[愛情走糖故]兩個人心底中不為人知嘅秘密,成為兩個人間嘅牽引: 15.曖昧的二人

「只要你唔介意人地嘅目光咪得。」凌御生講道
「喺大家眼中我係完美嘅存在…但係世上邊有完美？只係因為大家未見到我嘅另一面啫…」夏巧莘將垂落嚟嘅頭髮翹到耳仔後面
「總有人接受到…」凌御生柔聲道，「總有人會接受你嘅唔完美。」
「嗯…」夏巧莘微微點頭
「至少我同你都有對方接受自己先…」凌御生低頭微微一笑，「彼此都暫時接受到彼此最真嘅一面…」
凌御生同夏巧莘心中都突然間冒出一種彼此都係同病相憐嘅感覺，但心中又放心落嚟，因為搵到同路人，喺呢條路上並非只有自己一人
夏巧莘抬起頭，側着身子，望住凌御生
凌御生感覺到夏巧莘嘅目光落喺自己度，亦回望佢
夏巧莘又大又明亮嘅雙眸因為醉意湧上而開始變得迷離，但佢本來嘅魅力因為酒氣而變得更強
「咁咪好囉…」夏巧莘微微一笑，柔聲道


夏巧莘逐步逐步湊近，佢嘅魅力令所有人都無法抗拒，包括凌御生…
帶住醉意嘅夏巧莘悄悄伸手，將手輕輕搭放喺凌御生嘅左腰上，呢個帶住醉意主動湊近自己嘅女仔對凌御生嚟講，係最大同時無法抗拒嘅誘惑
凌御生冇辦法同呢個女仔「對抗」，乖乖咁接受佢嘅主動，夏巧莘閉起雙眼，凌御生微微低頭合上眼，吻到佢嘅唇上
輕輕嘅一吻，令兩個人之間嘅關係變得更瞹眛…兩個人嘅界線，就介乎於有感情同冇感情之間
「以後有我關心你…」夏巧莘細聲柔聲道，雙手慢慢咁繞過凌御生嘅頸，輕輕咁攬住佢
「咁以後你喺我面前都可以做番自己…」凌御生嘅右手繞過夏巧莘嘅背，輕輕落喺佢嘅腰上
「我嘅秘密，仲有好多…」夏巧莘微微一笑，然後伸手指住凌御生，「唔知你可以搵到幾多呢～」
「大家互相搵下囉～」凌御生飲咗一啖啤酒
「我地取消金錢嘅交易。」夏巧莘坐好起嚟，伸出小尾指
「好。」凌御生點點頭，同時伸出小尾指同夏巧莘勾手指尾


兩人鬆咗手之後，凌御生突然明白咗啲咩咁笑一笑
「取消金錢嘅交易…」凌御生露出一個意味深長嘅笑容
「嗯～哼～」夏巧莘彷彿知道凌御生笑咩，都跟住笑起嚟，「我地嘅關係真係好尷尬～」
「咁希望之後唔洗咁尷尬囉～」凌御生將個啤酒罐遞到
夏巧莘冇答，只係笑一笑
「呢種天氣好舒服…涼涼地，唔太熱咁～」凌御生合起雙眼，雙手拎住個啤酒罐，自然咁放鬆放喺雙腿中間
「有少少風，好舒服，有啲想瞓…」夏巧莘將頭靠喺凌御生嘅博頭上，慢慢合起雙眼
凌御生睜開眼，稍稍望向夏巧莘，呢個女仔同佢想像中有啲出入…
佢比佢想像中…更有骨氣…
縱使夏巧莘冇講出口，但係凌御生feel到佢嘅骨氣，就算係搵錢，都想要靠自己實際付出，去番工賺番嚟…


「你唔好真係瞓著呀，我送唔到你番屋企㗎喎…」凌御生無奈咁笑道
「點解？因為我細佬？」夏巧莘緩緩開口問道
「你知你細佬幾敵視我㗎啦～」凌御生輕輕一笑
「過多排就冇事㗎啦～」夏巧莘柔聲道，似喺度安慰緊佢
夏巧莘又點會唔知道夏學謙對凌御生嘅態度有幾好？夏學謙唔接受嘅原因，夏巧莘亦知道…做咗咁耐姊弟，又點會唔知佢諗咩？
「可能因為怕你校花個名會衰晒掛。」凌御生無奈咁笑
「唔係…」夏巧莘搖搖頭，「佢唔係因為怕我校花個名會衰…」
聽到半醉嘅佢咁講，凌御生都有啲好奇，到底係因為咩原因
凌御生安靜咗落嚟，等待夏巧莘嘅答案
「只不過係因為…你係接近我嘅男仔，所以佢先會唔中意你…」夏巧莘緩緩開口道
「佢中意你？」凌御生自己講完出口都覺得好無語，佢兩個可係親姊弟喎，「親姊弟喎！」
「唔係呀…」夏巧莘嘅表情有啲無奈，但卻傻傻一笑，「我細佬佢，對我身邊嘅男仔把關好嚴…你係第一個走過佢身邊，然後無視佢，直接到我面前嘅男仔…從來都冇試過…」
「佢自尊心受到打擊，所以就討厭我？」凌御生無奈咁笑問道，「唔通你一世都會留喺佢身邊咩？」
「唔會…佢都有佢自己嘅生活…」夏巧莘微笑道，「佢唔忿氣啫，你直接就無視咗佢嘛…」
「你唔中意嘅可以避開我，我又冇逼你…」凌御生講完呢句，突然收起咗笑容，一臉冷漠，細聲講道：「我先唔似我老豆。」


「當然…」夏巧莘嘅反應慢咗半拍先慢慢點頭

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link