夏巧莘拎起啤酒罐貼到嘴邊,抬頭嘅同時將酒灌入喉嚨,凌御生望住佢灌酒嘅動作
「飲晒…」夏巧莘將個啤酒罐倒轉,然後上下晃
「係呀,飲晒啦。」凌御生將夏巧莘手上個罐拎走,放到自己旁邊,「你就嚟醉到又要嘔啦,唔好再飲啦…」
「嗯…」夏巧莘點點頭,「唔飲唔飲…咳咳…!」
凌御生冇講嘢,默默咁伸手拍拍佢嘅背
夏巧莘拎手機出嚟一望
「我要番屋企啦~」夏巧莘企起身,轉身望向
「你番唔番到去呀自己一個人?」凌御生輕皺眉頭
「okay~」夏巧莘比咗個okay手勢,但一下企唔穩向後跌咗一步
「喂!」凌御生反應迅速,一下子企起身,捉住夏巧莘嘅前臂,「唉…我送你番去啦!費是陣間你醉咗喺路邊呀!」


「你唔怕我細佬知呀?」夏巧莘輕輕一笑
「我冇怕佢,係佢討厭我啫~」凌御生拉住夏巧莘慢慢轉咗一個圈,將佢拉到長櫈前,「坐低,我掉咗啲罐先。」
夏巧莘坐低喺長櫈上,凌御生無奈咁望咗佢一眼之後,就執起啲空罐走去最近嘅垃圾桶丟掉
凌御生回頭望到夏巧莘乖乖咁坐喺長櫈上,小跑起嚟番去長櫈前
「行啦,番去啦!」凌御生伸手拉起夏巧莘
「嗯…」夏巧莘無力咁企起身,「番屋企…」
夏巧莘成個人靠住凌御生,用佢嚟借力
凌御生無奈咁嘆氣,然後一手繞過夏巧莘背後,扶住佢另一邊博頭
「咁易醉仲要做陪酒…做調酒做侍應就啱啦…」凌御生細細聲咁講道,但仍然比夏巧莘聽到
「做陪酒先得…錢夠快夠多…」夏巧莘伸出一隻手指,戳住凌御生嘅臉頰


「嗯嗯嗯…番去啦番去啦~」凌御生扶住夏巧莘行番佢屋企
靠住醉醺醺嘅夏巧莘指路,凌御生總算送到夏巧莘番嚟
「你住幾樓呀?」凌御生扶住夏巧莘企喺升降機入面,望住樓層按鈕
「16…」夏巧莘迷迷糊糊咁講,一個轉身就攬住凌御生
凌御生低頭望住攬住自己嘅夏巧莘,佢安靜咁合起雙眼,靠喺佢身上瞓,心中覺得兩人嘅關係根本就冇辦法用一字一句去釐清
親暱嘅二人,但係卻冇情侶之實,就係有種「朋友以上,戀人未滿」嘅感覺,關係瞹眛不清…
「叮!」升降機喺發出叮一聲嘅同時停咗落嚟,升降機嘅門慢慢打開
「到啦。」凌御生輕輕拍着夏巧莘嘅博頭
「嗯…」夏巧莘企好起嚟,然後行出升降機
兩個人行到去夏巧莘嘅屋企門口,夏巧莘冇拎鎖匙嘅打算,反而再轉身攬住凌御生


「你咁樣,陣間開門好大獲㗎~」凌御生柔聲道
「嗯…」夏巧莘微微點頭,「佢遲早都會知我地嘅事㗎啦…」
「哈…我地嘅事…」凌御生笑咗一笑,「講到咁瞹眛好咩?」
「我地嘅關係都好瞹眛…」夏巧莘細聲講道
夏巧莘伸手去㩒門鐘,然後微微踮起腳尖,微微側頭,湊近凌御生
凌御生面對住夏巧莘嘅魅力,完全冇辦法抗拒佢,默默咁再一次接受佢嘅主動獻吻
「咔嚓…!」
夏巧莘屋企嘅大門喺兩個人嘅唇嘅碰到嘅瞬間打開咗
打開門嘅人正正就係夏學謙,一打開門見到呢一幕嘅佢…呆咗
凌御生留意度喺大門前企咗個人,然後微微揚起嘴角
「又見面啦~」凌御生對住夏學謙講嘅同時拍一拍夏巧莘,「番去啦~」
夏巧莘鬆開咗手,然後喺凌御生耳邊細聲講道:「聽日見…」
「嗯…」凌御生同夏巧莘對望,然後將夏巧莘推到夏學謙面前,夏學謙即時扶住夏巧莘,「交番佢比你。」

IG Link: https://www.instagram.com/nd_cotttoncandy/?hl=zh-tw


回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link