[愛情走糖故]兩個人心底中不為人知嘅秘密,成為兩個人間嘅牽引: 116.追蹤器出場

阿津聽到辦公室嘅閂門聲，就瞬間離咗會議室行去辦公室
「做好未？」凌天傲問道
「已經做好，為咗萬無一失，我放咗兩個追蹤器。」阿津講道
「好，咁宜家就只係要等佢去藏參地。」凌天傲自信一笑，佢深信今次一定可以救番夏巧莘番嚟
凌御生一放學就準備趕過去社團，平時凌御生好少去社團，但係為咗夏巧莘，佢唔可以唔去，凌御生特別緊張，搞到鍾家豪都跟住一齊緊張
凌御生同鍾家豪飛奔去樓梯，一去到樓梯位就見到夏學謙落嚟
「你地係咪去酒吧？」夏學謙主動問道
「嗯，你一齊？」鍾家豪問道
「好。」夏學謙點點頭
三個男仔瞬間跑落樓梯，前面啲人見佢地咁急都紛紛讓開晒


「夏學謙幾時同佢兩個咁熟？」其中一個讓路嘅女學生同企佢隔離嘅女仔講
「點知…」企佢隔離嘅女仔聳聳肩
喺社團辦公室嘅阿津瞬間喺手機開咗追蹤器嘅定位
「佢開車番緊屋企…」凌天傲望住車駛嘅方向
「佢會唔會番屋企換車再出去？洗唔洗派人出去跟住佢？」阿津嘅眉頭輕輕一皺
「以我所知阿年得呢架車，佢再坐呢架車出去嘅機會好大。」凌天傲望住手機上嘅追蹤器位置，「我地要盡快搵到位置去救人，到時帶多幾個兄弟去救人。」
「知道。」阿津點頭
凌御生、鍾家豪、夏學謙三人嚟到蘭桂芳，然後跑上去酒吧
入到酒吧之後，阿歡望住佢地三個人跑咗去後面樓梯上去
凌御生一上到去，二話不說喘着氣，急步行去辦公室，一下子打開門


「老豆點呀？有冇消息呀？」凌御生將個書包除落嚟順手就掉去辦公室中央嘅梳化上
鍾家豪同夏學謙跟喺後面入嚟，夏學謙閂上門，兩人將書包放喺梳化上，然後行到去辦公桌前
「阿津已經裝咗追蹤器喺阿年嘅車上面，宜家只要等佢開車過去就得。」凌天傲嘅視線移到凌御生身上
「唧…！」凌御生不耐煩地咬着牙關，握緊拳頭，然後轉身就行去梳身坐低
「坐下先啦，一有消息同你地講啦…」凌天傲望住凌御生一到心急如焚嘅樣子無奈咁講道，「總之我有信心呢兩日內一定救到新抱仔番嚟啦。」
凌御生坐喺梳化上，臉色已經唔好，一言不發板起臉坐着
鍾家豪同夏學謙都唔敢講啲咩，感覺上再講一句凌御生就真係要發脾氣，所以只好默默喺凌御生坐嘅嗰張梳化對面嘅梳化坐低
兩人都有啲怕下一個瞬間凌御生就要發脾氣，都唔敢坐得咁近
喺辦公室內嘅氣氛格外凝重，時間彷彿被施咗咒一樣，時針同分針今日行得特別慢
「已經過咗成個鐘，但佢都冇出去…」阿津仍然留意住追蹤器嘅動向


追蹤器顯示兩個追蹤器仍然喺阿年所住嘅屋苑停車場
另一邊廂，阿年正喺鐵皮屋嘅附近行緊過去鐵皮屋
阿年冇揸車過去，今日突然間覺得揸車會有啲咩事，所以就決定轉幾程車入去
「大佬。」幾個小弟一見阿年入嚟，即刻就恭敬咁企起身
「嗯。」阿年插住褲袋行到夏巧莘面前，喺褲袋中拎出小刀，咩都冇講就直接蹲低喺夏巧莘面前，喺佢左邊小腿上又𠝹咗一刀
「呀…！」夏巧莘一下子就尖叫出嚟，眼淚又急急滑下
夏巧莘嘅身子顫抖着，咬着唇害怕得發慌嘅樣子令企喺阿年身後嘅三個小弟都不禁心疼
上次嘅刀傷先啱啱開始埋口，今次又有新嘅刀傷，左邊小腿上嘅刀剛好同上一次嘅形成咗一個「X」字，右邊白滑嘅小腿上都有咗傷口

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link