[愛情走糖故]兩個人心底中不為人知嘅秘密,成為兩個人間嘅牽引: 20.借醉行兇

放學嗰陣，夏巧莘已經覺得好攰，今日操咗全日paper，然後陣間仲要去番工
本來按正常嘅話，番工時間係夜晚9點左右，但喺lunchtime嗰陣突然收到經理通知，叫佢5點番去酒吧，即係簡單嚟講，佢宜家番屋企換件衫就可以去酒吧
夏巧莘匆匆忙忙咁番到屋企，拎咗平日番工嗰件衫同埋對鞋就出咗門口，去酒吧準備番工
夏巧莘落咗車之後行去酒吧，酒吧老板企喺吧枱前為客人調酒中，當老板見到夏巧莘踏入酒吧走向更衣室嘅時候，頓時叫住咗佢
「Ella！唔好入去換衫住，等我一陣。」經理阿歡叫住咗夏巧莘，夏巧莘就企咗喺吧枱隔離
阿歡除咗係呢間吧嘅經理之外，仲係一個調酒師，平日係晚更調酒師嚟之前，就會企喺水吧為客人調酒
阿歡熟手咁打開調酒器嘅蓋，將酒倒入雞尾酒杯中，然後喺杯邊夾咗一塊青檸，再送到對住水吧坐嘅吧枱客人面前
「Ella，你跟我過嚟。」阿歡行出水吧，然後行咗喺夏巧莘前面，夏巧莘跟住佢行
阿歡推門入咗更衣室，然後喺一個櫃檯中搵咗一套全新嘅酒吧制服比夏巧莘
「你嚟緊唔洗做陪酒，你跟我學調酒，喺水吧嗰度。」阿歡微笑道


「點解咁突然嘅？」夏巧莘一臉不解
「你生得靚，如果做調酒企出面，咁樣可能可以吸引到多啲客嘛！」阿歡開玩笑道，「你之前都話過想學調酒㗎～」
「係，但…」夏巧莘的確都想學多門手藝，但係諗到屋企嘅狀況，佢又有啲猶疑
「如果你想做嘅話，人工加到$70。」阿歡講完之後，又降低咗聲線，細聲講道，「做出面都有機會收貼士。」
「Sorry呀阿歡，我宜家屋企呢個狀況，真係唔得呀…」夏巧莘逼於無奈咁搖搖頭
「好，唔緊要，你okay之後再同我講。」阿歡微微笑，拍一拍夏巧莘嘅博頭，然後望一望手錶，「宜家呢你就未夠鐘番工嘅，咁你想唔想學下？」
「可以呀！」夏巧莘點點頭，然後阿歡離開咗更衣室
夏巧莘換上一套新嘅制服，淺灰色嘅短袖裇衫配黑色嘅緊身短裙，換好制服之後，夏巧莘就行番出去水吧，推開矮門行入去調酒師企嘅位置
阿歡就趁住呢個人流少嘅時候教一下夏巧莘少少調酒嘅技巧同教下基本嘢
…


去到夜晚21：45，已經開始咗夏巧莘嘅番工時間
夏巧莘已經換好「戰衣」，黑色緊身裙加上3吋高踭鞋
「陣間10點嗰場，佢地挽到夜晚12點㗎，你地要頂住呀！」阿歡同班做陪酒嘅講
講完之後，夏巧莘同幾個女仔一齊推開VIP房門，入面坐咗幾個中年大叔，頸上戴住金鏈，著住西裝
夏巧莘行入去坐喺中間，倒杯酒，陪佢地飲下酒唱下歌咁
「靚女咁後生都做陪酒呀？」坐喺左邊嗰個大叔色迷迷咁將夏巧莘上下打量一番，一手就拍落夏巧莘嘅大腿上，然後酙咗杯酒遞比夏巧莘，「飲一杯，欣賞你！」
「呃…好呀～飲一杯啦～」夏巧莘想避，但無奈嘅係佢番緊工，唯有用佢最甜嘅笑容嚟回應
坐左邊個個大叔睇中咗夏巧莘，一直不停叫夏巧莘飲酒，一杯又一杯
過咗兩個鐘之後，夏巧莘已經唔知飲咗幾多杯，個人已經醉咗，大家都散場啦
個大叔扶住夏巧莘行出VIP房，借機抽水，手偷偷咁放喺夏巧莘嘅腰上，攬住佢嘅腰


「下次再嚟飲過啦～」夏巧莘借意推開佢
「你要唔要再同我飲落去？」個大叔再問，一臉色迷迷咁捉住夏巧莘嘅手碗
「唔啦唔啦！」夏巧莘用力轉動手腕，「下次再同你飲過啦～」
「再飲多杯啦！比錢你！」個大叔用「錢」做籌碼
「唔要啦！」夏巧莘嘅醉意再加上開始不耐煩，佢用咗少少力推開個大叔隻手
個大叔瞬間覺得夏巧莘落佢面，惱羞成怒，行上前用力攬住夏巧莘，夏巧莘頓時掙扎
「放開我呀！」夏巧莘一邊掙扎一邊嗌道

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link