[愛情走糖故]兩個人心底中不為人知嘅秘密,成為兩個人間嘅牽引: 32.「朋友」而已

喺午飯時間完結時，兩個人一齊喺天台行落嚟
「你呀唔好再同人打架啦…」夏巧莘講道
「知啦！」凌御生乖乖點頭
夏巧莘先入課室，凌御生行到隔離課室
「捨得番嚟啦？」鍾家豪插住褲袋，成個人斜晒咁坐
「點呀？」凌御生坐低喺隔離，將枝水放喺枱面嘅右上角
「笑你囉～搵完女啦？」鍾家豪唔怕死咁講
「哪有女…」凌御生撥撥頭髮，將手機喺褲袋拎出嚟放喺櫃桶
「校～花～」鍾家豪繼續講，凌御生瞪咗佢一眼，然後細細聲同凌御生講，「可能有一日會變真呢～」
「冇可能。」凌御生果斷咁回答


鍾家豪笑一笑，冇再講嘢，凌御生托住頭望手機
午膳完結嘅鐘聲尚未響起，大家仍然喺走廊傾計吹水
「今年夾唔夾Band，最後一年…」鍾家豪突然問道，「每年都有個Music Week㗎嘛，好似Sing con咁high嗰個。」
「好呀。」凌御生抬頭望咗鍾家豪一眼，「照舊都係我地四個。」
「嗯…」鍾家豪點點頭
學校每年都會有Music Week，大家可以報名唱下歌，但係唔分名次，就係比個時間大家放鬆下，High下咁樣
今年已經係佢地喺學校嘅最後一年，當然要夾Band挽下啦～
…
放咗學之後，夏巧莘同夏巧謙一齊去醫院，夏巧莘決定去一趟醫院之後先再番工
「你上去睇阿媽先，我去交錢。」夏巧莘同夏學謙講完，就分頭行事


夏學謙搭升降機上去病房，夏巧莘就去櫃檯交醫藥費
呢個時候，夏學謙上到病房，行到入病房之中，媽媽坐咗喺床上，背靠咗喺床頭板上
「媽。」夏學謙行到床邊，露出淡淡嘅笑容
「學謙，你嚟咗呀？」媽媽露出溫柔嘅微笑
「家姐去咗交錢，陣間上嚟。」夏學謙放低書包，然後將膠櫈拉近床邊坐低
「你呀…最近嚟嗰陣做咩成日都黑晒面呀？」媽媽柔聲問道，「同家姐相處得唔好呀？定係喺學校發生咗唔開心嘅事呀？」
佢一早就留意到最近夏學謙嚟到嘅時候，總係黑起面，好似有心事咁
「唔係…」夏學謙苦笑，微微耷低咗頭，然後輕輕搖頭
「係咪巧莘身邊又出現咗新嘅男仔呀？」媽媽見到夏學謙苦笑，瞬間就估到
「媽，你真係好醒。」夏學謙無奈咁笑道


「你係我個仔，我點會唔知？」媽媽笑道，「做咩呀？搞唔掂呀？個男仔咩人嚟㗎？」
「嗰個男仔叫凌御生，係學校嘅壞學生…但家姐同佢行得好埋。」夏學謙好似同媽媽訴苦咁，「我唔太中意佢…只係家姐同佢好close，成日都一齊咁。我問過家姐佢兩個咩關係，但家姐就話冇咩。」
「你家姐始終有一日會搵到男朋友嘅，你冇可能一直將佢身邊嘅男仔推開。」媽媽微笑道，「如果巧莘係要中意佢嘅話，就算你再分開佢地，佢都只會更中意嗰個男仔。如果嗰個男仔係真係咁差嘅話，你家姐又點會同佢行得咁埋？」
夏學謙冇出聲，靜靜咁聽住媽媽嘅話
「有時佢先係當事人，佢先會明白。」媽媽微笑道，然後伸手摸摸夏學謙嘅頭
「媽，唔好摸我個頭啦！仲細咩…」夏學謙喺媽媽縮咗手之後撥撥頭髮
「你喺媽媽眼中，永遠都係小朋友。」媽媽露出溫柔嘅微笑
夏巧莘上到嚟病房，行到入嚟
「媽！」夏巧莘行到床邊，一臉高興，「你面色比上之好咗好多呀！」
「嗯…醫生都話好番好多，我痊癒嘅進度幾好…」媽媽微笑道
「咁你係咪好快就可以同我地一齊番屋企啦？」夏巧莘開朗咁講
「我都想…」媽媽微微笑
「一定可以㗎～」夏巧莘用力點頭，「我同細佬有努力讀書，所以媽媽你都要努力呀！」
「當然會…」媽媽點點頭，「聽細佬講，你識咗個新男仔喎～男朋友呀？」
「唔係呀，我地係朋友咋嘛～未去到情侶嘅階段…」夏巧莘低頭一笑，喺夏巧莘嘅腦海中浮現咗凌御生嘅身影



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link