[愛情走糖故]兩個人心底中不為人知嘅秘密,成為兩個人間嘅牽引: 94.「我一直都會在」

去到酒樓嗰陣，佢地直接入咗廂房，明明只有四個人，但就坐張大枱，感覺更加唔自在
「睇下食咩。」凌天傲遞咗張有圖有字嘅紙比凌御生，「新抱仔食咩就剔啦！」
聽到凌天傲對夏巧莘嘅稱呼，夏巧莘同凌御生都怔咗一怔
「睇下食咩，你想食咩呀？」凌御生伸手摸一摸夏巧莘嘅頭，柔聲問道
「嗯…」夏巧莘醒過嚟，望一望凌御生然後望答菜單，「想食腸粉。」
「要咩腸？叉腸定蝦腸定齋腸？」凌御生問道
「你想食咩腸？」夏巧莘反問凌御生
「叉燒囉～」凌御生喺叉燒腸粉隔離嘅方格劃咗個1字，「仲有呢？食唔食奶黃包？」
「好呀好呀，奶黃包好食！」夏巧莘帶着小興奮，自然就伸手捉住凌御生嘅前臂
「知啦知啦～」凌御生嘅心瞬間就緊緊咁收縮咗一下，然後噗噗、噗噗咁跳動，「仲有冇咩想食呀？」


「你揀～」夏巧莘側着頭，臉頰輕輕貼住凌御生嘅博頭，凌御生頓時望向夏巧莘，然後溫柔一笑，「我唔偏食。」
「好呀…」凌御生拎起筆再揀嘢食，低着頭，嘴角揚起
今次阿年親眼睇到凌天傲所講嘅溫柔
「你知唔知呀，阿生從來都唔會咁溫柔。」阿年對夏巧莘講道，「我睇住佢大，佢從來都冇試過咁溫柔咁講嘢同笑。」
「咳咳…」凌御生忽然尷尬咁咳咗兩聲，希望阿年唔好再講落去，因為在場只有夏巧莘同自己知道，佢地並唔係情侶
凌御生擔心，阿年再講落去，夏巧莘就會察覺到自己中意佢
而呢個時候，夏巧莘聽到阿年嘅說話，心裏暗自高興，果然自己對凌御生嚟講係有啲唔同
「剔完啦。」凌御生講嘅瞬間，經理咁啱行入嚟，凌御生將張紙遞比經理，經理接過張紙就行咗出去
「新抱仔，你讀書叻唔叻㗎？」凌天傲問道
凌御生主動咁拎起茶壺幫大家酙茶，凌天傲留意到凌御生嘅主動窒咗一窒


「你飲茶定水？」凌御生細聲問夏巧莘
「水。」夏巧莘答完之後就回答埋凌天傲嘅問道，「都Okay，一般。」
「你全級考頭十都叫一般？」凌御生聽到之後即刻就反問道
「你讀書咁好得閒就帶埋阿生一齊溫書，佢成績都要進步多啲。」凌天傲呷咗一口茶，然後主住凌御生，指一指佢，「雖然已經冇咁多警告信收番嚟。」
「嗯。」凌御生竟然冇反駁，乖乖嗯咗一聲
「你到底收咗幾多警告信？」夏巧莘有啲好奇咁問道
「呃…記咗兩個大過，三個小過，五個缺點。」凌御生尷尬咁耷低頭撥一撥頭髮，「算啦，你呢啲優等生淨係知咩係優點同小功大功，邊會知咩係警告…」
「但你最近都冇記嘢啦～」夏巧莘無奈講道
「睇下人地呀，又乖讀書又叻。」凌天傲講道
「人地仲係校花添～」凌御生伸手掐住夏巧莘嘅臉頰


「唔怕有情敵咩？」阿年即刻問道，夏巧莘頓時感興趣，望住凌御生
「怕咩啫？」凌御生鬆開掐住夏巧莘嘅手，自信地揚起嘴角，同夏巧莘對望著，「佢係比人搶得走嘅，咁就搶走算啦～」
「咁有信心唔會比人搶走呀？」阿年笑道
凌御生只係笑一笑，冇回答阿年嘅問題，但喺凌御生心中的確有自信可以留住夏巧莘喺佢身邊，而且佢知道夏巧莘中意佢呢個秘密
夏巧莘亦知道凌御生唔會離開佢，因為凌御生承諾過唔會離開夏巧莘，會一直喺佢身邊
兩個人相視而笑，彼此都清楚對方並唔會離開自己

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link