番到去嗰陣,凌御生拍醒夏巧莘落車
「想食咩呀?」凌御生問道
「食咩都得…」夏巧莘仍然處於未瞓醒嘅狀態
「食M記囉~」凌御生無奈咁講道,夏巧莘點點頭
去到M記嗰陣,夏巧莘坐喺位度伏喺枱面,凌御生出去買嘢食
「快啲食完嘢,我就送你番去。」凌御生將餐盤放到枱上
「嗯…」夏巧莘慢慢坐起身,「今日挽咗全日有啲攰…」
「番去早啲休息,聽日仲要番學。」凌御生笑一笑,然後將飲管插入汽水中,放到夏巧莘面前
「係喎…聽日要番學…」夏巧莘輕輕皺起眉頭,「好彩最近都唔洗番工…如果唔係我真係會攰死…」
「咁咪好囉,多啲時間休息下,總好過要成日灌酒落個胃度嘅~」凌御生笑一笑,拎起沾咗茄汁嘅薯條放到口中


「我已經有段時間冇飲酒啦…」夏巧莘打開外個魚柳包外面層紙,喺包上咬咗一口
「知你乖啦…」凌御生無奈咁講道
「呢排冇番工,時間就好似突然多到唔知點用好…」夏巧莘托住頭,定睛望住外面
「咁咪搵下嘢做囉~約下朋友出街囉~」凌御生飲咗啖汽水,然後將杯汽水放喺餐盤外面
「嗯…」夏巧莘似懂非懂咁點點頭
「嚟搵我囉~我隨時都得閒。」凌御生用開玩笑嘅語氣認真咁講道
「好呀…」夏巧莘似笑非笑咁揚起嘴角,「咁我一定成日都會纏住你。」
「Okay㗎,你唔介意嘅話。」凌御生講道
食完嘢之後,兩個人就起程番屋企
去到夏巧莘住嘅地方嘅大堂玻璃門前,凌御生冇同夏巧莘一齊入去


「我送到你嚟呢度,你番到去whatsapp我。」凌御生微微一笑
「嗯…」夏巧莘點點頭
又到咗一日之中最難過嘅時候,就係離別嘅時候…兩人心中都有種難以言喻嘅感覺
明明聽日係番學日,都有得見,但就係因為呢一刻要分開所以唔開心
「今日挽咗成日好開心…」夏巧莘踏前一步,伸手攬住凌御生嘅頸,「好耐都冇試過咗樣去挽…」
「下次再同你去挽囉~」凌御生攬住夏巧莘嘅腰,無奈一笑,「你想嘅話…」
「嗯…」夏巧莘額頭靠喺凌御生嘅博頭上,到底自己係因為咁快又完咗輕鬆嘅一日而唔捨得,定係唔捨得同自己一齊去挽嘅人…?
「咁你番到去就whatsapp我啦~」凌御生貼心咁提醒道
「嗯嗯!」夏巧莘鬆開手微笑道,「咁我地聽日見啦~」
夏巧莘轉身踏上梯級,推開大堂嘅玻璃門,喺玻璃門閂上嘅一刻,夏巧莘再回頭望,然後同凌御生揮揮手講Bye Bye


凌御生望到夏巧莘轉咗入去升降機大堂之後先至轉身離開
夏巧莘番到屋企之後坐咗喺書枱前面,將Dale喺袋上面拆出嚟,將個頭箍放咗喺飾物架上面,將Dale勾咗喺電腦隔離
夏巧莘喺旁邊嘅櫃桶入面拎咗部小型嘅相片打印機出嚟,將今日嘅相晒咗出嚟,夾咗喺牆上嘅網格上面
「咁以後坐喺書枱都會望到…」夏巧莘望住牆上嘅網格一笑
凌御生行離夏巧莘住嘅地方一陣之後就收到夏巧莘嘅whatsapp
Ella BB:番到屋企啦~你都要快啲番去休息下!
凌御生無奈一笑,然後回覆道:「知啦,你都早啲休息」
凌御生番到屋企之後就直接去咗沖涼,沖完涼之後赤裸住上身,淨係着住條灰色嘅短褲行出廁所
凌御生一邊用毛巾抹乾頭髮,一邊推開房門,坐喺床邊拎起放喺地下嘅斜孭袋,解開咗袋扣,拉開拉鏈,將Chip公仔同跳跳虎頭箍從袋入面拎出嚟
佢垂低咗拎住頭箍嘅手,將拎住Chip嘅手微微舉起咗少少
望住呢個公仔,遊玩嘅畫面仍然瀝瀝在目,手上仍然殘留着夏巧莘手心嘅溫度
「咔咔…」放喺枕頭上嘅手機震咗一要,螢幕亮起
凌御生拎起手機一睇,係夏巧莘send相過嚟,睇嚟應該係今日影嘅相
「Thx~~~」凌御生回覆道
凌御生打開圖片庫,收到夏巧莘send番過嚟嘅相之外,手機入面仲有嗰張凌御生偷偷地影落嚟嘅相


望住張相,凌御生微微一笑,然後鎖上螢幕,將手上嘅Chip放到床頭櫃上,放喺燈座上面,順手伸到床頭櫃嘅櫃桶,拉開將頭箍放入去

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link
已有 0 人追稿