[愛情走糖故]兩個人心底中不為人知嘅秘密,成為兩個人間嘅牽引: 64.訝異

琴晚飲到醉醺醺嘅夏巧莘話唔只要獨佔凌御生個人，仲要獨佔埋佢個心
其實夏巧莘何止獨佔咗凌御生個心？佢已經直接鎖住咗凌御生嘅心，仲將凌御生嘅目光成功咁鎖定喺自己身上
阿姨拎住常餐嘅奄列過嚟，然後仲拎住兩杯嘢飲過嚟
「食咗個奄列先～」夏巧莘好似為食嘅小朋友一樣笑道
夏巧莘一個笑容，又成功咁將凌御生嘅視線同心吸引住
凌御生宜家最大嘅弱點，大概係眼前呢個女仔
喺夏巧莘仲未知道凌御生對自己嘅感覺係點嘅時候，其實早就將凌御生嘅心收歸國有…
「好食好食～」夏巧莘喃喃自語道，自己一邊食一邊開心笑
「噗…」望住夏巧莘嘅可愛，凌御生忍唔住笑咗出嚟，「你真係好似小朋友咁…」
「咁真係好食呀嘛！」夏巧莘鼓起兩泡腮細聲講道


食完嘢之後，兩個人離開座位，嗰個男同學離向佢地二人，凌御生直接就無視咗嗰個男仔直接行向收銀處，夏巧莘用佢嘅招牌笑容向住嗰個男仔微微點一點頭
夏巧莘一邊孭番個袋，一邊行向凌御生，企喺凌御生嘅身旁
「送你番去。」凌御生講道
「嗯。」夏巧莘耷低頭望手機，然後稍稍抬頭望凌御生，微微一笑，「我喺出面等你。」
「嗯。」凌御生點一點頭
一比完錢，凌御生就行出去，見到夏巧莘企喺門口隔離等緊佢
「行得啦。」凌御生講嘅時候心中有種難以形容嘅感覺，開心嘅時間好似過得好快咁，「送你番去啦～」
「嗯…」夏巧莘點點頭，心中有啲失落，因為又要同凌御生分開，又要等到星期一先再見到面
沿路行番去嘅時候，兩個人都冇乜點講嘢，或者因為分別嘅時候差唔多到，大家都唔知可以講咩好
「你到啦，我送到呢度啦…」凌御生微微一笑


兩人就企喺大堂嘅玻璃門前，心中依依不捨，但係不得不分開…
「嗯…」夏巧莘不情願咁點點頭，擠出笑容，隱藏自己不捨嘅心情
「你快啲番上去啦，你細佬應該好擔心你㗎啦！」凌御生講道，希望夏巧莘快啲走，如果唔係佢只會更唔捨得夏巧莘
「咁好啦，我番上去先啦…」夏巧莘微笑道，轉身踏上嗰兩三級樓梯，行到平台位
當夏巧莘差唔多走到玻璃門前嘅時候，佢突然回頭，然後跑向凌御生，輕輕將手扶喺凌御生嘅手腕上，慣性咁微微踮起腳尖，喺凌御生嘅右邊臉頰上錫咗一啖
「當係你琴晚「收留」我嘅謝禮啦～」夏巧莘甜甜地笑起嚟
凌御生呆咗一呆，然後微微耷一耷低頭露出了笑容
「嗯！咁你嘅謝禮我就照單全收啦！」凌御生心中喜滋滋咁講道，「快啲番去啦！」
「嗯！」夏巧莘點點頭之後再次踏上梯級到平台，用小跳步行到玻璃門前，回頭一望，揮揮手，「星期一見啦！」
「好！」凌御生笑道


凌御生依舊等到夏巧莘轉咗入升降機大堂之後先至轉身離開
呢個男仔嘅溫柔體貼，大概只會喺對住夏巧莘嘅時候先會表露無遺…
夏巧莘企喺屋企門口，手中拎住鎖匙，正諗緊開門之後要點樣同細佬解釋琴晚去咗邊
「呼…唔洗驚…夏學謙又唔會食人嘅…」夏巧莘同自己講道，安慰一下自己
夏巧莘插鎖匙開門，一打開門見到夏學謙一臉悠閒咁坐喺梳化上睇綜藝節目
「你番嚟啦？」夏學謙回頭望咗夏巧莘一眼，然後又繼續睇綜藝節目
「嗯…」夏巧莘閂上門，喺門邊除鞋
「你琴晚去咗邊呀？成晚都冇番。」夏學謙望住電視問道
「呃…」夏巧莘有啲心虛，「琴晚我全晚都同凌御生一齊…」
「哦，係呀？」夏學謙只係咁樣回答咗一句，完全唔似平時咁樣會問夏巧莘點解同凌御生一齊，講凌御生嘅不是
「吓…？」夏巧莘一臉訝異，心諗係咪夏學謙發生咗啲咩事，「你唔問我其他嘢嘅？」
「我要問你啲咩？」夏學謙望向夏巧莘
「你平時都會話我㗎…」夏巧莘行到梳化隔離，一臉疑惑咁望住夏學謙 心中正在懷疑呢個到底係咪佢細佬嚟
「咁你中意佢嘛，你開心嘅話，我呢個做細佬嘅都唔會反對嘅～」夏學謙講道
「我幾時有話我中意佢啫…」夏巧莘坐低喺梳化細聲講道


「扮咩呀～咁明顯～」夏學謙無奈咁笑道，有啲似串緊夏巧莘，「算啦家姐，你中意佢中意得咁明顯，我係你細佬呀，睇唔出就假啦！」
「好明顯咩…」夏巧莘側着頭，喺腦海中諗緊到底有幾明顯
「係呀！」夏學謙反咗一個大大嘅白眼，立刻就補上一句，「對我嚟講嘅話。」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link