[愛情走糖故]兩個人心底中不為人知嘅秘密,成為兩個人間嘅牽引: 41.童年陰影

私家車駛到學校外面，凌御生拍醒夏巧莘
「到學校啦，醒啦。」凌御生拎起書包
「嗯…」夏巧莘解開安全帶，然後拎埋個書包落車
凌御生開住個車門等夏巧莘出嚟，夏巧莘落咗車，凌御生再彎腰入去拎起咗放喺座位上嘅手機
「你部機呀夏巧莘。」凌御生將手機遞到夏巧莘面前
「嘻…唔該。」夏巧莘傻傻一笑，凌御生閂上車門，夏巧莘回頭望向車中揮揮手
「行啦，遲到啦。」凌御生插住褲袋行喺前面
「係喎要遲到啦！」夏巧莘頓時追上凌御生嘅步伐
兩人各自番課室，夏巧莘啱啱番到埋位坐低，Miss Tong就行入嚟課室
喺隔離課室，凌御生將個書包掉到枱面，然後拉開張櫈坐低




「今日好開心咁嘅？有咩開心事呀？」鍾家豪問
「冇呀，你諗多咗。」凌御生搖搖頭
「係咪呀…」鍾家豪唔太相信，然後喺櫃桶抽咗張紙出嚟比凌御生，「填報名Form。」
「咩嚟？」凌御生接咗張紙，然後放喺枱面，喺書包拎咗枝筆出嚟
「咪嚟緊個表演嗰個囉。」鍾家豪話
「哦。」凌御生喺紙上寫咗名同班，「今年早咗，Music Week。」
「係呀，今年其實個Music Week推前咗。」鍾家豪講道，「推前咗成個月，喺Christmas Party嗰日夜晚。」
「哦。」凌御生點點頭，寫到完之後將張紙比番鍾家豪，「交啦。」
「陣間交。」鍾家豪將張紙放入櫃桶，「唱咩歌好？你主唱你決定。」
「未諗。」凌御生聳聳肩，「之後再話你聽。」




凌御生都懊惱緊要唱咩歌，心中有啲想唱下情歌咁，但係又唔知唱咩好
另一邊廂，凌御生老豆揸車番到社團，社團嘅所在地係喺一間公司嘅後面，表面係一間普通不過嘅公司，實際上後面係黑社會社團
「凌、天、傲。」一個男人坐喺社團會室入面，坐咗喺主席位，佢直盯着剛踏入嚟嘅凌天傲
「你終於番嚟啦？」凌天傲行到佢面前，點起一支香煙
「今日啱啱放監，出番嚟。」男人喺凌天傲收起香煙時，從佢手中拎咗包煙，「晴晴呢？冇跟你一齊嚟呀？」
男人提起「晴晴」呢個名嗰陣，凌天傲面色一沉
「晴晴死咗…」凌天傲吐出一口煙，手自然咁摸着左手無名指上嘅戒指
晴晴係凌天傲嘅老婆，凌御生嘅媽媽
男人聽到之後怔了怔，收起咗笑容
「幾時嘅事…」男人嘅表情嚴肅起嚟




「喺你入咗去坐之後一個月，晴晴比仇家捉到，因為我地之前破壞咗佢地嘅計劃，搶咗本來同佢地合作嘅生意Partner，令佢地損失慘重…」凌天傲摸住手上嘅戒指，「番到屋企嗰陣，晴晴已經倒喺血泊之中，阿生就啱啱放學番嚟，親眼睇到呢幕…」
「阿生有冇點？」男人問道
「冇呀，只係嬲咗我，怪我冇好好保護佢媽媽…」凌天傲苦笑道，「我有解釋比佢聽，到底發生咩事，但係佢都係怪我。或者對佢嚟講，呢個係一個陰影…」
「老豆係黑社會，呢樣嘢對佢嚟講已經好唔一樣。」男人無奈一笑，「或者對佢嚟講，都係一種壓力。」
「我怕佢會唔敢識女朋友，因為咁樣怕遲早有一日令對方有危險…但係睇嚟佢都冇陰影留低。」凌天傲諗起夏巧莘，笑一笑，「第一次見佢帶女朋友番屋企。」
「女朋友？阿生識咗女朋友？」男人一臉愕然，「仲帶埋番屋企？」
「嗰日見到佢帶女仔番嚟屋企，佢兩個咁親暱，應該都係男女朋友。」凌天傲講完，諗起凌御生望住夏巧莘嘅眼神，「個衰仔原來都有咁溫柔嘅時候…你冇親眼見到咋！佢望嗰個女仔嗰陣，眼神中滿是疼愛…」
「你知你個仔㗎啦，遺傳晒你嗰啲性格，平日cool到死。」男人笑道
凌天傲笑一笑，若有所思咁微微低頭

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link