[愛情走糖故]兩個人心底中不為人知嘅秘密,成為兩個人間嘅牽引: 29.令人無奈的關係

凌御生喺書枱旁邊拎咗個結他出嚟，開始自彈自唱起嚟
「似…遠又近…令我這麼敏感…提詞亮了再度暗，埋藏着十個可能…」
凌御生唱起何雁詩嘅《愛需要勇氣》
平日磁性嘅聲音唱起歌嚟，意外地動聽，唱嘅每一句都有種懾人嘅感覺
一臉陶醉咁彈住深啡色嘅木結他，呢個已經陪伴咗佢3年嘅結他，喺媽媽送比佢嘅最後一份禮物
凌御生冇咩特別大嘅興趣，冇特別叻嘅嘢，但只有中意彈結他，拎起結他嘅時候就頓時變咗第二個人一樣，自彈自唱嘅時候更係魅力滿分
唱咗一陣之後，凌御生放低咗個結他，輕輕嘆氣
「希望你唔好中意我，我唔係一個值得你心動嘅人…」凌御生心諗
放咗喺窗檯上嘅手機響起嚟，凌御生接聽咗電話
「喂，開門啦！又叫我上嚟同你夾歌，又唔開門比我。」 電話中嘅人講道


凌御生聽完就收咗線，然後行出睡房，行到大門前開門
一打開門見到鍾家豪一臉無奈咁望住佢
「捨得開門啦咩？」鍾家豪行入屋內，然後對住凌御生老豆點點頭，「打擾了。」
「行啦，入房啦…」凌御生閂上大門，行咗兩步發現鍾家豪停喺原地，動着鼻子唔知聞緊咩，「你企喺度做緊咩呢？」
「好香…」鍾家豪用佢好似小狗一樣靈敏嘅鼻用力吸咗兩口，「咩味嚟呢？」
「啱啱煮過嘢食嘛。」凌御生企喺佢隔離
「唔係嘢食味嚟。」鍾家豪搖搖頭，「陣味好熟，平時都有聞到㗎！」
凌御生冇出聲，怕陣間一講嘢就講錯嘢，講咗啲唔應該講嘅嘢出嚟
「呀！」鍾家豪喺凌御生沉默咗兩秒之後大嗌，「我知啦！」
「行啦！」凌御生一手繞過佢頸後，伸手一下掩住佢個口，然後直接拉住鍾家豪入房


「你做咩唔比我講呀？」鍾家豪行到入房，凌御生快速咁閂上房門，「我知係咩味呀！」
凌御生坐到床上，挑起眉望住鍾家豪
「係校花陣味！平日番學經過佢隔離嗰陣，就係聞到呢個味！」鍾家豪一臉驚訝咁講，然後就奸笑起嚟挪揄道，「點呀～咁快就上埋你屋企啦？我講中咗係咪啫～」
「係呀係呀…」凌御生敷衍咁點頭，望住行到自己身邊坐低嘅鍾家豪，鍾家豪伸手繞過佢後頸，將手搭喺佢博頭上，「夏巧莘係上過嚟，咁點呀？」
「嘩～Oh God～」鍾家豪露出一個意味深長嘅笑容，「你兩個發展得咁快嘅～發展到邊度先～」
「冇呀…」凌御生推開鍾家豪隻手企起身，行到去窗檯背住鍾家豪企，拎起結他
鐘家豪嘅視線跟住凌御生郁
「冇發展到邊步，我同佢都唔係情侶。」凌御生笑言
「喂兄弟，你有咩瞞住我呀？你同佢好似唔係咁簡單，咁都冇發展？」鍾家豪行到窗檯，坐咗喺窗檯上，靠住後面嘅玻璃
凌御生望住支結他無奈一笑，然後抬頭望住鍾家豪


「係唔簡單，我同夏巧莘攬過錫過，但係我同佢唔係情侶，就係咁。」凌御生對鍾家豪冇打算隱瞞啲咩，直接就同佢講
鍾家豪聽到呢個消息之後仲震驚，到底佢兩個之間發生咗幾多事呀？難怪佢兩個突然咁close
「攬過錫過都唔係情侶？」鍾家豪一臉驚訝，佢完全冇辦法理解點解係咁樣，「你兩個到底係咩關係呀？你中意佢？定佢中意你呀？」
「嗯哼～」凌御生笑一笑，聳聳肩，「我地嘅關係，就係唔係朋友亦唔係戀人，但係可以做戀人做嘅嘢。」
「咁你中意佢？佢中唔中意你先？」鍾家豪收起驚訝嘅表情，開始冷靜落嚟
「我唔敢肯定我係中意佢，但我唔否認有時的確係有少少心動。」凌御生將個結他放番喺書枱隔離，然後行番去窗檯坐低，鍾家豪移咗去另一邊坐，雙腳都放咗上去盤着腿坐，「佢話我比到安全感佢。」
「佢至少都唔抗拒同你接觸。」鍾家豪講
「唔知，反正，就算佢係中意我都好，我同佢都冇可能一齊。」凌御生揚起嘴角輕輕一笑，「你知點解㗎。」
「我知，第一日做你兄弟咩～」鍾家豪點點頭，「但可能校花佢就係嗰個幫你行出屋企陰影嘅人呢～」
「唔知，但我唔會比到幸福佢。」凌御生聳聳肩，「至少我係咁諗，不過係真係中意先算，應該都冇咩可能。」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link