[愛情走糖故]兩個人心底中不為人知嘅秘密,成為兩個人間嘅牽引: 21.及時出現

「我係要拉你走呀！」個大叔住夏巧莘，然後湊近佢想錫落夏巧莘度
「你放手呀！放手呀！」夏巧莘用力掙扎，想推開個大叔
正所謂「酒醉三分醒」，平日要陪啲客飲酒，比人逼飲酒都算，但係要比啲客抽晒水咁真係接受唔到
「我偏唔放手呀～呀！」個大叔講完前半句之後突然大嗌咗一聲
夏巧莘感覺到有人用力推開咗個大叔，而嗰個人就企喺自己身後，佢緩緩抬頭，見到一個高大嘅身影，一手就將佢攬到自己懷裏
係…夏學謙…？睇真啲，唔係…呢個人係凌御生…
「你知唔知我係邊個呀！你竟然夠膽--」「我理得你係邊個，你喺我個場搞事就唔得！」
凌御生冷冷咁、霸氣咁講道，一下子就打斷咗大叔要講嘅嘢
夏巧莘已經冇心情追究又或者講啲咩，只係知道眼前呢個人，令佢心中嗰種安全感湧上嚟…
「你唔好喺我個場度搞事！再有下次，你唔洗旨意再出現喺我呢度。」凌御生一手指住抽水嘅大叔，一手攬住夏巧莘喺自己懷裏


凌御生講完之後，一下子就公主抱咁抱起咗夏巧莘，然後望向經理
「佢個袋呢？拎比我。」凌御生一臉冷漠，成個人散發住「生人勿近」嘅氣場
「Apple，去更衣室拎Ella個袋比細凌生。」阿歡細細聲咁同其中一個陪酒小姐講
「你好嘢！」個大叔行到凌御生面前，指住佢講道，然後就氣沖沖咁同其他幾個人一齊離開咗酒吧
「今日嘅事，一個字都唔準同Ella提起，聽唔聽到。」凌御生對喺酒吧內嘅員工，包括其他陪酒小姐命令道
「知道。」員工們乖乖咁回答，任何人都不敢有異
Apple從更衣室行出嚟，手中拎住夏巧莘嘅袋，行到凌御生面前，將個袋遞比凌御生
「大家都攰啦，早啲番去休息啦。」凌御生講嘅呢一字一句，完全感覺唔到任何感情
凌御生將夏巧莘個袋掛喺手臂上，然後行出酒吧，佢抱住夏巧莘，然後去搭的士，由呢度番去夏巧莘屋企
凌御生先將夏巧莘安頓到車上，然後自己再上車


「番屋企啦…」凌御生對住夏巧莘柔聲道，「都話咗你㗎啦…唔飲得仲做陪酒…」
的士駛到夏巧莘屋企樓下嘅時候停低，凌御生將夏巧莘抱落車
「我地…去邊呀？」夏巧莘喺迷糊間問道，然後又自己笑咗一笑
「番屋企呀…」凌御生抱住佢行入大廈，「好彩聽日唔洗番學，如果唔係都唔知你點算…」
上到16樓，凌御生蹲低，然後伸手入個夏巧莘個袋入面搵鎖匙
「鎖匙鎖匙…」凌御生一邊喃喃自語，一邊伸手入去搵
但搵勻晒成個袋都搵唔到鎖匙，亦摸唔到類似係鎖匙嘅嘢
「你…你真係好嘢，鎖匙都唔記得帶…」凌御生無奈咁講，然後抱穩咗佢之後又再次企番起身，「唯有㩒鐘等你細佬出嚟迎接你啦…」
「叮噹～叮噹～」
喺門口嘅二人都可以聽到屋內響起門鈴，但係卻遲遲都冇人嚟應門


「叮噹～叮噹～」
凌御生再次㩒門鈴，但都係冇人嚟開門
「細佬唔喺屋企呀…」夏巧莘喺呢個時候先緩緩開口講，「佢今晚去咗同學屋企瞓…同同學一齊溫書…」
「你唔早講…！」凌御生更無奈，宜家點算好，夏巧莘又冇帶鎖匙，佢細佬又唔喺屋企
「番屋企～」夏巧莘開始發酒瘋，踢着雙腿
「你冇帶鎖匙，想點番屋企？」凌御生苦笑道
凌御生背靠着牆，喺腦海中諗緊要點算好，冇理由掉夏巧莘喺街就算㗎…
訂間酒店房比佢？但安唔安全㗎，得佢一個…
「唉…」凌御生嘆咗一口氣，佢諗到一個又唔洗瞓街又唔會唔安全嘅方法，「唯有帶你番屋企…」
凌御生抱住夏巧莘落到樓下又捷咗架的士去自己屋企，其實行過去都可以，但係抱住夏巧莘，就唔想行過去，一嚟攰，二嚟熱
到咗屋企嘅大門前，凌御生喺褲袋中拎咗鎖匙出嚟開咗大門
屋企中漆黑一片，凌御生心諗老豆今晚一定又係喺社團同班兄弟一齊飲酒作樂，今晚唔會番嚟
凌御生用腳閂咗道門，然後踩一踩鞋踭除咗對鞋，就抱住已經醉醺醺嘅夏巧莘入房
佢將夏巧莘輕輕放到床上，然後除咗佢腳上嘅3吋高踭鞋放到衣櫃旁邊
當凌御生正想企起身，將夏巧莘放好，好讓佢瞓喺枕頭上蓋好被嘅時候，夏巧莘緩緩坐起身，然後企喺地上



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link