[愛情走糖故]兩個人心底中不為人知嘅秘密,成為兩個人間嘅牽引: 52.發現情敵

「今日嘅約會都唔錯…」凌御生攤到床上，對於佢嚟講，今日嘅回憶，係美好嘅
「希望快啲到聽日啦…」夏巧莘早就閂咗房燈，瞓喺床上蓋住被，喺瞓之前偷偷許咗個願
…
凌御生比平日早咗出門口，打算行去夏巧莘平日搭巴士嘅巴士站，咁樣就可以早啲見到夏巧莘，雖然都只係碰下運氣，但有機會總好過試都唔上下嘅
夏巧莘一邊行一邊打呵欠，拖住腳步行去巴士站，而且仲要耷低頭睇手機
「早晨。」凌御生悄悄行到夏巧莘身後，伸手放喺夏巧莘嘅頭頂
「嗯…早晨…」夏巧莘仍然一臉未瞓醒嘅樣，望向右邊，「你喺度嘅…？」
「嗯，今日早咗出門口，順便去買早餐嘛，所以咪喺呢邊。」凌御生講咗個大話，笑一笑道，「琴晚唔係應該好好瞓㗎咩？做咩仲好似好眼瞓咁？」
「琴晚其實好早就瞓咗，但係我仲係覺得好眼瞓…可能因為睡眠質素唔好…」夏巧莘聳聳肩，「陣間上到巴士再瞓…」
兩個人並肩而行，行到巴士站時剛好有車，凌御生跟喺夏巧莘後面，夏巧莘踏上梯級，凌御生亦行喺佢身後


夏巧莘照舊行到尾三左手邊嗰兩個位置，坐低喺窗邊，但今日佢冇戴耳機
凌御生行到夏巧莘旁邊嘅空位自然咁坐低，然後戴上耳機，一切彷彿已經係習以為常嘅舉動
「你聽歌呀？」夏巧莘眯起眼望凌御生，一臉疲倦
「嗯，你要唔要？」凌御生當然知道夏巧莘想要另一邊耳機，但只係循例一問
「嗯…」夏巧莘點點頭，「今日唔記得咗袋耳機就出咗門口…」
凌御生將右邊嘅耳機除落嚟遞比夏巧莘，夏巧莘戴咗之後就耷低頭開始小睡片刻
書包放喺大腿上，雙手放喺書包上，身上著住長袖冷衫，靜靜咁低着頭
梳住長長嘅馬尾，燙得筆直嘅校服，完全一副乖學生嘅模樣
柔和嘅陽光喺外面照入嚟，剛好落喺夏巧莘嘅臉龐上
心，又再開始加速咗跳動嘅速度…凌御生偷偷移開視線，假裝自己咩都冇做過


巴士突然剎車，凌御生嘅自然反應，係伸手擋喺夏巧莘前面
夏巧莘頓時就醒過嚟，輕輕皺眉頭
凌御生收番隻手，就好似冇事發生過一樣繼續耷低頭睇手機
夏巧莘望向凌御生，但係凌御生冇講嘢，當冇事發生咁繼續耷低頭睇手機，夏巧莘就移開咗視線
巴士喺站前停咗，有幾個女仔上車，行到上層
幾個女仔有兩個去咗車頭，另外兩個女仔行向車尾，車尾仲有兩個位，但兩個位分開咗，一前一後
「你坐後面嗰個位啦，你中意嗰個男仔唔係喺嗰度咩？」行喺後面嘅女仔細聲咁同前面個女仔講
嗰個女仔一邊由中間行向車尾，一邊望向凌御生
夏巧莘當然留意到嗰兩個女仔上咗嚟上層，行緊嚟後面
「嗰個女仔咪上次同凌御生表白嗰個女仔…？」夏巧莘下意識咁望向凌御生


嗰個女仔行到嚟夏巧莘同凌御生前一排嘅座位時，佢同夏巧莘嘅視線對上，頓時好似心虛咁移開視線，行到去右邊嘅座位坐低，佢同凌御生之間隔咗一條走廊
凌御生抬起頭，見到夏巧莘望住自己
「做咩…」凌御生問道
「冇嘢…」夏巧莘搖搖頭，然後將下巴靠喺凌御生嘅博頭上
「你咁樣好咩？」凌御生無奈一笑，然後細聲問道，「咁曖昧好咩？」
「有嘢唔好咩？」夏巧莘反問道，「唔係一直都曖昧緊咩？」
所有嘅舉動，都係自然咁做出嚟，夏巧莘彷彿都唔太知道點解自己會咁做，但好自然咁就做咗，就係想一齊但又唔敢開口話要一齊…
「你啱～」凌御生笑一笑，然後不自覺咁就問咗出口：「咁幾時唔洗再曖昧落去？」
「吓…？」夏巧莘怔了怔，喺腦海中浮出咗好多個回答，「你想幾時完咪幾時完…」
兩個人對望，凌御生喺腦海中思考緊夏巧莘呢句話嘅意思

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link