[愛情走糖故]兩個人心底中不為人知嘅秘密,成為兩個人間嘅牽引: 144.直接公開

「至於我同夏巧莘嘅關係…」凌御生故意望一望夏巧莘，夏巧莘有啲期待凌御生嘅回答，但都要假裝生氣，微微鼓起兩泡腮，「我只可以話夏巧莘當然，係我女朋友。」
夏巧莘心中嘅小鹿頓時亂跑亂跳，四處亂撞，佢諗都冇諗過，凌御生會直接喺呢個時候同大家公開，因為二人其實未確認關係
夏巧莘高興嘅同時，又有啲嬲，因為凌御生明顯係故意咁做，令夏巧莘冇退路，必須要承認同凌御生嘅戀愛關係
「呢個回答，你滿唔滿意？」凌御生故意問劉子勤
「你好嘢。」劉子勤咬着牙講道，本來想落凌御生面，結果就落咗自己面
等到大家都散咗之後，夏巧莘話有嘢要同凌御生講，要凌御生跟佢上天台
鍾家豪自然識做咁先番課室，唔阻佢兩個
凌御生跟喺夏巧莘嘅身後上到天台，夏巧莘推開天台門，然後氣沖沖咁直接行到天台嘅中央，背住凌御生企
「呯！」凌御生由得天台嘅門自己關上，佢行到夏巧莘嘅背後，兩人之間有一個身位
「你唔好以為你咁講，我就會原諒你！」夏巧莘轉身，仍然鬧脾氣中嘅夏巧莘裝作生氣咁講


「咁我講事實有錯咩？」凌御生嘅聲線由啱啱嘅霸氣強硬變得溫柔
「唔係事實！我同你都未確認關係…」夏巧莘氣沖沖講完之後，心中又有啲失落，不禁微微耷低咗頭，「而且你都唔想同我一齊啦！」
「唔係啦！」凌御生即刻回答，「唔係唔想啦！係我錯啦…」
凌御生走前一步，牽起夏巧莘嘅手
「你一時一樣，宜家又話想同我一齊，陣間一個轉身又唔想，都唔知你幾時想幾時唔想。」夏巧莘甩開凌御生隻手
夏巧莘一甩開佢嘅手，凌御生瞬間就攬住夏巧莘
「小寶貝唔好嬲我啦～我知錯啦！」凌御生撒嬌道，「唔好嬲啦～」
「你一時一樣，都唔知你幾時又唔想同我一齊…」夏巧莘咬着唇，呢句唔係氣話，係真心話，「你以為你咁樣我就唔再嬲同你一齊呀？我冇你想象中咁好恰呀！」
夏巧莘一直用力推着凌御生，但凌御生一直緊緊攬實夏巧莘，將夏巧着嘅頭㩒喺自己嘅懷中
夏巧莘嘅臉貼住凌御生嘅胸膛，但瞬間就聞到一陣平日冇聞過嘅氣味


「點解你身上有煙味？」夏巧莘抬頭問凌御生，凌御生不知不覺就鬆咗手，唔望夏巧莘，「你食煙？你有食煙㗎咩？」
「嗯…」凌御生回答道，夏巧莘一臉疑惑，「因為女仔多數都唔中意呢陣味，所以我識咗你之後都冇食過。我琴晚先食番，然後今朝又煙癮起…」
「你會痴到我個身都有煙味㗎！」夏巧莘即刻聞一聞自己身上有冇味，結果一聞就聞到真係有啲，「你搞到我身上都有陣煙味啦…」
「咁咪好，證明你係我嘅所有物。」凌御生趁夏巧莘唔為意就即刻攬住夏巧莘
夏巧莘鼓起兩泡腮，用手撥着自己嘅裇衫同校裙
「唔準撥。」凌御生捉住夏巧莘嘅手腕
「唔要痴到你陣味呀…」夏巧莘嘟起嘴，用另一隻手繼續撥
「喂！」凌御生捉埋夏巧莘另一隻手
宜家夏巧莘已經冇手可以騰出嚟，因為兩隻手都比凌御生捉住咗
「有我陣味咪好，個個都知你名花有主。」凌御生側着頭望夏巧莘


夏巧莘撇開臉，表示佢仍然嬲緊凌御生，凌御生諗盡辦法要氹番夏巧莘
「放手呀…」夏巧莘仍然唔望凌御生，只係細聲咁講咗一句

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link