[愛情走糖故]兩個人心底中不為人知嘅秘密,成為兩個人間嘅牽引: 11.不安

「佢真係又靚又好人…」鍾家豪望住夏巧莘嘅背影講道
「嗯…」凌御生嗯咗一聲
凌御生同鍾家豪一樣，望住夏巧莘離開嘅背影
燙直咗嘅校裙，利落嘅馬尾，完美嘅性格…
風吹過嘅時候，校裙嘅裙襬被微微吹起；行路嗰陣，長長嘅馬尾左右擺着
理想中嘅初戀，大概就係咁嘅樣…
…
放學之後，夏巧莘執好書包之後，行出課室，準備行上4樓等夏學謙一齊走
凌御生同鍾家豪二人踏出課室，就見到夏巧莘朝住樓梯跑去嘅背影
凌御生冇追上去，只係孭住書包同鍾家豪一齊行，但鍾家豪下意識咁望咗一望凌御生，正當想問點解佢唔追上去嘅時候，呢句話又吞番落去


夏巧莘行上4樓，男仔見到佢嘅時候，眼中好自然就射出帶着愛意嘅眼神
成個走廊瞬間變得鬧哄哄的，喺課室嘅夏學謙聽到外面鬧哄哄的，就知道係校花上咗嚟，有意無意間加快咗收拾嘅速度，拎埋書包行出去
一行到出走廊，就見到有一群男仔圍住夏巧莘，夏學謙都冇諗太多，直接喺男同學之間開出一條路，一手就拉住夏巧莘行出呢個圈
「我都話咗你唔好上嚟，喺課室等我㗎啦…」夏學謙鬆開咗手，然後沉着氣講道
「下次喺3樓等你啦，唔好嬲唔好嬲～」夏巧莘苦笑道
面對着喺夏巧莘身邊嘅狂蜂浪蝶，夏學謙從來都應付得嚟，綽綽有餘，但係…除咗凌御生之外…
夏學謙討厭凌御生嘅原因有好多，最大嘅原因，係因為凌御生係第一個直接走過自己，直接去到夏巧莘身邊嘅男仔
到底凌御生憑咩可以同夏巧莘行得咁近，近得連自己都冇辦法阻止？
喺腦海中諗到100種可能，但100種可能都唔可能發生
「今晚我唔洗番工，可以同你一齊去醫院探阿媽。」夏巧莘同夏學謙講


「嗯，好呀，宜家搭車過去。」夏學謙話
兩個人搭巴士去醫院，夏巧莘望住車窗外嘅風景，只有夏學謙一人坐唔安食唔落咁
「你係咪中意咗凌御生？」夏學謙開口問道
「做咩你呢兩日同我講咩都係關係凌御生㗎？」夏巧莘嘅視線離開咗風景，望向夏學謙
「你答咗我先。」夏學謙認真嘅模樣令夏巧莘愕然
「冇呀～」夏巧莘微笑道
「明明就有。」夏學謙不服氣道
「真係冇呀～只係…」夏巧莘嘅欲言又止，瞬間就引起夏學謙嘅興趣
夏學謙定睛望住佢，等待佢說話嘅下半句
「突然間有個咁嘅人知道咗我嘅秘密…有種難以言喻嘅心情啫…」夏巧莘微微耷低頭，淡淡嘅微笑掛喺臉上


喺夏學謙心中嘅不安感猛然提高，但佢仍然安慰自己，喺心中道：「冇可能嘅事，永遠都冇可能。以後都唔會…」
夏巧莘留意到夏學謙一臉嚴肅
「我拍拖係遲早嘅事嚟，但就算我拍拖，我同你永遠都係姊弟。」夏巧莘柔聲道，想緩和一下氣氛
但夏學謙默默咁拎起耳機塞入耳仔，貌似唔想再聽落去
「就算係咁…你身邊嗰個都唔會係凌御生…」夏學謙將想講嘅說話放番咗心底，冇講到出口
喺夏學謙嘅眼中，夏巧莘係個外剛內柔嘅家姐，自從爸媽離咗婚之後，默默咁擔起咗頭家
媽媽有胃癌入咗醫院之後，夏巧莘心知自己喺頭家嘅支柱，但要撐起一個家並唔容易
醫媽媽嘅病需要高昂嘅醫藥費，自己同細佬仍然讀緊書，再加上平日生活上嘅開支，每一樣都係錢…
逼於無奈要出嚟番工，要搵一份可以喺短時間內賺到錢嘅工，要面對住唔同嘅男人
由細到大，夏巧莘身邊基本上冇咩男仔，因為就算有，夏學謙一發現啲人對夏巧莘有咩過份行為，就會「自動擊退」呢啲人
宜家出現喺夏巧莘面前嘅人，夏學謙冇辦法「擊退」…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link