[愛情走糖故]兩個人心底中不為人知嘅秘密,成為兩個人間嘅牽引: 111.糟了這次

凌御生第一個反應，係喺褲袋拎出電話打比佢老豆凌天傲
「喂，你呢個時間打比我做咩？」凌天傲平靜嘅聲線中夾雜了疑惑
「老豆，有人捉走咗夏巧莘！」凌御生已經係處於一個焦急嘅狀態，講嘅時候幾乎係怒吼一樣
凌天傲心中一驚，原來佢地目標唔係佢兩父子，係夏巧莘
「你過嚟社團先。」凌天傲冷靜咁講，「你今日有冇揸車？」
「冇呀！」凌御生皺起眉頭，「我宜家過嚟！」
凌御生望向夏學謙再望一望鍾家豪
「我地搭的士。」凌御生講完之後，三個男仔跑去的士站
一落咗車之後，凌御生即刻跑入酒吧，去到後面上樓梯跑上社團
夏學謙見到呢間酒吧，佢瞬間就明白，呢間酒吧係凌御生屋企所開，所以凌御生一早就知道夏巧莘喺呢度番工…但係呢啲嘢對夏學謙嚟講並唔重要


夏學謙同鍾家豪跟住凌御生上去，鍾家豪行到上二樓先邁步行，夏學謙跟喺佢後面，鍾家豪直行，行到去第二間房就入去
凌天傲就坐咗喺入面，已經等緊佢地嚟
「佢係夏巧莘細佬。」凌御生指住夏學謙，「佢啱啱同夏巧莘一齊。」
「細路，啱啱打你同捉走你家姐嘅係咪呢幾個人？」凌天傲對住夏學謙招一招手，示意叫佢行去自己旁邊
夏學謙心中雖然有啲驚，但係應該唔會有咩事，於是行去凌天傲隔離望住個電腦螢幕
「唔…」夏學謙有啲猶疑，「啱啱太快啦一切都，我認唔晒咁多個，但係我認得呢幾個。」
夏學謙指一指電腦螢幕上其中幾個男人，凌天傲揚嘴一笑
呢個時間阿津喘住氣咁跑入嚟
「老大…！」阿津入到嚟見到咁齊人，都心知不妙
「點呀？係咪有咩進展？」凌天傲自信地揚起嘴角


「同你諗嘅一樣，的確係佢！」阿津點點頭講道
「你知係邊個做嘅？」凌御生疑惑咁望向凌天傲
「早就懷疑佢有問題，叫阿津去查，果然不出我所料。」凌天傲講道，然後笑一笑，講出嗰個人嘅名
…
另一邊廂，新界郊外
幾個男人落車，然後一人抬腳一人抬手咁將仍然暈倒未醒嘅夏巧莘抬入一間鐵皮屋入面
鐵皮屋入面有一個廁所同一間空房，幾個男人抬住夏巧莘入去
佢地早就喺車上將夏巧莘嘅手反綁喺背後，但佢地冇蒙上佢嘅眼，好似完全唔怕夏巧莘會見到佢地個樣一樣
佢地將夏巧莘個書包掉埋咗一邊，然後放咗夏巧莘喺地上，夏巧莘無力地瞓咗喺地面上
幾個男人開咗幾張櫈，悠閒咁坐喺隔離嗰張啡色枱前


「大哥咁宜家點呀？就咁掉條女喺度呀？」其中一個戴口罩嘅男人望住身邊著背心嘅男人問道
「大佬話等佢過嚟先處理，叫我地唔洗做啲咩，我地任務完成啦。」著住背心嘅男人淡然地講道
「聽講佢係凌天傲個未來新抱嚟。」另一個眉邊有刀疤嘅男人講
「佢個仔有本事囉～」戴口罩嘅男人輕輕一笑，「不個睇嚟佢條女就冇咁好彩啦～」
「生得咁靚，咪又係要死。」著背心嘅男人勾唇一笑，搖搖頭
呢個時候，哥羅芳嘅效用完結，夏巧莘慢慢睜開眼，發現自己身處嘅地方完全唔似自己屋企
「啱啱…」夏巧莘記起啱啱放學嘅事，郁咗兩郁見到眼前幾個望住自己嘅陌生男人，頓時害怕起嚟，「你、你地想點呀？」
夏巧莘講呢句嘅時候，一個著西裝嘅男人喺門口行入嚟
夏巧莘呆咗咁望住呢個男人，瞬間就心寒起嚟

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link