星期一,一個大家都提唔起精神嘅日子
「頭兩堂又上中文…」凌御生望向身旁就嚟連行路都會瞓著嘅夏巧莘
「你又要走堂?」夏巧莘睡眼惺忪咁問道
「中文堂好悶,走咗佢,仲要孖堂。」凌御生理直氣壯咁講
凌御生去到3樓嘅時候冇停低,繼續往上行;夏巧莘行向課室,但剛離開樓梯行咗兩步,佢就停低咗,然後回頭望一望凌御生
夏巧莘居然追上去,冇番課室
「你唔番課室嘅?」凌御生一臉訝異
「好眼瞓仲係…唔上頭兩堂啦,反正都只係數學堂。」夏巧莘講道
「你學壞啦~」凌御生無奈一笑
「見你成日走堂,我突然都想試下…」夏巧莘嘅笑容中夾雜咗倦意


夏巧莘跟喺凌御生身後上到天台,推開天台門,行到去佢地成日坐咗嗰張長櫈坐低
夏巧莘除低書包,一坐低個背脊就貼住個椅背,書包放喺旁邊
凌御生放低書包喺旁邊之後坐低喺夏巧莘隔離,然後伸手喺書包入面拎咗一份三文治出嚟
「你食唔食呀?」凌御生問道,夏巧莘只係搖搖頭並冇開口回答
夏巧莘喺書包入面拎咗件長袖冷衫出嚟披喺身前
「你琴晚好夜瞓咩?今日咁攰嘅?」凌御生咬喺一啖麵包問道
「嗯…」夏巧莘微微點頭,可能因為攰嘅關係,聲線都細咗,「琴晚唔知點解瞓唔著,搞到成4點幾先瞓…」
夏巧莘好自然咁樣就微微靠住凌御生合埋眼,盡量用呢兩堂嘅時間補眠
「到咗小息嗰陣嗌醒我…」夏巧莘細聲講道
「嗯。」凌御生望住夏巧莘嘅倦容,不禁有點心疼


凌御生微微低頭望夏巧莘,只敢微微郁一郁,每一個動作都放輕,唔敢太大動作,靜靜地帶着溫柔嘅目光凝視着夏巧莘
比起平日散髮嘅夏巧莘,凌御生更中意束起利落馬尾,感覺好清爽,而且馬尾會擋住後頸,若隱若現嘅感覺特別誘人
凌御生稍稍坐直,側一側身喺褲袋拎出手機,耷低頭安靜咁滑手機
夏巧莘披喺身上嘅冷衫向下滑,凌御生眼尾瞄到,伸手幫佢將冷衫再次披好
夏巧莘突然郁咗一下,嚇得凌御生頓時停頓落嚟,但夏巧莘冇醒,只係耷低頭繼續瞓
凌御生放慢動作,留意住夏巧莘,慢慢坐番好,伸手輕輕撫摸夏巧莘嘅秀髮
其實夏巧莘並冇完全昏睡過去,佢感覺到凌御生嘅溫柔,感覺到佢嘅手正放喺自己頭頂,感覺到佢嘅凝視
夏巧莘嘅心跳可快了一倍,唔知仲以為要心臟病發了,於是緊緊咁閉着眼,但眼皮一動一動的,最終都係忍唔住睜開了眼
微微抬頭,同凌御生嘅視線對上了,凌御生有少許害羞咁收起手
「咳…」凌御生移開了視線,撇開了臉,尷尬咁乾咳咗一聲,然後繼續低頭睇手機


夏巧莘冇出聲,只係微微一笑,然後又再次合上眼小睡
「如果冇遇到你,或者我唔會有咁嘅改變。」凌御生喺心中講道,凌御生嘅心意,大概就只有自己最清楚
「今日係我第一次走堂,仲要連走兩堂…」夏巧莘突然開口輕聲道
「哈哈…」凌御生笑起嚟,「好似我帶壞咗你一樣。」
「琴晚突然瞓唔著啦…今朝差啲就起唔到身…」夏巧莘苦笑道
「諗咩諗到失眠咁慘慘?」凌御生微微一笑道
「冇諗咩,個腦空白一片,但就係點都瞓唔到…」夏巧莘搖搖頭
「冇咗我喺隔離就瞓唔著啦?」凌御生開玩笑道
「唔關事囉~」夏巧莘嘅臉頰瞬間泛起淡淡嘅紅霞,「有冇你我都瞓到。」
「但你琴晚瞓唔到。」凌御生笑起嚟,故意開玩笑
「哼…我唔理你呀!」夏巧莘害羞得生氣,哼咗一聲,鼓起兩泡腮,「陣間小息鐘響你記得嗌我呀!」
「我知啦我知啦!」凌御生心中好滿意夏巧莘嘅反應

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link