[愛情走糖故]兩個人心底中不為人知嘅秘密,成為兩個人間嘅牽引: 133.又是你⋯！

去到放學嘅時候，夏學謙正執緊書包，突然間收到夏巧莘嘅whatsapp
家姐：今日一齊番屋企，你落嚟等我
夏學謙睇到之後，心中有啲疑惑，今日夏巧莘竟然話同佢一齊走？佢地兩姊弟都好耐冇一齊走
夏學謙執完嘢，就落去3樓搵夏巧莘，但行到去夏巧莘嘅課室門口先發現，夏巧莘原來未落堂，夏學謙唯有喺門口等一陣
本來靠住旁邊牆壁嘅夏學謙見到老師執嘢行出嚟嘅時候就企番好
夏巧莘以龜速執嘢，然後孭住書包，心不在焉咁行出嚟，一行到門口，就突然比自己絆咗一下，向前跌咗一小步
「唉…」夏巧莘回頭望咗地下一眼，然後又嘆氣
夏學謙見到夏巧莘嗰個心不在焉嘅表情，一頭霧水咁望住夏巧莘，但夏學謙都冇多口講啲咩
夏巧莘默默地行喺夏學謙身邊，一直心不在焉咁耷低頭行，又冇出聲
兩個人搭車番到屋企附近嘅巴士站，慢慢行番去，由喺學校開始，兩個人已經一直冇講嘢


當行到屋企樓下嘅前園嗰陣，夏巧莘因為一直放空所以都冇留意到地面凹凸不平，一個不小心就絆到一下，但今次直接向前跌，夏巧莘嘅膝頭先跪落地，雙手㩒喺住地面，先冇直接跌趴喺地上
「你做咩呀今日？成日都心不在焉咁…」夏學謙終於都係冇忍住口問跌坐喺地上嘅夏巧莘
夏巧莘雙手㩒住地下，頭一直低着
「起身啦，地下污糟呀！」夏學謙伸手想扶起夏巧莘
夏巧莘嘅眼眶泛紅，眼淚直接滴喺石地上
夏學謙嘅手差唔多要掂到夏巧莘嘅手臂同時見到淺灰色嘅石地上突然多咗兩個深灰色嘅水跡
「做咩喊啦？」夏學謙心知不妥，就蹲低喺夏巧莘旁邊，「整親啦？」
夏巧莘冇回應，只係帶着小幅度咁搖搖頭
縱使夏巧莘盡量抑壓住自己嘅聲音唔喊出聲，但係抽鼻子同抽泣嘅聲音始終暪唔住
「做咩啦？」夏學謙微微側頭望夏巧莘


夏巧莘嘅手用力想抓住地下，如果地下有沙嘅話，夏巧莘大概會捉起一把掉出去
「起身先啦…」夏學謙先企起身，然後拉起夏巧莘，拉住佢行向大堂
姊弟倆番到屋企，夏巧莘一直就匿喺睡房入面冇再出過嚟
夏學謙有啲擔心，但心中有數，大概都知道一定同凌御生脫不了關係
夏巧莘坐喺床上抱着膝，喺房喊到喘晒氣，今次真係心傷了
夏學謙行到去夏巧莘嘅房門前，抬手想敲門，但係又冇敲落去
「我應該關心下定係唔理呢？」夏學謙猶疑着，手仍然懸喺半空，「但係我唔理佢嘅話，佢會唔會連訴苦嘅渠道都冇呢…」
夏學謙企喺門口，呼吸都唔敢太大聲，生怕夏巧莘發現自己
「算啦…等佢冷靜下先啦…」夏學謙收回手然後打算轉身走嘅時候又止住了步，「唉…都係關心一下啦…」
夏學謙都係決定關心一下夏巧莘


「叩叩…」夏學謙敲咗兩下門，然後就推開門入去，「你點呀？」
夏巧莘坐喺床上攬住枕頭，雙眼同鼻尖都紅紅的
「今日做咩失晒魂咁？」夏學謙閂埋房門，行到夏巧莘嘅床邊坐低
夏巧莘聽到夏學謙咁諗，本來已經空空如也嘅小腦袋又再浮出凌御生今日講嘅嘢，本來已經止住嘅眼淚又再慢慢將眼眶濕潤
夏學謙喺放喺床邊嘅紙巾盒中抽咗張紙巾遞比夏巧莘
「佢唔要我啦…！佢今日同我講對唔住，佢唔同我一齊啦…！」夏巧莘帶着哭腔講道
夏學謙嘅眉頭一皺，心中對凌御生罵道：「又係你凌御生！」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link