[愛情走糖故]兩個人心底中不為人知嘅秘密,成為兩個人間嘅牽引: 73.初次「見面」

夜晚 20：45
凌御生坐喺酒吧嘅水吧前，手摸着酒杯
「凌少，今晚咁好心情落嚟飲酒呀？」企喺水吧入面正在洗杯嘅經理阿歡講道，「你以前都唔會成日落嚟。」
「今晚突然想飲酒，所以落嚟坐下飲下酒…」凌御生低頭一笑，視線停留喺酒杯上
「最近Ella都冇番工，佢冇事呀嘛…？」阿歡問道
「佢冇事，都係休息下啫。」凌御生講道
「Ella真係個孝順女嚟，因為媽媽有病嚟番工。本來以為佢會為咗錢咩都做，但佢有時都幾硬頸。」阿歡拎起抹布，細心咁將酒杯抹乾淨，「當初佢嚟嘅時候，一嚟就開咗條件，話佢淨係會陪飲酒，其他嘢一樣都唔會做。」
「佢嘅倔強或者都係好事嚟…」凌御生輕輕一笑，將酒杯提起放到嘴邊，呷一啖酒
「估唔到凌少會中意呢一類型嘅女仔。」阿歡微笑起嚟，將啱啱抹好嘅杯放到杯架上，然後又拎起另一隻杯開始抹
「哈…」凌御生笑一笑，輕聲講道：「我都估唔到我會咁中意佢…」


「你唔介意咩？佢做過陪酒。」阿歡望一望凌御生
「唔介意。」凌御生好迅速咁回答，「但我唔想佢再做陪酒…」
凌御生的確唔介意佢做過陪酒小姐，但係冇話過會比佢繼續做陪酒
「所以先叫你調佢出嚟。」凌御生再講道
當初凌御生知道夏巧莘喺呢度做陪酒，大概係喺半年前…
嗰晚凌天傲要凌御生落去酒吧幫佢拎番份資料番嚟，凌御生雖然心中有一萬個不願意，但係都係出咗去，因為眼見老豆嘅倦容，所以先幫佢落去拎一下
凌御生行到入去更衣室旁邊嘅一個小房間，嗰度係放酒吧資料同各種文件嘅地方，平日呢間房都會上鎖，要有鎖匙先開到呢間房嘅門
凌御生開咗門之後，行到入去右邊嘅木櫃前，一抽個文件夾出嚟嘅時候，因為位置太逼所以將旁邊嘅文件夾都唔小心抽埋出嚟
「唧…」文件夾中嘅紙散落一地，凌御生不滿咁唧了一聲，將凌天傲要嘅文件放喺旁邊嘅茶几上然後先蹲低收拾
凌御生將啲紙疊番好，數一數齊唔齊，但有一張紙上面嘅相片卻吸引咗凌御生嘅目光


「呢個女仔…」凌御生一眼就認得出照片上嘅女仔
嗰副像仙女下凡一樣清麗脫俗嘅外表，凌御生點會唔認得佢？
凌御生好奇望一望佢填嘅稱位，唔望由至可，一望嚇咗一跳
「竟然係做陪酒…？」凌御生輕輕一笑，「原來都係個貪錢嘅女人～」
凌御生望完之後，決定要好好咁睇下呢個女仔到底有幾貪錢，於是就諗咗一個辦法，就係「等價交換」
本來以為呢個女嘅真係會貪錢到咩都肯做，但卻喺無意中發現咗佢做陪酒同急住要錢嘅原因
最後更對呢個女仔動真情了，明明一開始只係諗住挽下感情，挽夠就算，點知自己卻動了情，真係完完全全咁愛上咗呢個女仔，比呢個女仔迷住咗
「當初冇踏出一步嘅話，我今日就唔會比佢迷到咁…」凌御生露出淡淡嘅笑容，無可奈何咁講道
「咁有踏出一步總好過咩都唔做嘅～」阿歡將最後一隻杯都抹乾淨放到杯架上，「呢個都算係你地兩個人之間嘅緣份嚟。可能係有緣無份，可能係有緣有份…」
「唔知呀…」凌御生將最後一啖酒都飲埋，笑咗一笑，然後遞咗張信用卡比阿歡


「凌少你一個人番唔番到屋企㗎？呢隻酒個酒精濃度好勁㗎。」阿歡帶着少許擔心咁幫凌御生刷卡，「係我地呢度最新出，你真係番到去？要唔要打比老闆嚟接你？」
「唔洗…」凌御生遞一遞手示意唔需要
一踏出酒吧門口，個人已經天旋地轉要企唔穩嘅狀況
「你有冇事呀？」
忽然有人扶住凌御生嘅手臂，一把溫柔嘅聲音傳入凌御生嘅耳中

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link