[愛情走糖故]兩個人心底中不為人知嘅秘密,成為兩個人間嘅牽引: 69.成績好也是有學問的

小息嘅鐘聲一響起，凌御生就拍醒夏巧莘
「小息啦。」凌御生捉住夏巧莘嘅博頭晃咗兩下
「嗯…」夏巧莘睜開眼，一臉睡眼惺忪咁揉揉眼，打咗個呵欠，「番去啦…」
兩個人各自番到課室，嘉怡見到夏巧莘喺出面孭住書包行入課室，一臉疑惑
「你宜家先番嘅？你平時都好少遲到㗎。」嘉怡望住啱啱坐低喺自己後面嘅夏巧莘
「我今朝有番嚟，只係走堂啦…」夏巧莘喺書包拎咗支水出嚟，飲咗一啖，個人總算精神啲，可以捱到之後嘅堂
「你走堂？我冇聽錯呀嘛？」嘉怡彷彿受咗驚嚇一樣瞪大眼，口都合唔上，從來都冇聽過夏巧莘會走堂，「一等一嘅好學生竟然走堂？」
「真係好眼瞓呀…我行番嚟嗰陣，一邊行一邊瞓就嚟可以…個眼皮都要垂落嚟啦…」夏巧莘諗起今朝早番學嘅情境，「差啲就要撞落燈柱…」
「咁又真係上堂都冇心機嘅…」嘉怡點頭示意明白，「你宜家好啲未呀？」
「好好多啦已經。」夏巧莘點點頭，將水樽放喺櫃桶嘅左邊，「今朝數學堂講咗啲咩呀？」


「冇呀，都係嗰啲啦，佢淨係話嚟緊嗰個星期有個統測。呢個就係今朝嗰兩堂嘅重點。」嘉怡指住出面寫測驗嗰塊板
「咁okay啦～」夏巧莘笑一笑，然後喺功課袋入面拎咗本schedule book出嚟記低咗測驗嘅日期同測嘅課題，「番去再做下題目算啦…」
夏巧莘行到去Locker前面，打開咗Locker門拎出嚟緊嗰啲堂要用嘅嘢，抱住一大疊嘢咁行番埋位坐低
夏巧莘拎咗本數學書出嚟，然後拎出堂課簿，趁住小息呢個空檔重溫一下課題，順便做下題目
夏巧莘喺學校嘅成績其實都唔算差，都算係名列前茅，姊弟兩讀書成績都好，雖然夏巧莘嘅頭腦比唔上夏學謙咁強，但係都差唔晒，都可以到頭十名
「真係好羨慕你呀夏巧莘～」嘉怡慨嘆道，「人又靚讀書又叻～點解咁唔公平㗎？」
「讀書呢啲嘢冇先天嘅，都要靠後天努力。」夏巧莘微微一笑，「你都可以做到。」
「你媽媽一定好開心，你同你細佬讀書都咁叻…我如果有你咁叻，我媽一定開心到跳起。」嘉怡嘅手放喺夏巧莘嘅枱上托住頭講道
「其實平日專心啲上堂，抄下筆記番去溫下睇下就得，冇咩特別嘅技巧㗎～」夏巧莘講道
「我都有抄筆記呀…」嘉怡嘆一口氣


「我所講嘅「抄筆記」，唔係將老師講嘅嘢直接抄落嚟，而係你聽完之後，經過自己嘅大腦分析同理解再抄落去，可以喺隔離用唔同色嘅筆寫低一啲小筆記，提醒自己有咩要留意。你中意嘅話，用螢光筆Highlight都可以。」夏巧莘耐心咁解釋道，「老師講完你未必明，照抄係冇用㗎～要經過自己嘅理解再寫先有用，可以用自己嘅方法寫，唔一定要跟足老師寫嘅一字一句，因為筆記係比我地自己睇。」
「寫筆記都有學問…救命呀真係…」嘉怡淨係聽到都已經皺晒眉頭，叫苦連天
「其實宜家勤力都唔算太遲。」夏巧莘鼓勵嘉怡，「宜家努力都仲可以追得番。」
「我以後唔明你直接解釋比我聽咪得囉～」嘉怡一臉誠懇咁望住夏巧莘
「可以呀，我盡量答你啦～」夏巧莘微笑道
夏巧莘講嘅說話其實不無道理，只要肯努力肯花時間，其實永遠都唔算遲
上堂嘅鐘聲響起，夏巧莘將數學書同埋堂課簿都收入櫃桶，再拎出中文書放喺枱面，再睇一次今堂會講嘅嘢，做個小小嘅課前預習
當Miss Li行入嚟嘅時候，夏巧莘正托住頭發呆
「唔洗起立啦，今日課程有啲急，希望大家專心啲。」Miss Li拎起一疊筆記派發比同學
夏巧莘收到筆記之後，好快咁睇咗一睇，大概知道要點樣，然後喺筆袋入面拎咗支藍色原子筆同淺黃色嘅螢光筆出嚟


望住筆記，拎起螢光筆，提起手，就開始Highlight重點，呢個都係自習嘅一種

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link