[愛情走糖故]兩個人心底中不為人知嘅秘密,成為兩個人間嘅牽引: 12.始終溫柔的媽媽

到咗醫院之後，兩姊弟搭升降機上到病房
離遠已經見到媽媽坐喺病床上面睇緊書
「媽。」夏學謙行喺前面，「家姐今日唔洗番工。」
「媽你今日點呀？睇起嚟精神咗好多～」夏巧莘坐低喺床邊，將書包放喺床邊嘅置物櫃前
「嗯…好好多啦…辛苦你兩個啦…成日撲嚟撲去…」媽媽露出了安慰嘅笑容
「唔辛苦呀～」夏巧莘微笑搖搖頭
「媽你亂講啲咩…嚟照顧你有幾辛苦？」夏學謙輕皺眉頭
「知你最乖仔啦…」媽媽望住夏學謙，微笑道
「你餓唔餓呀？我去飯堂買粥比你食？」夏巧莘微笑問道
「唔洗啦…啱啱食完嘢…」媽媽輕輕搖頭，然後將手上嘅書合上遞比夏學謙，「呢本睇完啦，聽日拎第二本比我睇啦～」


「嗯，好呀。」夏學謙罕有的揚起嘴角微笑道
夏學謙將本書放入書包，然後坐低喺膠椅上
「學謙…」媽媽伸出左手，夏學謙頓時伸出手握住媽媽嘅手
媽媽嘅目光總係如此溫柔，手總係如此溫暖，暖到心深處…
「巧莘…」媽媽伸出右手，輕輕握住夏巧莘嘅手，「你地兩個聽住…如果以後媽媽唔喺度啦--」
「媽！」「媽…！」
夏學謙同夏巧莘瞬間就嗌出嚟，想打斷媽媽講嘅嘢，因為佢地心知，媽媽要講啲咩
媽媽冇因為兩人嘅打斷而嬲，反而仍然掛住溫暖住兩人心深處嘅溫柔微笑
媽媽首先望向夏學謙
「學謙，你係男仔嚟…要保護好家姐，由細到大你最了解家姐嘅性格…我知道你好錫家姐，你會做到我嘅要求…」媽媽講完呢句之後，更用盡力緊握住夏學謙嘅手，「媽媽冇偏心家姐，錫家姐亦都錫你…你永遠係媽媽最寶貝嘅仔…」


「我知道…」喺夏學謙無表情嘅臉下，埋藏着難受和傷感
「巧莘…」媽媽望向夏巧莘，夏巧莘已經開始雙眼泛紅，雙手緊握住媽媽溫暖嘅手，「呢段時間辛苦你啦…要你撐起成頭家…」
「唔辛苦…」夏巧莘強忍住淚水搖頭
「媽媽知道你堅強…撐起一個家唔容易…你要好好照顧細佬知唔知…？」媽媽微笑道
「嗯！」夏巧莘用力點頭
「我唔喺度之後，你地可以去搵爸爸，佢始終都係你地爸爸嚟…佢會好好照顧你地…」媽媽嘅微笑並冇消逝，同紅着眼眶嘅姊弟兩形成咗極強嘅對比
「唔會㗎！你一定會好番㗎！醫生都話你好大機會好番！」夏巧莘搖搖頭，用力擠出笑容
「嗯，一定會好番㗎！」夏學謙都點頭
「一定會冇事㗎！到時等媽媽你好番之後，我地一齊去食番餐好嘅！」夏巧莘笑道，但眼淚卻從眼眶溢出嚟
「嗯…」媽媽微笑點點頭


「醫生都話有希望，一定可以好番㗎！」夏學謙都露出了微笑
「知啦知啦…」媽媽無奈咁笑道，「我有啲攰，想瞓陣，你地番去先啦…」
「我幫你較低張床。」夏學謙彎腰，搵到調較軸
夏巧莘扶住媽媽，然後幫佢整番好個枕頭
「我地等你瞓着咗先走。」夏學謙坐低喺膠櫈上
媽媽冇出聲，只係點點頭
夏學謙坐喺夏巧莘旁邊，頭靠喺後面嘅玻璃窗上
媽媽合埋眼平瞓喺病床，好好休息一下
夏巧莘翹住腳坐，頭靠喺夏學謙嘅博頭上面
「你眼瞓就恰一恰先，等媽媽瞓着咗我再叫你。」夏學謙為咗唔好嘈到媽媽瞓覺，細細聲咁同夏巧莘講
「嗯。」夏巧莘戴上耳機，然後合埋眼，稍作休息

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link