[愛情走糖故]兩個人心底中不為人知嘅秘密,成為兩個人間嘅牽引: 123.那是我們間的承諾

「到啦。」凌御生輕拍夏巧莘嘅博頭，夏巧莘自然地皺一皺起眉頭
夏學謙打開車門，將書包孭住喺前面落車，行到去後座，將後座嘅車門拉開
凌御生將放喺自己右邊，屬於夏巧莘嘅書包遞比夏學謙
夏巧莘小心翼翼咁向左邊移出去落車，剛企喺地面嗰刻，小腿瞬間就傳嚟一陣刺痛嘅感覺
「嘶…！」夏巧莘不禁皺起眉頭，眯起眼
凌御生同夏學謙即刻就扶住夏巧莘
「你唔好行番去啦，等你細佬孭你番去啦！」凌御生皺起眉頭，夏學謙嘅手穿過夏巧莘書包嘅兩條孭帶，將夏巧莘嘅書包勾喺手臂上
「上嚟啦。」夏學謙背住夏巧莘蹲低
夏巧莘回頭望向凌御生，一副依依不捨嘅表情伸手捉住凌御生衫袖嘅袖角
「我仲有嘢做啦。」凌御生無奈一笑，伸手摸一摸夏巧莘嘅頭，「得閒嗰陣whatsapp搵你啦好唔好？」


「嗯…」夏巧莘扁起嘴，但都乖乖點頭
凌御生扶住夏巧莘，等夏學謙穩陣咁孭好夏巧莘之後就慢慢放手
「咁我地聽日見啦…」夏巧莘依依不捨地講道，然後揮手，「拜拜…」
夏學謙轉身望向另一邊，夏巧莘同坐喺車中嘅鍾家豪都揮揮手講拜拜，夏學謙只係微微點一點頭，彎一彎腰，就孭住夏巧莘番屋企
「好耐都冇試過孭住你番屋企。」夏學謙先打開話閘子，「對上一次好似已經係細個小學嗰陣。」
「都大個啦嘛，我重嘅話你放我落嚟，我慢慢行番去。」夏巧莘嘅手喺夏學謙嘅頸前交搭着，心中始終有啲尷尬
「唔洗，你唔重。」夏學謙平靜咁講道
夏學謙忽然深呼吸，夏巧莘微微抬頭望夏學謙，但夏學謙咩都冇講
「好肚餓…」夏巧莘細聲講道
「番去煮嘢比你食，你想食咩？」夏學謙問道


「食咩都好，好耐都冇食過你煮嘅嘢咁。」夏巧莘笑道
「番去沖涼嗰陣，隻腳唔好濕水，用濕毛巾抹下就好啦。」夏學謙提醒道
「嗯，好呀。」夏巧莘點點頭
凌御生同鍾家豪各自番屋企換衫，喺車上面嗰陣，換咗做凌御生揸車，鍾家豪坐喺副駕低頭睇手機
「校花都冇事啦，你做咩一副心事重重嘅樣呢？」鍾家豪留意到由啱啱凌御生上車嗰刻開始就將愁緒都放晒只臉上，「仲愁緊啲咩呀？」
「今次有危險，可能仲會有下次。其實佢唔同我一齊，先係保護佢嘅最佳方法。」凌御生心中只有最壞嘅打算同想法，「今次好彩佢冇事，如果有下次呢？年叔叔見到我嗰陣嘅第一句係話，騎士果然會嚟救公主…但係如果保護唔到公主嘅話，又有咩資格做公主嘅騎士…？」
「宜家公主平安無事，最後騎士都係救咗公主番嚟呀～」鍾家豪笑了笑道
「咁如果，有下次我救唔到佢呢…？」凌御生嘅眼中不自覺流露出心疼
鍾家豪沉默不語，故意撇開臉望向車窗
「咁所以呢？所以你唔同佢一齊，咁樣嚟保護佢？」鍾家豪平靜咁問道，視線移離車窗外嘅景物後，耷低頭離住手機嘅螢幕無奈一笑，「你冇見到佢有幾依賴你㗎咩？」


凌御生沉默不語，因為鍾家豪呢句說話，令佢諗起夏學謙
夏學謙係夏巧莘嘅依靠，但突如其來嘅告白令夏巧莘失去咗一個依靠，一個一直都依賴着嘅人
凌御生答應過夏巧莘唔會離開佢，因為自己係除咗夏學謙之外，夏巧莘最後一係依靠，佢應承咗夏巧莘佢唔會離開，一定會留喺佢身邊
但係宜家呢一刻嘅凌御生，心中滿滿嘅猶疑
親眼見到受傷嘅夏巧莘令佢卻步，佢怕，怕假若不幸地有下一次，佢冇辦法保護佢嘅時候點算？

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link