[愛情走糖故]兩個人心底中不為人知嘅秘密,成為兩個人間嘅牽引: 114.有其父必有其子

夏巧莘抽抽鼻子，眼淚同血都冇止住
「小姑娘，你同阿生拍咗拖幾耐？」阿年問道，然後又自問自答，「應該都唔係好耐。」
夏巧莘仍然緊閉着小嘴，咩都唔講
「揀個真係保護到你嘅男人好重要。」阿年拎出一疊乾淨嘅紗布，然後蹲到地上，將紗布放喺夏巧莘正在流血嘅傷口上，用力㩒住幫佢止血
夏巧莘唔明佢嘅意圖係咩，點解要傷害完自己然後又再幫自己？
「做黑幫男人背後嘅女人唔容易。」阿年一臉沉重咁講道
夏巧莘靜咗落嚟冇出聲，只係默默望住阿年幫佢止緊血嘅手
「到底你同凌御生嘅媽媽有咩關係…？」夏巧莘抽着鼻子，怯怯地問道
「朋友，好好嘅朋友。」阿年猶疑咗兩秒先回答，然後笑一笑答：「你知唔知呀，凌御生同佢老豆真係好似。」
「你想講咩呀…？」夏巧莘定睛望住阿年


「有其父必有其子，你覺得佢真係會嚟咩小姑娘？」阿年挑一挑眉，輕輕一笑，「當年佢老豆同凌御生一樣，話會好好保護自己嘅女人，然後最後…最後冇救到晴晴，晴晴咪又係死咗！」
阿年一腳將摺櫈跌開，夏巧莘比佢呢個舉動嚇親，立即好似忘記咗腳上嘅傷，忍痛縮起雙腳
「冇膽！如果嗰陣晴晴跟我嘅話，最後會死？」阿年拎出小刀，刀面貼住夏巧莘嘅下巴，刀鋒指住夏巧莘嘅頸
夏巧莘瞬間向後縮，但係背後面已經係牆嚟，所以都避唔到去邊
「咁關我咩事呀！」夏巧莘皺起眉頭，怯怯地問道
「晴晴知道佢未來新抱落去陪佢一定好開心。」阿年笑道，「佢兩父子…唔值得擁有咁好嘅人生…！」
…
凌御生一人喺睡房呆坐喺書枱前，手上拎住夏巧莘送比佢嘅嗰隻錶
「我一定會盡快搵到你，一定會將你平安帶番嚟…」凌御生握緊夏巧莘送比佢嘅DW手錶
鍾家豪啱啱沖完涼喺廁所行出嚟，佢推門入凌御生嘅睡房就見到佢坐喺度呆望住手錶


凌天傲怕凌御生會做衝動嘅事，會魯莽行事，所以搵鍾家豪喺度睇住佢
鍾家豪行入凌御生嘅睡房，一下子就注意到放喺床頭櫃上嘅Chip，鍾家豪微微一笑，但喺眼神中卻流露出少許嘅難受
「你早嘅瞓啦，如果唔係點去救佢？」鍾家豪走向凌御生
「瞓唔著…」凌御生緩和了語氣，「一諗到佢身陷險境我根本就瞓唔到。」
「我第一次見你咁樣發脾氣，見你咁情深…」鍾家豪苦笑道，「以前你都唔係咁樣，你一直都係對所有人冷漠，冇人例外。我本來以為係因為嗰個人係校花，所以你先會咁樣，但原來唔係…」
「我都係第一次，知道原來自己仲有咁樣嘅一面…」凌御生嘅手摸住錶面，「你有冇中意過女仔，從來都好似冇聽你講過…」
鍾家豪聽到呢個問題嘅時候，不禁吞咗一啖口水，靜咗落嚟，喺心中苦笑着說：「兄弟你唔會想知我中意邊個…」
「陪我吹下水啦！」凌御生艱難地露出笑容，「你有冇中意過邊個啫？」
「你估下～」鍾家豪無奈咁笑道，「你笑起嚟都掩蓋唔到你嘅擔心。」
「夏巧莘係我嘅唯一…呢一刻冇嘢比佢重要…」凌御生淡淡嘅一句，從反映出佢內心有幾在意嗰個女仔，「我嘅世界中有佢，我先係我，佢…都一樣…」


鍾家豪睇喺眼裏，明白一切…明白夏巧莘對凌御生嚟講係一個「非一般重要」嘅存在；凌御生對夏巧莘嚟講亦係意義非凡，係對方嘅及時雨一樣，來得剛好…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link