[愛情走糖故]兩個人心底中不為人知嘅秘密,成為兩個人間嘅牽引: 132.愛的反面不是恨嗎？

凌御生心疼到極至，佢最討厭其他人令夏巧莘傷心，但最後佢先係令夏巧莘最傷心嘅人
夏巧莘喺天台喊咗一陣之後，就收拾番心情，然後落番三樓去洗手間入面整理一下自己嘅儀容同心情
因為喊得太厲害，臉上仍然留有少許喊過嘅痕跡
夏巧莘抽抽鼻子，雙手掩住雙眼，微微耷低頭合埋眼，好讓喊到紅紅腫腫嘅雙眼可以休息一陣
夏巧莘準備番課室，佢企喺洗手間嘅門前，捉住門柄，然後深呼吸，好似要鼓起勇氣先可以開門一樣，佢將剩下嘅氣呼出，呆咗兩秒，輕輕抿唇然後先開門番課室
「叩，叩。」夏巧莘敲咗兩下門，老師望向門口點一點頭
「你有冇事呀？唔舒服就落醫療室休息一陣啦！」老師微笑道
「我冇事。」夏巧莘慣性咁露出微笑搖搖頭，然後行番埋位
嘉怡望住夏巧莘嘅神色有啲奇怪，心中有啲擔心
「你真係冇事？有冇咩唔舒服呀？」嘉怡對經過自己旁邊嘅夏巧莘關心道


「冇事，可能仲有小小痛啫，過多陣就好㗎啦～」夏巧莘坐低嘅同時回答道
「嗯，你有唔舒服就落醫療室啦～」嘉怡微微一笑，然後望番前面繼續聽書
夏巧莘個人雖然係坐喺課室，但係個靈魂都唔喺課室入面，早就唔知飛咗去邊，只係默默托住頭，耷低頭看似望住課本，但係其實早就雙目無神咁放空着
「夏巧莘，對唔住。」
「我諗我唔可以遵守我地之間嘅承諾…」
喺幾乎空白嘅腦海中，只浮現咗凌御生啱啱講嘅一番說話中嘅重點
一諗到呢度，夏巧莘嘅眼眶又開始濕潤起嚟，於是抽一抽鼻子，假裝眼癢揉眼抹眼淚
「邊有可能話忘記就忘記…」夏巧莘喺心中偷偷落淚
就因為凌御生一句說話，夏巧莘都冇心情上堂，夏巧莘當然知道中六係更加應該用功，但係佢真係冇心情聽書
「我算咩呀宜家…挽完就算呀？老當我惊備胎呀？」夏巧莘喺心裏抱怨，不禁有少許真嬲，「我堂堂校花比你挽完就棄，過份…！比人知嘅話我仲有校花該有嘅面子嘅！？」


夏巧莘喺心中嬲嬲地咁講道，心中不斷抱怨，忽然怨氣急升
愛嘅反面，唔係恨咩…？
但好快夏巧莘又一臉委屈咁皺起眉頭扁起嘴
「咩都唔同我講…我知你有苦衷，但點解你就唔講…？」夏巧莘悄悄地嘆咗一口氣，「你因為同一個原因，而三番四次咁將我拒諸千里…」
夏巧莘今次真係愛得深，傷得更深，傷到入骨，傷到心臟都要原地打碎…
夏巧莘完全冇心情聽書，全日冇心情聽書，冇心情食飯
小息午膳都只係伏喺枱面，邊度都唔去，連去廁所嘅心情都冇
凌御生都冇出過課室幾乎，因為唔想見到夏巧莘唔開心嘅表情
「你呀…凌御生，你真係好過份…」今日幫凌御生做跑腿嘅鍾家豪側住身坐喺位，一臉無言咁望住凌御生，「你咁樣好咩？佢傷心你又傷心…」
凌御生冇講嘢，只係望一望鍾家豪，然後又發呆


「喂！」鍾家豪用力拍凌御生嘅手臂
凌御生只係皺一皺眉，但係仍然咩都冇講，鍾家豪有啲愕然，因為比着係平日嘅凌御生一定會打番佢轉頭
「你比年叔叔講咗兩句，你就要放棄佢啦？你嘅意志力會唔會差咗啲呀？」鍾家豪睇唔過眼，就直接對凌御生訓話，「你啲自信呢？去咗邊呀？」
「冇晒啦。」凌御生面無表情咁講道，「中意又點，唔適合就唔適合㗎啦。」
「你咁講嘅話，你單身一世啦！」鍾家豪聽到凌御生嘅回答，突然有啲嬲

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link