夏學謙冇打算出聲講啲咩安慰夏巧莘,佢嘅功用就係一個樹窿,只聽不回
夏巧莘訴苦都訴咗成個鐘,最後夏巧莘都喊到攰,直接瞓喺床度瞓著咗
「唉…」夏學謙嘆一口氣,然後幫夏巧莘蓋一蓋被子,輕聲無奈地道,「你咁中意佢,但係佢都係辜負咗你…」
夏巧莘側着身攬住攬枕瞓,眉頭依然輕皺著,臉上仍有淚珠滑過嘅痕跡
「連瞓覺都會感到委屈啦…?」夏學謙緩緩企起身,苦笑道,一步一步夏學謙閂上房門
凌御生同鍾家豪、軒軒,阿文一齊喺Band房,剛好係休息時間,凌御生拎住結他,卻坐喺梳化上面發呆
另外三人都唔敢講嘢叫佢,因為凌御生正處於低氣壓之中,佢嘅氣場令企隔離嘅鍾家豪都覺得唔自在然後默默行開躲避
縱使凌御生今日大放狠話,但心中仍然掛念着夏巧莘
「我今日咁講,係咪太絕情…?」凌御生望住結他發呆,心中閃出一絲懊悔
夏巧莘喊得梨花帶雨嘅樣一直喺凌御生嘅腦海中揮之不去,凌御生嘅心都仍然痛着


「唉…」凌御生一嘆氣,大家都抬眼望佢一眼,但又唔敢多問,唯有扮聽唔到再低頭
「我到底愛唔愛佢…?但我唔敢對佢許下承諾…」凌御生嘅手摸着結他嘅弦線,「佢第一次喊到咁樣…係咪我太過份…今日推開佢嘅時候佢都愕然啦,係我太過份?但係要佢死心,咁樣已經係最低殺傷力嘅方法,如果唔係我仲可以點呀…」
「不如你去睇下佢點,我同軒軒唔敢過去。」阿文捉住鍾家豪細聲講
「佢咁樣真係好唔掂喎!」軒軒皺起眉點頭
「你兩個推我去死啫咁即係…」鍾家豪望住佢兩個
「咁你地兄弟啲嘛,你去問佢一定唔會打你。」軒軒眼尾瞄一瞄凌御生
「其實係我錯,我比咗期望佢…」凌御生直接成個人側身頹廢咁灘喺梳化上
凌御生記得佢曾經答應過夏巧莘,佢唔會離開佢,絕對唔會…但宜家佢正係要離開夏巧莘嘅身邊,狠心咁將夏巧莘推開,狠心咁喺佢最難過嘅時候轉身離開
「我嚟緊要點…要點面對佢…唉…」凌御生又嘆咗一口氣
喺Band房中嘅另外三人聽住凌御生嘅嘆氣聲已經快要半個鐘,軒軒同阿文都頂唔順,不停推着鍾家豪要佢去問凌御生,睇下佢點


「搞咩呀?為女煩呀?」鍾家豪比兩人推咗出嚟,走向凌御生身邊坐低喺梳化嘅扶手上
「係掛…」凌御生一臉頹廢咁答
「咩係掛呀?」鍾家豪無奈咁望住凌御生
「唔知…」凌御生用手臂蓋喺雙眼上,想要逃避現實
「你知唔知自己做緊咩呀?」鍾家豪輕力推一推凌御生嘅手臂,然後望一望企喺另一邊嘅軒軒同阿文
「唔知…」凌御生又緩緩開口道
「做咩啫你突然間,做咩要搞到好似死人冧樓咁啫?」鍾家豪一頭霧水,完全唔知凌御生到底發生咗咩事,「個天都未冧落嚟,你睇你,做咩啫宜家?頹緊啲咩呀?」
「宜家同個天冧落嚟有咩分別…」凌御生終於唔係答唔知
「你突然間頹到咁,我地又唔知你咩事…」軒軒拉起凌御生,凌御生頹廢咁靠住後面嘅抱枕坐
「校花出事啦?佢唔要你咩?」阿文呢句一出口,凌御生就望一望阿文,嚇到阿文即刻移咗半個人去軒軒身後


「係我唔要佢啦…」凌御生冷笑一聲,然後微微搖頭
「吓!?」三個人頓時嚇壞了,同時間大聲咁吓咗一聲

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link
已有 0 人追稿