[愛情走糖故]兩個人心底中不為人知嘅秘密,成為兩個人間嘅牽引: 107.正因為是最親的人

夏巧莘行入凌御生嘅睡房，打算拎番個電話，行到去床頭櫃前，拎起電話嘅同時望到琴晚放喺床頭櫃上嘅嗰盒套套
夏巧莘嘅臉頰頓時不由自主地滾燙起嚟，臉頰泛紅
諗起琴晚嗰陣，夏巧莘個心都緊縮一下，差啲就以為凌御生琴晚真係會忍唔住直接要咗佢
夏巧莘嘅手機忽然響起嚟，夏巧莘望向手機嘅螢幕，打電話過嚟嘅聯絡人名稱…「細佬」
夏巧莘握着手機，猶疑緊應該要接聽定係唔接聽
「食得啦～企喺度做咩呀？」凌御生推開房門行向夏巧莘
凌御生行到去夏巧莘嘅身旁，見到夏巧莘手放亮起咗嘅手機螢幕，手機一直喺度震，但夏巧莘始終冇㩒接聽，只係若有所思咁望住手機
最後手機來電嘅畫面彈咗出去，收咗一條未接來電嘅通知
「夏巧莘…」凌御生伸手輕輕摸夏巧莘嘅秀髮，「你始終要比個回答佢，佢始終都擔心你㗎…」
「嗯…」夏巧莘點點頭，鎖上手機螢幕


「出去食嘢先啦～」凌御生手搭喺夏巧莘嘅博頭上
「嗯…」夏巧莘點點頭
今日嘅早餐係煎雙蛋、煙肉數塊，仲有四條蜜糖腸仔
夏巧莘拎起叉食嘢，填飽一下快要「咕咕」叫嘅肚，夏巧莘一直沉默，臉上嘅愁緒冇減少，雖然冇講啲咩，但係由眼神中都可以睇到佢心煩着
凌御生將夏巧莘嘅表情都睇喺眼中，心中不禁嘆一口氣
「小寶貝…」凌御生咁樣一嗌，夏巧莘就抬頭望佢，「唔好咁愁啦～其實你細佬冇做錯。」
夏巧莘有啲愕然凌御生會咁講
「佢都忍咗咁多年啦，佢自己都知道冇可能一齊唔係咩？」凌御生微微揚起嘴角，笑容淡淡的，「佢都係擔心你啫。」
「我知道…佢係我細佬，對咗佢咁耐，我當然知佢緊張我，知佢在乎我啦…只係一時之間我要接受佢唔係我親生細佬，做咗16年姊弟，然後話我知我地唔係親姊弟…」夏巧莘咬着唇，忍着淚，沉着氣講道，「然後仲要話我知佢一直都中意我，成件事嚟得好突然，突然間話唔係親姊弟，突然間話我知佢中意我…太突然啦…」
夏巧莘對夏學謙當然只有姊弟情，但係佢對呢個細佬都係疼愛的，但要一時間接受兩個打擊，真係好難接受


「我地係最親嘅屋企人…爸爸離開咗呢個家，媽媽病咗，屋企就剩番我同細佬…」夏巧莘講嘅時候表情好柔和，揚起嚟嘅嘴角帶着一絲愉悅，「細佬係我嘅依靠，有咩都係佢喺我身邊。佢一直以嚟都好保護我，呢個我知道…所以我都好依賴佢，但係佢咁樣一講，我就唔可以再依賴佢…」
「以後有我呀！以後依賴我就好。」凌御生伸手拖住夏巧莘嘅手，「以後我做你嘅依靠。」
「嗯！」夏巧莘露出幸福嘅笑容
「但你都要同你細佬和好咗先。」凌御生講完嘅同時，夏巧莘有啲迷惘，唔知到底要點樣和好，「你想幾時番去呀？」
「唔…」夏巧莘有啲猶疑不決
「你要時間再靜下嘅就再留多晚囉，但星期一番學始終會見到面。」凌御生講道，但見到夏巧莘一臉迷惘嘅時候，又唔捨得要趕佢走，只想再寵佢多啲，「你再諗下啦～」
「嗯…」夏巧莘乖乖點頭，耷低頭安靜地繼續食早餐
凌御生伸手摸一摸夏巧莘嘅頭，夏巧莘嘅嘴角上揚一秒都冇就再塌下去
呢個時候夏巧莘嘅手機再次響起嚟，夏巧莘輕皺起眉頭望住放喺手旁邊嘅手機
「我幫你聽。」凌御生伸出手，定睛望住夏巧莘



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link