧莘提高嘅聲線，一臉興奮
「嘩～有八爪魚腸仔！」凌御生望到被切成八爪魚形狀嘅腸仔，「你煮㗎？」
「嗯！」夏巧莘點點頭，凌御生好快速咁伸手從夏巧莘嘅飯盒中偷咗一條八爪魚腸就放入口
夏學謙同夏巧莘都呆咗一呆
「好唔好食呀？」夏巧莘露出溫柔嘅微笑問道
「好食。」凌御生點點頭，佢望到夏學謙仍然瞪住自己，然後凌御生又望住夏學謙，同佢對望
夏學謙努力沉着氣，盡量唔發火，控制住自己嘅拳頭同想打佢嘅衝動，一下子撇開臉


凌御生行番去鍾家豪隔離坐低，狀況外嘅鍾家豪望住凌御生坐低，然後又望去右邊，望向夏巧莘
「你兩個幾時咁熟㗎？」鍾家豪問
「呢幾日。」凌御生喺褲袋中拎咗包紙巾出嚟，小心翼翼咁開咗包紙巾拎咗一張用嚟抹手，「因為一啲小插曲囉～」
凌御生對呢個女仔愈嚟愈有興趣，好期待呢個故事會發展成點
…
「我仲有嘢要做，我落番去先。」夏學謙同夏巧莘講，然後瞄咗凌御生一眼，「你自己小心啲。」
「呃…你唔好咁啦～」夏巧莘苦笑道，「佢唔會做啲咩，你諗太多啦～」
「我落番去先。」夏學謙拎埋個飯盒企起身離開，臨走前仲要瞪多凌御生一眼，表達佢對佢嘅不滿
「咔嚓！」
等到聽到天台嘅門閂上咗之後，凌御生即刻就行到夏巧莘旁邊坐低


凌御生將部手機開至撥打電話嘅版面，然後遞比夏巧莘
夏巧莘彷彿都明白佢嘅意思，接過佢嘅手機，輸入咗自己嘅電話號碼
「改咩名好呢…」夏巧莘拎住凌御生嘅手機，雙手停咗喺電話嘅鍵盤上
夏巧莘嘟起嘴，微微鼓起兩泡腮，苦惱咁諗要改咩名
過咗一陣，突然靈機一動，迅速咁喺手機鍵盤打
夏巧莘打完之後，鎖上螢幕，然後將手機遞番比凌御生
「你笑咩呀？」凌御生望住夏巧莘嗰個微笑疑惑咁問
夏巧莘聳聳肩，然後喺裙袋中拎出自己嘅手機，同樣係開咗撥打電話嘅版面之後遞比凌御生
凌御生用指紋解鎖手機，望到聯絡人名稱嘅瞬間，終於知道夏巧莘做咩偷笑
「你改呢個名比其他人見到，我會好危險。」凌御生笑道
夏巧莘將自己嘅聯絡人名稱改咗做「Ella BB」，佢只係笑而不語
凌御生輸入咗自己嘅手機號碼，然後又到咗諗名嘅時候
「好啦～我又跟你咁改～」凌御生心諗，然後喺夏巧莘嘅手機中輸入「Aaron BB」
打完之後save咗，將手機遞比夏巧莘
夏巧莘望到呢個聯絡人名，低頭一笑，然後將手機放入裙袋，拎埋飯盒企起身


「我番落去先啦～」夏巧莘望住凌御生微笑道，然後細聲講咗句，「我地之後再見啦Aaron BB～」
凌御生有啲愕然，估唔到夏巧莘真係會咁樣嗌出口，但佢壓制住愕然，努力扮平靜咁比笑容
「拜拜～」夏巧莘回頭望向鍾家豪，揮揮手之後就繞過長櫈往天台嘅門行去

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link