[愛情走糖故]兩個人心底中不為人知嘅秘密,成為兩個人間嘅牽引: 92.一場早就分出勝負的競賽

「你真係好中意佢，從來都冇見過你咁主動對女仔好。」鍾家豪收回搭住凌御生博頭嘅手
鍾家豪行喺前面，拉開學校嘅大閘，凌御生行喺後面，兩人一齊踏出校園
凌御生笑而不語，只係露出笑容，但佢嘅笑容已經代佢回答咗一切
鍾家豪默默低頭微微一笑
望住眼前嘅呢個好兄弟，自從佢識咗校花之後，凌御生就慢慢變成咗另一個人一樣
由以前講嘢都冷漠無情一樣去到宜家都會識笑下，有時都會變得好溫柔
由以前成日唔番學逃課，成日犯事，去到宜家日日都乖乖番學乖乖聽書
凌御生一切嘅轉變都係識咗夏巧莘先會有，但都未嘗唔係一件好事
鍾家豪低頭不語，回想起第一次見到夏巧莘嘅情境，嗰陣已經係中一嘅事嚟…
「隔離班有個好靚嘅女仔呀！」一個男仔衝入課室


鍾家豪同其他男仔一樣，頓時係去望兩眼睇下有幾靚
望到喺隔離課室嘅夏巧莘正乖巧咁坐座位上同幾個女仔有講有笑，笑起嚟嘅時候好靚，溫文爾雅的
「好靚呀…」鍾家豪喺心中講道同時吞咗一啖口水
呢個係鍾家豪第一次見到夏巧莘，心中的確有啲悸動
去到學期中嘅時候，鍾家豪有一日同其他男同學一齊喺籃球場上打波，同隊友之間有啲碰撞，膝蓋落地，擦傷咗膝蓋
「我地去酙啲水番嚟洗傷口，你唔好郁呀！」其中一個男仔講道
「我地好快番嚟！」其餘幾個男仔都跟埋去
「喂！」鍾家豪叫都叫唔住佢地
鍾家豪獨自一人行到旁邊坐低等朋友番嚟，膝蓋擦傷了，血一直滲出嚟
呢個時候幫體育老師點完儲物櫃入而嘅嘢嘅夏巧莘剛好經過籃球場，亦見到鍾家豪一人坐着


「你傷口流緊血，你唔洗去醫療室呀？」夏巧莘行過，微笑問道
「哦…我啲朋友…去咗酙水…幫我洗傷口…」鍾家豪見到係夏巧莘嘅時候呆咗一呆，頓時緊張起嚟，吞吞吐吐咁講道
「傷口啲血都流緊出嚟啦，抹一下。」夏巧莘喺裙袋中拎咗包紙巾出嚟遞比鍾家豪
「唔、唔該…」鍾家豪小心翼翼咁接過紙巾，抽咗一張之後遞番包紙巾比夏巧莘
「唔洗啦，你留住啦，你陣間都要抹傷口。」夏巧莘微微一笑講完之後便離開咗籃球場
鍾家豪望住手上嘅紙巾，心中突然噗噗跳動，由嗰一刻開始，鍾家豪每次見到夏巧莘，心都會突突跳動，或者就係由嗰一刻開始，鍾家豪就默默咁中意夏巧莘
鍾家豪從來都冇表白嘅打算，一直都只係將呢份感覺放喺心底
但意想不到嘅係，自己嘅好兄弟都中意咗呢個女仔，每次提起或者見到呢個女仔，凌御生臉上就自然咁掛上笑容，什至對呢個女仔嘅愛意都要從佢溫柔、寵溺嘅眼神中溢出嚟
凌御生因為夏巧莘而改變，佢兩個之間嘅親暱縱使會令鍾家豪唔太好受，但係或者對所有人嚟講，呢份心意永無人知都係一件好事嚟
「我真係好中意佢。」凌御生突然開口，鍾家豪抬頭望佢


凌御生講嘅「我真係好中意佢」係肯定句，冇絲毫嘅猶疑，鍾家豪自問自己做唔到咁堅定咁講出呢句說話
「我睇得出～」鍾家豪笑道，然後伸出拳頭，「我一定撐你。」
凌御生笑一笑，伸出手同鍾家豪碰拳

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link