[愛情走糖故]兩個人心底中不為人知嘅秘密,成為兩個人間嘅牽引: 84.專屬天使

「今晚一齊食飯好唔好呀？」凌御生主動提出邀請
「好呀～」夏巧莘迅速答應，心中默默高興：「又可以見佢耐啲啦～」
凌御生行到鋼琴前坐低，打開琴蓋，充滿着骨感美嘅手放喺琴鍵上
夏巧莘托住頭，似乎凌御生仲有好多令佢出奇不意嘅嘢
有時候聽人彈琴都係最高嘅享受嚟，當然前提係對方彈得好
夏巧莘悠閒咁坐喺梳化上面睇手機
「今晚食咩呀？」夏巧莘個頭靠咗喺梳化嘅扶手上面
凌御生回答佢，只係繼續沉醉喺鋼琴嘅世界中
夏巧莘笑而不語，靜悄悄地拎起手機偷偷拍下一張相
等到樂曲完結，凌御生先緩緩回頭


「你想食咩呀？落唔落去下面Food court食？」凌御生閂上琴蓋，行向梳化
「好呀，落下低Food court食囉～」夏巧莘露出甜甜嘅笑容
「嗯…」凌御生行到梳化坐低喺夏巧莘隔離，頹廢咁靠住椅背坐，「陣間落去食。」
「你件衫點呀？染晒血…」夏巧莘望住掉咗喺茶几上面嘅裇衫
「買過件囉，唔係點啫。」凌御生無奈地笑，「仲有一件後備，著住先。」
盡管凌御生喺夏巧莘面前笑得幾開心，心中嘅不安同恐懼始終無法抹去…
最擔心嘅事，好似已經近在咫尺，但最令人不安嘅係你唔知幾時會再發生一樣嘅事
可能其他人唔會明白凌御生嘅陰影有幾嚴重，可能會覺得係凌御生嘅唔成熟，什至會覺得係佢唔喺陰影之中走出去
但係…「親眼所見」同「親耳所聞」係有好大嘅差別，嗰種視覺上同喺心理上留落嚟嘅衝擊，係一世都唔可能忘記
凌御生拎起染咗血嘅白裇衫企起身，行到去放喺廚房嘅大垃圾桶前，想將裇衫丟棄


但佢冇即時將白裇衫丟棄，反而好似呆咗一樣望住件裇衫，兩秒後鬆開手，裇衫掉落垃圾桶入面
凌御生行出露台，門冇閂上，風吹來，將掛喺門上嘅白色紗簾吹起
夏巧莘見凌御生咁耐都未番嚟，擰轉頭望，見到露台嘅玻璃門開咗，於是坐梳化企起身，行到露台嘅門前，見到凌御生手肘放喺欄杆上，頭低着並被雙手抱着，企喺度吹着風，完全就係有心事嘅樣子
凌御生一合埋眼，成個腦都係啱啱發生嘅事
夏巧莘行咗出去，從後輕輕攬住凌御生嘅腰
凌御生顫了顫，強擠出笑容，擰轉身，背靠着後面欄杆
「做咩呀？」凌御生勉強地露出笑容
「辛苦你啦…」夏巧莘攬實凌御生，溫柔地安慰道
凌御生愕一愕然，再次撐起笑容
「我有咩辛苦呀？」


「我地講過喺對方面前做番自己…」夏巧莘鬆開攬住凌御生嘅雙手，微微抬頭望凌御生，溫柔嘅笑容掛喺臉上，「你唔洗死撐呀～明明心入面難受，但又要自己一個人撐住…唔係只有我嘅身邊有你，你嘅身邊都有我㗎！」
凌御生望住呢個女仔，善解人意嘅佢睇穿咗自己…佢冇講咩事，只係比咗一個溫柔嘅擁抱佢
上帝係咪將身邊嘅其中一個天使派咗落嚟，派到佢身邊？
「我冇事呀…」凌御生伸手放喺夏巧莘嘅頭上，微微一笑
夏巧莘真係有一種特別嘅魔力，僅僅係一個笑容，一個小舉動，就可以將凌御生嘅煩惱瞬間清走
「真係冇事？」夏巧莘側側頭，一臉可愛咁問道
凌御生笑一笑，點點頭
「真係冇事，多謝你。」凌御生雙手插着褲袋，靠喺後面嘅欄杆
夏巧莘臉頰泛起紅霞，微微一笑

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link