[愛情走糖故]兩個人心底中不為人知嘅秘密,成為兩個人間嘅牽引: 159.寶物中的寶物

「你話㗎！」夏巧莘扁着嘴道，「你會唔會嫌我任性嫌我幼稚㗎？」

「唔會！」凌御生肯定地道，「我話咗你係我專屬嘅小女孩就唔會嫌棄你。你再幼稚再任性都好，我都會咁中意你。」

「會唔會有一日你嫌我太任性，唔中意我…？」夏巧莘又問道

「你任性啲就好啦～我唔需要你好懂事，因為冇人愛嘅孩子先要懂事…」凌御生望夏巧莘嘅眼神、語氣中全是寵溺，「但你有我愛你，有我縱容你，所以你唔需要好懂事。」

夏巧莘露出笑容，表情係多幸福呢



「不過，有一樣嘢係你一定唔可以做。」凌御生認真地講道，夏巧莘稍稍抬起頭，「就係你唔可以背叛我。」

「我唔會。」夏巧莘搖搖頭

「點任性胡鬧都可以，但係唔可以對我唔住、背叛我。」凌御生溫柔地微微一笑

「唔會，絕對唔會！」夏巧莘用力地搖頭，用長袖冷衫嘅手袖輕輕蓋喺嘴前細聲地講道，「淨係中意你，亦都淨係愛你一個…」

凌御生聽到之後個心都甜咗一下，低頭一笑



「就算有人講你閒言閒語都好，喺我心中你都係我最愛嘅凌御生… 」夏巧莘喺凌御生嘅耳邊細聲道

凌御生聽完之後順手地摸了摸夏巧莘嘅頭，輕輕地勾唇一笑

到站之後兩個人一齊落車，夏巧莘唔會再覺得同凌御生一齊行唔自在，反而好想同凌御生一齊行，因為佢想同凌御生光明正大咁一齊

一段最美好嘅關係，就係你放我喺心上，你唔介意比人知道我嘅存在，什至係主動嘅想人知道我嘅存在

…



去到午膳嘅時候，夏巧莘同嘉怡一齊落到小食部買嘢飲

凌御生依舊行過嚟，直接搶咗夏巧莘包嘢飲，凌御生伸手溫柔地摸咗夏巧莘個頭一下，然後同鍾家豪上番去

「喂…！」夏巧莘想叫住凌御生

凌御生聽到夏巧莘嗌咗佢一聲之後，凌御生回頭望向夏巧莘，揚起嘴角一笑

夏巧莘嘅心瞬間就比佢嘅笑容懾住，小鹿亂撞

喺旁邊目睹事發經過嘅嘉怡企喺一邊掩着嘴偷笑

「你兩個又喺度打情罵俏啦？」嘉怡笑問，「真係晒死人呀～」

夏巧莘冇出聲，只係望向嘉怡笑咗一笑



凌御生番到上課室之後同鍾家豪坐埋一齊食飯，鍾家豪偷偷瞄住凌御生，見到凌御生嘅嘴角一直都微微上揚就知佢心情明顯地好

「見到人，心情就好啦？」 鍾家豪笑着問道，「戀愛大過天？」

「心情不嬲冇特別，不過見到佢會特別好。」凌御生毫不忌諱直言

「真係救命…你有冇諗過我嘅感受？你咁放閃法我真係會盲！」鍾家豪反咗個大大嘅白眼

「星期三晚睇我表演啦～」凌御生一臉自信咁伸手搭住鍾家豪嘅博頭

「你唱比佢聽咋嘛，又唔係唱比我聽…」鍾家豪撥開凌御生隻手

「原來兄弟你中意我呀？睇唔出喎～」凌御生假裝驚訝咁講，但轉頭就拍一拍鍾家豪兄博頭，扮失落咁講道，「你嘅心意我明㗎啦～不過我已經有女朋友啦～」



「你諗太多啦…」鍾家豪無奈咁講咗句，「你已經唔係我識嗰個凌御生…」

凌御生笑起嚟，以前嘅佢的確唔會好似宜家咁，但識咗夏巧莘之後，佢真係笑多咗，多嘢講咗，只不過嗰種多嘢講係三句有兩句都離唔開夏巧莘

自從識咗夏巧莘之後，凌御生或者冇特別覺得自己變咗，但係佢身邊嘅人都會發現凌御生有另一面

原來凌御生都會有笑得開心、多嘢講嘅時候，原來佢都會有如此溫柔嘅一面，只不過一切原來要等佢嘅女主角出現嗰陣先會有

喺鍾家豪嘅眼中，無可否認地，凌御生真係好在意夏巧莘，夏巧莘對佢嚟講真係一個重要嘅存在

凌御生對夏巧莘嘅中意程度，由佢對佢嘅在意就可以睇到出嚟

人之所以會在意某一樣嘢，係因為佢中意嗰樣嘢，愈中意，愈在意，因為想要盡自己嘅能力得到、守護，怕一不小心就要將寶貝弄丟

既然中意，既然得到，當然要當係寶物一樣珍惜




最 後 倒 數 7 集

IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link