凌御生將車駛到夏巧莘屋企樓下停低,輕拍夏巧莘
「到啦~」凌御生拍一拍夏巧莘,「番屋企先再瞓啦~」
夏巧莘迷迷糊糊咁睜開眼,然後落車,凌御生將夏巧莘送到上屋企門口
「多謝你送我番嚟…」夏巧莘帶着倦意微笑道
「嗯,快啲去沖個涼瞓啦,聽日番學見。」凌御生微笑道
「嗯,你都早啲番去休息啦…」夏巧莘點點頭
「嗯。」凌御生點點頭,然後就離開
夏巧莘行到入屋內,屋入面嘅燈都閂晒,只係淨低一盞牆燈冇閂,佢拖住疲倦嘅身軀同睡意去沖咗個涼,然後一灘上床就瞓着咗,今日已經好攰啦…
一大清早放喺床頭嘅鬧鐘就響個不停,凌御生一邊坐起身一邊打呵欠,然後伸手拍熄個鬧鐘
另一邊廂,夏巧莘嘅手機鬧鐘好大聲咁響,響到喺隔離房戴緊校呔嘅夏學謙都聽到


「叩叩叩!家姐!起身啦!」夏學謙行到夏巧莘嘅房門前,敲着房門道
但夏巧莘皺起眉頭用被蓋過自己嘅頭,當冇聽到鬧鐘響
夏學謙聽到鬧鐘好耐都冇熄,直接就開門入房
「起身啦!夏巧莘!要遲到啦!」夏學謙行到床邊拉開張被
「好眼瞓啦…」夏巧莘皺起眉頭,然後翻身面向住牆繼續瞓
「今日要番學呀!再瞓就要遲到啦!」夏學謙直接拉起夏巧莘成個人,「醒啦夏巧莘!」
「嗯…」夏巧莘坐喺床上呆咗兩秒,然後就落床行去廁所梳洗
「校服我幫你喺衣架度拎咗落嚟啦!」夏學謙喺廁所門口嗌道,「我今日要番去幫手整嘢呀!我出門口啦!你唔好又瞓番呀!」
夏學謙講完匆匆忙忙咁拎起書包然後出門口
夏巧莘先一臉悠閒咁喺廁所行出嚟,帶住睡意換好校服,然後出門口


凌御生換完校服,老豆企喺置物櫃旁拎起車匙
「阿仔你番學未遲到咩?」老豆抬頭望鐘
「要呀。」凌御生點頭,然後拎起書包
「車你番去?」老豆問道
「你去嗰邊咩?」凌御生問
「嗯。車你番去啦。」老豆講完就行出門口,凌御生跟喺後面
一上車凌御生就坐喺後座,平日同老豆一齊佢唔習慣坐副駕位,所以通常都座後面
「夏巧莘瞓醒未呢…?」喺凌御生腦海中突然閃出呢個想法,頓時就拎起手機whatsapp夏巧莘
「你醒未呀?」
過咗一陣就有答覆


Ella BB:出咗門口,今日要遲到啦!希望去到巴士站嗰陣啱啱好有車啦!
「今日我老豆車我番學,過嚟車埋你?」
Ella BB:真係!?
「你到邊呀?我就到你住嗰度」
Ella BB:啱啱到樓下,急步行緊去巴士站
「你喺我琴日停車嗰個位等我」凌御生輸入完之後,就同坐前面嘅老豆講,「老豆,喺前面個屋苑停一停。」
「哦,好呀。」老豆覺得有啲突然,但都係應承咗,駛到屋苑前嘅時候停咗車
停車嗰陣夏巧莘已經企定定喺度等緊,凌御生落車開門比佢上車
「叔叔早晨,唔好意思要你車埋我。」夏巧莘一上車就有禮貌咁打招呼
「唔緊要,順路啫。最緊要你番學唔好遲到。」凌御生老豆罕有咁露出笑容
凌御生閂上車門,然後提夏巧莘要帶安全帶
「我仲係好眼瞓…今日我細佬叫醒我…」夏巧莘睡眼惺忪咁講
「再恰下囉~」凌御生耷低頭睇手機,「借個博頭比你。」
「嗯…」夏巧莘點點頭,然後真係側着頭靠喺凌御生博頭上小睡片刻
凌御生溫柔嘅微笑,夏巧莘安心嘅模樣,老豆從倒後鏡中睇到


老豆從來都冇見過自己個仔原來有咁樣嘅笑容

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link
已有 0 人追稿