「點解突然會咁樣嘅?」凌御生完全冇嬲,反而有啲擔心

「嗰日踩單車,落斜嗰陣剎唔切制,而且突發有隻貓喺側邊跑出嚟,我一擰軚,就反咗車,,一跌落地嗰下壓咗落隻手度,所以…」軒軒解釋道,「對唔住…」

「唔緊要,你休息下啦。」凌御生表示理解,「你地有咩諗法?」

「軒軒唔喺度,我地都唔齊整,少咗個鼓手就真係少咗啲嘢…」鍾家豪一臉認真地講道,「但個表演一定要繼續,所以我同阿文諗過不如由我地一對Band表演轉做你單飛,但都要睇下你點諗。」

「因為個表演入面你先係主角,我地只係其次,所以就算你一個自彈自唱,我地都覺得可以。」阿文講道



「但我地排咗咁耐…」凌御生冇第一時間答應,反而擔心緊佢地三個

鍾家豪對於凌御生會優先考慮佢地嘅感受而覺得驚訝,睇嚟呢個男仔真係有改變啦

「哎喲~我地嘅御生BB大個仔啦~識得諗我地啦~」鍾家豪攬住凌御生,凌御生第一個反應係推開佢

「你會考慮我地嘅感受,我好開心,但呢個係你嘅表白表演嚟。」阿文微笑道,「我地都覺得冇問題,你自彈自唱都Okay。」

「你地都決定咗啦…仲洗咩問我啫…」凌御生一臉無奈



「你一個人自彈自唱嘅話,佢都冧啲啦~」軒軒都笑起嚟講道

凌御生聽到軒軒提起「佢」嘅時候,不自覺就揚起嘴角笑起嚟

「嘩…凌御生你變晒啦…」鍾家豪望住凌御生搖一搖頭,「一提起人地就即笑…我唔係你嘅寶啦已經…」

「我嘅寶貝得夏巧莘一個咋~」凌御生嘅笑容中夾雜咗半點甜意,「冇你份。」

在坐嘅三人聽到之後即刻打個冷震



「你幾時變到咁肉麻㗎?」鍾家豪雙手抱着臂

「你識咗女朋友之後就會變到好似佢咁㗎啦~」阿文挪揄道

「佢兩個真係肉麻到震!」鍾家豪講道

凌御生甜甜地笑起嚟,眼裏嘅幸福都要溢出

「你成個心都係得佢㗎啦!」鍾家豪沒好氣咁望住凌御生,「笑得咁冧…」

「我日日夜夜個心都係得佢。」凌御生一本正經咁講

「你有冇諗過我地嘅感受呀…」軒軒都忍唔住開口講,「放晒閃咁…」

凌御生冇講嘢,只係耷低頭甜笑



「我諗住轉歌。」凌御生抬起頭嘅同時,講出咗自己嘅突然諗到嘅想法,「本來想唱《哪裏只得我共你》,但既然宜家我solo,咁就轉歌。」

「你想轉咩歌?」鍾家豪問道

「我想轉…」



星期一係番學嘅日子,凌御生一大清早就趕住出門口,跑去巴士站追車

上到車上層嘅第一件事,係搵夏巧莘喺唔喺度,凌御生一眼就見到夏巧莘坐喺佢平日坐開嗰個位

凌御生邁步走到夏巧莘旁邊坐低



「早晨~」夏巧莘送上一個甜美嘅笑容

「早晨…」凌御生帶着一個疲倦嘅樣子講道,「我琴晚瞓得唔好呀…」

「點解呀?我唔喺你隔離你就瞓唔到啦?」夏巧莘低頭笑起嚟,然後開玩笑講道

「嗯…你唔喺我身邊我瞓得唔好…」豈料凌御生正經咁回答

本來夏巧莘只係講笑,想捉弄凌御生一下,點知凌御生一下子就反撩過來

「嗯?你做咩唔講嘢?」凌御生見夏巧莘冇出聲便問道,只見夏巧莘撇開了臉,夏巧莘仍然冇出聲,凌御生突然好似知道咗啲咩咁樣,勾唇一笑,「你想撩我呀?妹妹,你功力未夠深厚呀~」

「哼…」夏巧莘細聲咁哼咗一聲,然後嘟起小嘴望住凌御生

凌御生望住夏巧莘一臉氣呼呼,心中直呼道:「真係好可愛~」



本來凌御生咩都冇打算多講,只係伸手摸一摸夏巧莘嘅頭,但係見夏巧莘仲係氣呼呼咁又忍唔住想要氹佢笑

「你喺我眼中一直都係細路女呀~」凌御生將夏巧莘嘅頭向自己㩒,夏巧莘乖乖地靠喺佢博頭上,但仍然嘟着小嘴,「你係我專屬嘅小女孩嘛~」

夏巧莘聽到之後忍不住笑意,都係露出了笑容

「嘻…」夏巧莘抬頭望凌御生,好似小朋友一樣天真咁笑起嚟


最 後 倒 數 8 集

IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link