[愛情走糖故]兩個人心底中不為人知嘅秘密,成為兩個人間嘅牽引: 33.21樓C室

「好感？」媽媽追問道，「靚唔靚仔㗎？」
夏巧莘猶疑咗一陣，然後微微一笑
「對我嚟講都幾靚仔…」夏巧莘帶着少許羞澀咁微微點頭，「佢份人唔差㗎！唔好聽夏學謙亂講。」
夏學謙坐喺一邊冇出聲
「中意嘅嘢要自己把握㗎，知道嗎？」媽媽嘅話帶着深一層嘅意思
「我又冇話我中意佢…」夏巧莘嘟起小嘴
「家姐你唔係要番屋企拎嘢然後去番工咩？」夏學謙望一望手錶，「我陪阿媽得啦。」
「係喎…」夏巧莘頓時記起自己仲要番工，「媽我下次再嚟睇你～」
講完就踏出咗病房，番屋企拎番工衫之後去酒吧番工
夏巧莘拎咗番工套衫同對鞋，然後準備出門口


喺打開門嘅嗰一刻，收到經理電話
「喂經理？做咩呀？」夏巧莘問
「今晚嗰有一場VIP房嘅客cancel咗，你唔洗趕番嚟番工啦！」經理阿歡講道
「咁呀…好啦…」夏巧莘只可以話好
夏巧莘掛斷電話，然後放低咗個袋，行到梳化瞓低喺上面
夏巧莘側着身瞓喺梳化上面，突然覺得唔番工可以留喺屋企做自己嘢好好，已經好耐都冇試過可以做番一個學生應該做嘅事
自從打咗呢份工之後，每個星期有三四日都要番工，朝早就番學，夜晚就番工，飲酒飲到頭都痛埋…宜家過緊嘅生活，都唔係一個正常學生應有嘅生活
喺腦海中萌生咗不如暫時唔番工一段時間，反正錢其實已經夠，媽媽嘅病亦有好轉嘅情況，咁不如好好休息下
夏巧莘覺得宜家喺屋企好悶，想搵個人同自己一齊行下吹下水，腦海中閃過咗凌御生嘅樣
佢拎起手機，然後whatsapp凌御生


「你喺邊呀？得唔得閒？」
夏巧莘定睛咁望住手機螢幕，過咗成分鐘都冇人應機，夏巧莘喺心中默默咁失望，但同時又安慰自己道：「可能佢做緊嘢啫～」
正當佢想鎖上螢幕時，凌御生就回覆
Aaron BB：喺屋企囉
Aaron BB：得閒呀，做咩？
「啱啱正想出門口番工嘅時候，經理話臨時唔洗番，宜家冇嘢做…唔知做咩好」
Aaron BB：想我陪你？
「想搵個人吹下水啫，想出去行下…」
Aaron BB：想去邊？我喺屋企練緊結他啫，可以出嚟，或者你都可以上嚟搵我嘅，你唔介意嘅話
夏巧莘冇回覆，淨係望住個螢幕


隔咗一陣，都係回覆咗好
夏巧莘換咗另一個袋，淨係袋咗鎖匙銀包同電話就出門
本來打算行去凌御生屋企，但係諗諗下今日都有啲熱，一諗到呢點又唔太想行過去，於是去咗巴士站等車
夏巧莘上咗巴士，企喺下層放輪椅嗰個位，靠住玻璃企，因為搭四個站就到
「咚咚。」放喺褲袋嘅手機震咗一下，夏巧莘拎手機出嚟睇
Aaron BB：去到樓下之後同個保安講去21樓C室就上到嚟
「好」
夏巧莘覆完之後又收番埋電話，伸手㩒落車鐘
巴士喺車站前停低喺巴士前，車門打開，夏巧莘喺呢度落咗車，行一小段路去到凌御生屋企
去到樓下嘅時候，保安室冇人喺度，碰巧有一個住客低咗喺自己前面㩒密碼開大堂嘅玻璃門，夏巧莘跟喺個住客後面入咗大廈
搭升降機上到21樓，夏巧莘行出升降機，企喺貼喺牆上嘅「21」兩個數字前左望右望
呢度一層得四個單位，A、B室喺左邊，C、D室喺右邊，夏巧莘行向右邊，企喺凌御生屋企門前，掙扎緊應該㩒鐘定係whatsapp佢叫佢開門
掙扎咗一陣之後，夏巧莘決定…whatsapp佢
剛好凌御生拎起手機，打算問佢上唔上到嚟嘅時候，螢幕上就彈咗一條whatsapp訊息出嚟
Ella BB：喺門口啦


凌御生無言咁笑，明明喺門口，做咩唔㩒鐘？

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link