「阿生,你係咪應該諗清楚呢?」鍾家豪喺落車嘅時候特意提醒道,「你進入咗夏巧莘嘅生活圈,你喺佢心入面佔一個咩位置你知道㗎,你應該考慮嘅係眼前嘅事。」
凌御生將鍾家豪嘅說話記住喺腦入面
「佢冇事,我地可以夾Band啦~聽日放學Band房見。」鍾家豪笑咗一笑,揮一揮手就轉身走
凌御生揸車番自己屋企嘅時候,腦海中除咗鍾家豪啱啱講嘅說話之外,就只有夏巧莘嘅身影
凌御生同夏巧莘兩人,可以話係「識於微時」,由因為對方嘅秘密而對對方感到好奇,到開始會有少許期待見到對方,從而產生出偶爾嘅怦然心動,去到完完全全咁中意對方,時間好短,但喺心中嗰份心動卻係好漫長
凌御生深呼吸,但卻無法掩蓋佢心中嘅不安感,佢…完全唔想失去夏巧莘…
準備沖涼嘅夏巧莘企喺浴缸前等待水滿,佢諗緊要點樣坐落去先可以保證小腿唔會掂到水
夏巧莘坐喺浴缸邊,雙手扶住浴缸嘅邊位慢慢坐入水中
佢一坐入水中,水位頓時上升,夏巧莘嘅小腿掛喺浴缸邊沿輕輕地踢着腿,水位浸咗大腿嘅三分之二
「唔開心呢…」夏巧莘扁着嘴,細聲咁喺洗手間中喃喃自語,「好掛住凌御生呢…」


夏巧莘濕咗條毛巾,稍微扭乾之後用嚟抹一抹小腿,沖完之後就打開咗個去水位嘅蓋,順便洗一洗隻腳
「點洗頭…」夏巧莘將毛巾圍喺身上,因為仲要洗頭
夏巧莘諗咗一陣之後,跪咗喺浴缸旁邊耷低頭再用花灑洗
「好麻煩…」夏巧莘洗完頭,就咁用毛巾稍微抹一抹個頭就算,「唔吹頭啦,好攰…」
夏巧莘換番舒服嘅居家服行出廳,夏學謙剛好煮完嘢食比夏巧莘,正將飯菜拎出嚟放喺餐枱上
「你做咩唔吹頭呀?」夏學謙一見到夏巧莘仲係濕淋淋嘅頭髮就皺起眉頭
「好攰呀…」夏巧莘慢慢拖着腳步行向餐枱
「你食嘢,我幫你吹頭。」夏學謙將夏巧莘扶去餐枱前坐低,然後又轉身行去廁所拎風筒
夏巧莘坐喺餐枱前拎起筷子食飯,飯菜嘅香味今日格外吸引,可能因為已經有好幾日冇食過住家飯
夏學謙企喺夏巧莘身後,夏巧莘坐着食飯,夏學謙拎住風筒,輕輕撥着夏巧莘嘅頭髮幫佢吹頭


夏學謙望住夏巧莘拎住筷子津津有味咁食着飯菜,心中都默默高興,縱使再諗深一層,遲早有一日,夏巧莘都會搵到嗰個陪佢一生嘅人,呢個家姐,亦只會係佢一世嘅家姐
但向好嗰邊諗,其實佢佔咗夏巧莘嘅上半生好多時間,因為佢地係冇辦法分離嘅家人,夏學謙比凌御生陪伴夏巧莘嘅時間長
「其實去到最後,我對你嘅感情,大概係親情多於愛情。」夏學謙喺心中講道,悄悄地揚起嘴角微笑起嚟,「對我嚟講,你幸福就係最好嘅事。」
夏學謙收起風筒,將風筒拎番去廁所
「食飽未呀?」夏學謙行番出嚟嗰陣問
「飽晒啦!」夏巧莘笑住咁放低筷子,然後企起身拎起碗筷執枱
「放低啦,我執得啦。」夏學謙大步行到枱前拎走碗碟,「你休息下啦。」
夏巧莘拎住手機行番入房,一下子就跳到床上,大字型咁灘喺床上面
「果然都係我張床最舒服~」夏巧莘雙手雙腳喺床上面掃着,然後一個翻身側身瞓,亮起手機嘅螢幕,「點解佢冇搵我嘅…?」
夏巧莘有啲悶悶不樂咁望住冇傳嚟whatsapp通知嘅手機


「或者佢有嘢忙緊呢~」夏巧莘笑起嚟同自己講道,但轉眼又扁起嘴,「唔…」
正當夏巧莘攬住攬枕,默默地掛住凌御生嘅時候,電話就響起嚟
電話一響,螢幕一亮,夏巧莘瞬間彈起身坐喺床上
「嘶!痛痛痛痛…」夏巧莘動作有啲大,整到傷口,傷口被拉扯,痛得夏巧莘眼淚都要流出嚟,但為咗要接凌御生電話,咩都唔緊要,「喂~」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link