[愛情走糖故]兩個人心底中不為人知嘅秘密,成為兩個人間嘅牽引: 135.吵架

「喂你講笑咋？」鍾家豪一臉難以置信，凌御生望住鍾家豪苦笑，「你唔係嚟真呀嘛…」
「你話呢…？」凌御生反問鍾家豪
「你…你唔係呀嘛！你痴咗線呀？」鍾家豪再不解，軒軒同阿文都呆咗，冇諗到凌御生居然會唔要夏巧莘
「嗯…」凌御生似笑非笑咁點頭，「痴咗線…」
「佢係校花喎！你唔係好中意佢㗎咩？」軒軒有啲怯，但都照問道
「校花係大家嘅初戀，你咁樣好咩？」阿文拎住本來喺軒軒手上嘅鼓棒
「佢都係我嘅初戀呀…」凌御生講道，但臉上嘅表情冇緩和落嚟嘅跡象，「但我可以點？」
「係你自己冇信心咋…」鍾家豪一臉嫌棄咁講，「如果你咁樣就放棄佢，咁你又有幾愛佢？你講咩都假！你咁厄佢感情有咩分別？」
「我冇厄佢，我對佢係真心真意，係真係愛。」凌御生聽到鍾家豪嘅話之後有啲嬲，瞬間就板起臉嚟
「呿，你有幾愛呀？你連對自己都冇信心呀，仲講咩愛佢啫？」鍾家豪比凌御生講嘅嘢點起咗火頭，心中忽然間湧出一點怒火，「你敢講你今次唔係因為對自己冇信心所以唔要佢？」


被講中事實嘅凌御生因為冇法瞞住心事而嬲，直接沖鍾家豪發火
「你講到好似你好中意佢咁，咁又唔見你同我爭？你咪又係因為冇自信心。」凌御生嘅怒火開始燃燒起嚟
「哈…關我咩事突然間？」鍾家豪都唔係好惹，平日看似冇咩脾氣，但只要有人惹到佢把火，鍾家豪會毫不客氣咁反駁番去，「我係冇自信又點？總好過你，應承咗人然後又要反口。」
「你講咩呀？」凌御生企起身同時將結他扔到梳化上，瞪着鍾家豪
「講事實！」鍾家豪都企起身望住凌御生，氣勢完全唔比凌御生差
「呃…你兩個唔好咁，相嗌唔好口嘛！」軒軒見氣氛突然僵住，即刻開口想緩和一下氣氛，更用手肘撞一撞阿文
「係囉係囉，唔好咁啦～」阿文都識做咁講道，然後將凌御生拉後兩步
軒軒都即刻行到鍾家豪身後拉住鍾家豪向後行咗兩步，怕佢兩個會打起嚟
「你有本事，你去追！」凌御生一下子就甩開咗阿文嘅手
「我冇諗過要追！我話咗支持你就唔會同你爭！」鍾家豪不忿道，「因為你話中意佢，我知你中意佢，所以我支持你，但你宜家咁放棄佢，對佢好咩？佢會傷心到點呀？你Hurt咗佢呀宜家！」


凌御生因為鍾家豪嘅說話更嬲，但係卻無言以對，只因鍾家豪講嘅全部都係事實
凌御生一氣之下直接執嘢，拎起結他放入結他袋，然後拎起書包，直接邁步行出Band房
「呯！」Band房嘅門被用力閂上
阿文同軒軒比門口閂上嘅聲響嚇咗一嚇，然後對望咗一眼，鍾家豪握緊拳頭，咬緊牙
「今日散啦我地，下次再練啦…」阿文睇鍾家豪臉色，怯怯地講道
「嗯。」鍾家豪嗯咗一聲之後好快咁就執晒啲嘢離開Band房
阿文同軒軒無奈對望一眼，然後都執嘢走，心中都有啲無言以對
「平時都冇見過佢會發咁大脾氣。」阿文講緊嘅佢，係鍾家豪
「佢平時咁好脾氣，好難見到佢會咁樣…」軒軒搖搖頭，「佢今日同阿生撐到咁行…但冇諗到原來鍾家豪都中意校花。」
阿文同軒軒執好嘢之後就閂上Band房內嘅燈，閂上門離開Band房，此時嘅凌御生行到落停車場攞車


凌御生將結他放喺副駕，開車番去嗰陣，腦海中淨係諗到鍾家豪同佢講嘅嘢

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link