翌日一大清早,夏巧莘依舊喺同樣嘅時間登上巴士,凌御生亦依舊搭上同一班車
「早晨。」夏巧莘望住剛坐低喺自己隔離嘅凌御生露出一個甜甜嘅笑容
「早晨。」凌御生都笑一笑
夏巧莘留意到凌御生的手臂上冇貼任何紗布
「你做咩唔貼番紗布呀?」夏巧莘輕皺起眉頭
「都冇流血啦。」凌御生遞起手比夏巧莘睇
手上一道又一道嘅刀傷,傷口仍然紅紅的,夏巧莘又忍唔住心疼起嚟
「你細佬最近都冇同你一齊番學嘅?」凌御生轉移話題,避免一直喺同一話題上
「係呀,佢最近都早過我出門口,先番學校。」夏巧莘微微低頭望住手機,伸手揉揉眼,「琴晚我呢,做完筆記先瞓,但做完嗰陣已經係2點幾。」
「我琴晚都好夜瞓,灘喺床度轉嚟轉去,最後去到3點先瞓。」凌御生打咗個呵欠


夏巧莘自然就靠喺凌御生嘅博頭上,凌御生冇感到愕然又或者點,兩人都已經唔太介意其他人點諗點睇,已經唔在乎其他人嘅目光
兩個人都抱住同一個心態:「反正點都會比人傳緋聞。」

凌御生執好書包,喺課室等緊鍾家豪去完廁所番嚟
過咗成15分鐘,鍾家豪都未番嚟,凌御生便拎住鍾家豪個書包行出課室,打算去廁所搵佢,睇下佢到底搞咩搞咁耐
踏出課室經過隔離班房嘅時候,見到課室中只有夏巧莘一人,佢正喺度慢慢咁收拾東西,揀緊今日要拎邊啲書番屋企溫書好,然後將唔用嘅嘢抱起,放到Locker入面
課室嘅門冇閂,凌御生靠喺門框上,雙手插住褲袋,靜靜地看着夏巧莘嘅一舉一動
「咦?」夏巧莘一轉身就見到企喺門口嘅凌御生,「你未走嘅?」
「係呀,等埋鍾家豪,佢話去廁所,但去咗好耐都未出嚟。」凌御生行入課室,走向夏巧莘,「你仲喺度嘅?」
「啱啱落堂嗰陣搵Miss講咗兩句,所以咪遲咗走。」夏巧莘微笑道,伸手閂上Locker門,扣番個鎖上去,望到凌御生手上拎住嘅袋,「個袋係鍾家豪嘅?」


「陣間又番去溫書呀?」凌御生微微靠住夏巧莘前方嘅座位嘅木櫈背
「咩又啫…」夏巧莘無奈一笑,將書本放入書包,「我地遲啲考完試再一齊去挽好唔好呀?」
「好呀,睇你想去邊啦~」凌御生微微一笑
此時鍾家豪去完廁所出嚟,經過夏巧莘嘅課室時見到兩人正開心咁傾緊計,有講有笑的
心中感覺不是味兒,但都微笑着行入課室
「喂,凌御生,溝完女未呀?」鍾家豪企喺門口笑道
「佢嚟啦。」夏巧莘望住門口微微一笑
「邊個溝女呀?」凌御生無奈咁望向門口方向
「你囉唔係咩?」鍾家豪行入去課室,走向凌御生,「去夾Band呀!阿文同軒軒等緊我地。」
「得啦,係你去廁所去得耐咋嘛。」凌御生企起身


「抱歉啦校花,今日阿生係我㗎~」鍾家豪搭住凌御生嘅博頭,對夏巧莘微笑道
「唔緊要。」夏巧莘笑一笑,凌御生對住鍾家豪反咗一個白眼,「你地約咗人就快啲去啦~無謂要人等嘛~」
「咁我地行先啦…」凌御生望向夏巧莘微笑道,「你番去小心啲啦。」
「嗯,知啦!你快啲走啦~」夏巧莘點點頭
「拜拜~」鍾家豪對夏巧莘揮揮手,就拉住凌御生離開課室
兩人行到去門口嘅時候,凌御生捉住門框然後回頭望夏巧莘
「夏巧莘!」凌御生對住夏巧莘嗌道
「做咩呀?」夏巧莘嘅目光由枱上嘅嘢移向門口,露出甜甜嘅笑容
「下次…再一齊出去挽…」凌御生有少許害羞咁講道
「好呀~」夏巧莘好快就答應咗
望住凌御生同鍾家豪離開嘅身影,夏巧莘無奈一笑,然後收拾好東西就離開

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link